Library · yue

馬可福音 12

壞農夫嘅比喻

1 耶穌又用比喻教佢哋。話:「有一個人開墾一個葡萄園,周圍用籬圍住,喺園裏挖一個醡酒池,起一座守望臺,然後將葡萄園租俾農夫,自己去旅行。

2 到收葡萄嘅季節,佢打發一個僕人去向農夫收佢應得嗰份。

3 農夫執住僕人,毆打佢,使佢空手返去。

4 園主又打發另一個僕人去;佢哋打傷佢嘅頭,而且侮辱佢。

5 園主再打發一個僕人,佢哋殺咗佢。又同樣對付好多僕人,有啲打,有啲殺。

6 最後,園主只有佢最愛嘅仔可以打發。佢打發佢去見農夫,心諗:『佢哋必會尊敬我嘅仔。』

7 但係農夫彼此商議話:『呢個係園主嘅繼承人,我哋殺咗佢,佢嘅產業就歸我哋喇!』

8 佢哋就捉住佢個仔,殺咗,將屍體抛出葡萄園外。」

9 於是耶穌問:「噉樣,葡萄園主要點做呢?佢必嚟殺滅呢啲農夫,將葡萄園轉租別人。

10 你哋冇讀過呢段經文咩?匠人所丟棄嘅石已成為最重要嘅基石。

11 呢啲係主嘅作為,係奇妙呀!」

12 猶太人嘅領袖知道耶穌講嘅比喻係指責佢哋,就想捉佢。但係佢哋怕羣眾,於是離開咗佢。

納稅嘅問題

13 有啲法利賽人同希律黨徒奉命嚟見耶穌,想從佢嘅話搵藉口陷害佢。

14 佢哋對佢話:「老師,我哋知道你係誠實人;你唔理人點樣諗,亦唔睇情面,總係忠實將上帝嘅道教導人。請話我哋知,向羅馬皇帝該撒納稅係唔係違背我哋嘅律法?我哋納稅,抑或唔納?」

15 耶穌識穿佢哋嘅詭計,答話:「你哋點解想陷害我?拎一個銀幣俾我睇!」

16 佢哋俾一個銀幣佢,耶穌問:「呢上面嘅像同名號係邊個嘅?」佢哋答話:「係該撒嘅。」

17 耶穌話:「噉樣,該撒嘅嘢應該歸返該撒,上帝嘅嘢應該歸返上帝。」佢哋聽咗呢啲話,對佢非常驚奇。

復生嘅問題

18 有啲唔相信復生嘅撒吐該人嚟見耶穌。

19 佢哋話:「老師,摩西為我哋立法:『若一個人死咗,留低佢嘅妻,冇仔生落,佢嘅細佬必須娶寡嫂為妻,為大哥傳宗接代。』

20 曾經有兄弟七人:老大結咗婚,死咗,冇仔生落;

21 老二娶咗寡嫂,亦死咗,冇仔生落;老三同其他嘅細佬亦係一樣。

22 七個兄弟都娶過嗰個女人,都死咗,都冇仔生落。最後女人亦死咗。

23 噉樣,喺復生嘅日子,佢哋從死人中復生時,呢個女人算係邊個嘅妻呢?因為兄弟七人都娶過佢。」

24 耶穌答佢哋話:「你哋錯喇,因為你哋唔明白聖經,亦唔知道上帝嘅大能。

25 佢哋從死人中復生時,係同天上嘅天使一樣,唔娶亦唔嫁。

26 關於死人復生嘅事,你哋冇讀過摩西書荊棘篇所記載嘅咩?上帝對摩西話:『我係亞伯拉罕嘅上帝,以撒嘅上帝,雅各嘅上帝。』

27 係話上帝係生人嘅上帝,唔係死人嘅上帝。你哋完全錯咯!」

最大嘅誡命

28 有一個經學教師聽見佢哋辯論,覺得耶穌對撒吐該人回答得好,就向耶穌提出一個問題:「誡命裏邊一條係第一重要呢?」

29 耶穌話:「第一嘅係:『以色列呀,你要聽!主一我哋嘅上帝係獨一嘅主。

30 你要盡心、盡性、盡意,盡力愛主一你嘅上帝。』

31 第二條:『你要愛鄰如己。』冇其他嘅誡命比呢兩條更加重要。」

32 經學教師對耶穌話:「老師,你講得啱!正如你所講,上帝係獨一嘅主,除佢之外冇第二個上帝。

33 人要盡心、盡意,盡力愛上帝;又要愛鄰如己,遵守呢兩條誡命,比喺祭壇上獻燔祭同其他嘅祭物俾上帝重要得多。」。

34 耶穌睇出佢嘅回答滿有智慧,就對佢話:「你離上帝國唔遠。」從此之後,冇人敢再問耶穌任何問題。

有關基督嘅問題

35 耶穌喺聖殿教人時提出一個問題:「經學教師點可以話基督係大衛嘅子孫呢?

36 大衛曾受聖靈感動話:主對我主話:你坐喺我嘅右邊,等我使你嘅仇敵屈服喺你腳下。

37 大衛自己稱佢做『主』,基督又點會係大衛嘅子孫呢?」

要提防經學教師

38 羣眾都喜歡聽耶穌講論。喺教導佢哋時,佢話:「要提防經學教師;佢哋喜歡着長袍,招搖過市,喜歡人喺公共場所向佢哋致敬問候,

39 又喜歡坐會堂嘅特別座位同宴會上嘅首座。

40 佢哋佔寡婦嘅便宜,吞沒佢哋嘅家產,然後表演長篇嘅禱告。佢哋必會受到更嚴厲嘅懲罰!」

寡婦嘅奉獻

41 耶穌坐喺聖殿庫房嘅對面,見眾人拎錢捐入奉獻箱。好多有錢人捐好多錢;

42 有一個窮寡婦嚟,捐兩個小銅錢,等於一文錢。

43 耶穌將佢嘅門徒叫過嚟,對佢哋話:「我實在話你哋知,呢個窮寡婦所捐入奉獻箱嘅比其他嘅人都多。

44 人哋係由佢哋嘅財富中捐出有餘嘅;但係佢已經好窮,仍然將自己全部嘅生活費都獻上。」