Library · yue

馬可福音 13

預言聖殿嘅毀滅

1 耶穌由聖殿出嚟時,有個門徒對佢話:「老師,你睇,呢啲大石係極宏偉嘅建築!」

2 耶穌話:「你哋欣賞此偉大嘅建築咩?呢處嘅每一嚿石都將被拆落嚟,冇一嚿石會留喺另一嚿上面。」

災難同迫害

3 耶穌喺橄欖山,面對聖殿坐。彼得、雅各、約翰,同安得烈靜靜嚟問佢:

4 「請話我哋知,幾時會發生此事?此事發生時會有乜嘢預兆呢?」

5 耶穌話佢哋知:「你哋要謹慎,唔好受人愚弄。

6 有好多人將假冒我嘅名嚟,話:『我係基督』,而愚弄好多人。

7 你哋聽見打仗嘅風聲同戰爭嘅消息,唔使驚慌。此事必會發生;但呢啲唔係話歷史嘅終點已經到。

8 一民族要同另一民族爭戰;一國要攻打另一國;到處會有地震同饑荒。此事嘅發生正如產婦陣痛嘅開始一樣。

9 你哋自己要謹慎,因為人將捉你哋,交俾法庭。你哋將喺會堂上受鞭打,為我嘅緣故,企喺統治者同君王面前,為福音作證。

10 但係福音必須先傳俾萬民。

11 當佢哋捉你哋,將你哋帶到法庭時,唔好事先憂慮要講乜嘢;到嗰時,上帝要你哋講嘅,你哋就講;因為你哋所講嘅話係自己嘅話,係聖靈使你哋講嘅。

12 嗰時,人將出賣親兄弟,置佢哋於死地,父親對仔女亦係噉樣;仔女亦將同父母作對,置佢哋於死地。

13 為咗我,眾人將憎恨你哋。惟係堅忍到底嘅人必得救。」

大災難

14 你哋睇見嗰個『毀滅性嘅可憎之物』企喺佢唔應該企嘅地方(讀者必須領會呢句話嘅含意)。嗰時,住喺猶太嘅,應該逃到山上避難;

15 喺屋頂嘅,唔好落嚟,亦唔好到屋裏去攞任何物件。

16 喺農場嘅,唔好返屋企攞外衣。

17 嗰時,懷孕嘅女人同餵奶嘅母親有禍咯!

18 你哋要懇求上帝唔好俾呢啲事喺冬天發生!

19 因為嗰啲日子嘅災難係從上帝創世以來所未曾有過嘅,將來亦唔會再有。

20 若主唔縮短嗰啲災難嘅日子,冇人能生存。但係,為咗佢所揀選嘅子民,佢已經縮短嗰啲日子。

21 若有人對你哋話:『睇,基督喺呢處!或喺嗰處!』唔好相信。

22 因為偽基督同偽先知將會出現;佢哋將行神蹟奇事,盡所能嚟欺騙上帝揀選嘅子民。

23 你吔要小心!我已經預先將呢一切話俾你哋知。

人子嘅來臨

24 「嗰啲災難嘅日子一過去,日頭就變黑,月亮唔再發光,

25 眾星從天上墜落,太空嘅系統都搖動。

26 嗰時,佢哋將見人子有大能力大榮耀駕雲降臨。

27 佢將打發天使從四方,從天呢邊,到天嗰邊,召集佢所揀選嘅子民。」

無花果樹嘅教訓

28 「你哋要從無花果樹學教訓。當樹枝發嫩長葉時,你哋知夏天就到咯。

29 同樣,你哋睇見呢一切現象就知時候快到喇,正喺門口喇。

30 我實在話你哋知,呢一代人重未去世之前,呢一切事都要發生。

31 天地會消失,但我嘅話永唔會消失。」

嗰日嗰時冇人知

32 「但係嗰個將到嘅日子同時間,冇人知;天上嘅天使唔知,子亦唔知,只有父知。

33 你哋要留心,警醒,因為你哋唔知嗰日幾時嚟到。

34 正如一個人出外遠行,將家務交俾僕人管理,分配每一個人嘅工作,又吩咐看門嘅小心門戶。

35 所以,你哋要警醒,因為你哋唔知主人幾時返嚟一或挨晚,或半夜,或喺天光之前,或喺日出之後。

36 假如佢忽然返嚟,唔好俾佢發現你哋喺處瞓覺!

37 我對你哋講嘅話亦係對眾人講嘅:你哋要警醒!」