Library · yue

馬可福音 11

耶穌騎驢入耶路撒冷

1 耶穌同門徒行近耶路撒冷,到橄欖山嘅伯法其同伯大尼。耶穌打發兩個門徒先行,

2 吩咐佢哋話:「你哋去前面一條村。一入去,就會睇見一隻冇人騎過嘅驢仔綁喺嗰處。你哋將佢解開,拉嚟呢處。

3 若有人問你哋:『點解噉樣做呢?』你哋就話佢知:『主要用佢;佢會立刻將驢仔送嚟。』」

4 佢哋去,就睇見路邊有一隻驢仔綁喺門外。佢哋正解開繩時,

5 企喺處嘅人問佢哋話:「你哋做乜解開驢仔?」

6 佢哋就照耶穌所吩咐嘅回答,嗰啲人就俾佢哋拉走嗰隻驢仔。

7 佢哋將驢仔拉到耶穌處,將佢哋嘅衣服搭喺驢背上,耶穌就騎上去。

8 有好多人用佢哋嘅衣服鋪喺路上,亦有人拎田間斬落嚟嘅樹枝鋪喺路上,

9 喺前面行同喺後面跟隨嘅人都叫話:「讚美上帝!願上帝賜福俾嗰位奉主名嚟嘅!

10 願上帝賜福俾我哋祖宗大衛將要嚟嘅國度!讚美上帝!」

11 耶穌到耶路撒冷,入去聖殿,周圍睇吓。到挨晚,就同十二門徒出城去伯大尼。

咒詛無花果樹

12 第二日,佢哋由伯大尼返入城;喺路上,耶穌肚餓。

13 佢遠遠睇見一樖無花果樹,生滿葉,就走過去,想睇吓樹上有冇果。到樹前,只睇見葉,因為嗰時唔係結無花果嘅季節。

14 耶穌對樖樹話:「從今以後,冇人食你嘅果咯!」佢嘅門徒都聽見呢啲話。

耶穌潔淨聖殿

15 佢哋到耶路撒冷,耶穌入去聖殿將所有喺聖殿做買賣嘅人都趕出去。佢推倒兌換銀錢人嘅枱同賣白鴿人嘅凳,

16 又唔准人抬住雜物喺聖殿院中經過。

17 佢教訓佢哋話:「聖經記載,上帝話:『我嘅聖殿要做萬民禱告嘅殿,』但你哋將佢變成賊巢!」

18 祭司長同經學教師聽見呢啲話,就想設法除滅耶穌。但佢哋怕佢,因為羣眾都欽佩佢嘅教訓。

19 挨晚,耶穌同門徒去城外。

從無花果樹得教訓

20 朝早,耶穌同門徒又由嗰條路經過,睇見嗰樖無花果樹連根都枯乾咗。

21 彼得記起呢件事嘅經過,就對耶穌話:「老師,你睇,你所咒詛嘅無花果樹已經枯乾咯。」

22 耶穌答佢話:「對上帝要有信心!

23 我實在話你哋知,你哋若對呢座山話:『去,投入海裏』,只要心裏唔疑惑,確信所講嘅必定成就,呢啲事就必會為你哋做成。

24 所以,我話你哋知,凡你哋禱告祈求嘅,無論係乜嘢,只要信得到,就必得到。

25 你哋企處禱告時,要先饒恕得罪你哋嘅人;噉樣,你哋嘅天父亦會饒恕你哋嘅過錯。」

26 (若你哋唔饒恕他人,你哋嘅天父亦唔饒恕你哋。)

質問耶穌嘅權柄

27 佢哋又返到耶路撒冷。耶穌喺聖殿行時,祭司長、經學教師,同長老嚟見佢,

28 問佢話:「你憑乜嘢權做呢啲事?係邊個俾呢啲權過你呢?」

29 耶穌答話:「我問你哋一句話,若你哋答我,我就話俾你哋知我憑乜嘢權做呢啲事。

30 話俾我知,約翰施洗禮嘅權係由邊處嚟嘅,係由上帝,抑或由人嚟嘅呢?

31 佢哋彼此商量,話:「我哋應該點樣答呢?若我哋話『由上帝處嚟嘅』,佢會話:『噉樣,你哋點解唔相信約翰呢?』

32 若我哋話『由人處嚟嘅』,恐怕羣眾會對付我哋,因為佢哋相信約翰係先知。」

33 於是佢哋回答耶穌:「我哋唔知道。」耶穌對佢哋話:「噉樣,我亦唔話俾你哋知我憑乜嘢權做呢啲事。」