Library · yue

馬可福音 14

殺滅耶穌嘅陰謀

1 逾越節同除酵節前兩日,祭司長同經學教師陰謀要祕密捉耶穌,將佢處死。

2 佢哋話:「我哋唔好喺節期間落手,免致激起民眾嘅暴動。」

耶穌喺伯大尼受膏

3 耶穌喺伯大尼患痲瘋病嘅西門家中。食飯時,有個女人帶一隻玉瓶嚟,裏面盛滿好珍貴嘅純哪噠香油。佢打爛玉瓶,將香油倒喺耶穌頭上。

4 有啲在座嘅人好唔高興,彼此議論話:「噉樣浪費香油有乜嘢意思?

5 呢啲香油可以賣三十多兩銀,嚟救濟窮人幾好!」所以佢哋對嗰個女人好惱怒。

6 但係耶穌話:「由得佢喇,何必難為佢呢?佢為我做咗一件美好嘅事。

7 你哋時常有窮人喺處,願意嘅話,你哋隨時可以救濟佢哋,但係我不能時常同你哋喺埋一齊。

8 佢已經盡佢所能嚟做;佢將香油倒喺我身上係為我安葬做準備。

9 我實在話你哋知,普天之下,無論福音傳到邊處,都要講起佢所做嘅事,嚟紀念佢。」

猶大出賣耶穌

10 耶穌十二門徒中,有加略人猶大;去見祭司長,想將耶穌出賣俾佢哋。

11 佢哋聽見猶大噉樣講,喜出望外,答應俾錢佢。由嗰時起,猶大搵機會出賣耶穌。

耶穌同門徒一齊食逾越節晚餐

12 除酵節第一日,係宰逾越節羔羊嗰日,門徒嚟問耶穌;「你想我哋去邊處為你預備逾越節嘅晚餐呢?」

13 於是,耶穌打發兩個門徒,吩咐佢哋話:「你哋入城,會遇見一個人拎住一埕水;

14 佢入邊家,你哋就跟住佢入去,問嗰家嘅主人:『老師話:我要同我門徒食逾越節晚餐嘅嗰間客房喺邊處?』

15 佢會帶你哋睇樓上一間佈置好嘅大房;你哋就喺嗰處為我哋預備。」

16 兩個門徒出去,入咗城,所遇見嘅每一件事正如耶穌同佢哋所講嘅;佢哋就喺嗰處預備逾越節嘅晚餐。

17 挨晚,耶穌同十二門徒嚟。

18 佢哋坐低食飯時,耶穌話:「我實在話你哋知,你哋當中,同我一齊食飯嘅,有一個將出賣我。」

19 門徒非常憂愁,逐個問佢:「係我咩?」

20 耶穌答話:係你哋十二人中嘅一個;同我一齊擠手落盤嘅就係。

21 正如聖經所講,人子必要去世;但係出賣人子嘅人有禍咯!佢冇出世重好!」

主嘅晚餐

22 佢哋食飯時,耶穌拎起餅,獻上感謝嘅禱告,然後擘開,分俾門徒,話:「你哋拎嚟食,呢啲係我嘅身體。」

23 佢又拎起杯,向上帝感謝後,遞俾佢哋;佢哋都飲咗。

24 耶穌話:「呢啲係我立約嘅血,為多人流出嘅。

25 我實在話你哋知,我唔再飲呢啲葡萄汁,直到喺上帝嘅國裏同你哋一齊飲新嘅嗰日。」

26 佢哋唱首詩,就出去,到橄欖山。

預言彼得唔認佢

27 耶穌對佢哋話:「你哋都要離棄我,因為聖經話:『上帝將擊殺牧人,羊羣就分散。』

28 但係我復生之後,比你哋先到加利利。」

29 彼得話:「即使眾人離棄你,我絕唔會離棄你!」

30 耶穌對彼得話:「我實在話你知,今晚雞啼兩次之前,你會三次唔認我。」

31 彼得用更堅決嘅口氣話:「就算我與你同死,我都唔會唔認你!」其他嘅門徒亦都噉講。

在客西馬尼園嘅禱告

32 佢哋到一笪地方,名客西馬尼;耶穌對門徒話:「你哋喺呢處坐,等我去禱告。」

33 於是佢帶住彼得、雅各、約翰一齊去。佢覺得憂愁難過,

34 對佢哋話:「我嘅心非常憂傷,幾乎要死。你哋喺呢處警醒!」

35 佢向前行,俯伏喺地,祈求上帝話,若係可行,就唔使佢經歷呢個痛苦。

36 佢求話:「阿爸,父呀,你凡事都能。求你將此杯拎走;但係,唔好照我嘅意思,只要照你嘅旨意。」

37 佢返嚟,發現三個門徒都瞓着咗;就對彼得話:「西門,你瞓覺咩?你不能警醒一個鐘頭咩?」

38 佢又吩咐佢哋話:「要警醒禱告,免致陷入誘惑。你哋心靈固然願意,但肉體軟弱。」

39 佢又行過去,依然用同樣嘅話禱告,

40 然後再返到門徒處,見佢哋重係瞓着。佢哋睜唔開眼,亦唔知對佢講乜嘢話致好。

41 耶穌第三次返嚟,對佢哋話:「你哋重瞓覺,重休息咩?夠喇,時間到咯,人子被出賣喺罪人手中咯。

42 起身,我哋去咯!睇吓,嗰個出賣我嘅人嚟咯!」

耶穌被捕

43 耶穌重喺處講話時,十二門徒之一嘅猶大嚟到。有一班人帶住刀棒同佢一齊嚟;佢哋係祭司長、經學教師,同長老派嚟嘅。

44 嗰個出賣耶穌嘅先俾佢哋一個暗號,話:「我去吻邊個,嗰個就係你哋所要嘅人。你哋捉住佢,嚴密看守,將佢帶走。」

45 猶大一到,即刻走到耶穌面前,話:「老師!」就同佢接吻。

46 於是佢哋落手捉住耶穌。

47 企喺旁邊嘅人,有一個拔刀,向大祭司嘅僕人斬去,削甩佢一隻耳。

48 耶穌對佢哋話:「你哋帶刀棒出嚟捉我,當我喺強盜咩?

49 我每日喺聖殿教導人,時常同你哋一齊,你哋冇捉我。但係,聖經嘅話必須實現。」

50 嗰時,所有門徒都離棄佢逃走。

51 有一青年,身上只披一塊麻布,跟喺耶穌背後。佢哋想捉佢,

52 但係佢丟落塊布,赤身逃走咗。

53 佢哋將耶穌帶到大祭司嘅住家;喺嗰處,所有嘅祭司長、長老,同經學教師都聚埋一齊。

54 彼得遠遠跟住耶穌,一直到大祭司嘅院,同警衛同坐,烤火取暖。

55 祭司長同全議會想盡方法搵證據控告耶穌,置佢於死地,但係搵唔出任何證據。

56 好多人出面誣告佢,但係佢哋所提供嘅證詞都唔相符。

57 後來有幾個人企起,做假證控告耶穌話:

58 「我哋聽見佢話:『我要將呢座人手建造嘅聖殿拆毀,三日內建一座唔係人手造嘅聖殿。』」

59 連呢個控告,佢哋所講嘅都互相矛盾。

60 於是大祭司喺眾人面前企起,問耶穌:「佢哋對你嘅控告,你冇答辯咩?」

61 耶穌唔出聲,一句都唔講。大祭司再問佢:「你係當受稱頌者之子基督唔呢?

62 耶穌答話:「我係!你哋將見人子坐喺全能者嘅右邊,駕住天雲降臨!」

63 大祭司撕裂自己嘅衣服,話:「我哋再唔需要證人咯!

64 你哋聽佢講侮辱上帝嘅話。你哋話應該點樣做呢?」佢哋都判定佢有罪,應該處死。

65 有啲人就向佢吐口水,又蒙住佢嘅眼,用拳頭打佢,問佢:「你估吓係邊個打你?」警衛亦拉住佢,用手掌摑佢。

彼得唔認耶穌

66 嗰時,彼得重留喺下院。有大祭司嘅一個女工走過嚟,

67 見彼得喺處烤火,就定眼望住佢,話:「你同拿撒勒耶穌係一齊嘅。」

68 彼得否認話:「我唔知,我唔明白你喺處講乜嘢。」講完,佢就避到前院。嗰時,雞就啼。

69 過一陣,嗰個女工人又睇見佢,再對企喺旁邊嘅人話:「佢係同佢哋一齊嘅!」

70 彼得又否認。又過一陣,嗰啲企喺旁邊嘅人再次指住彼得話:「你冇辦法唔認你係同佢哋一齊嘅,因為你亦係加利利人!」

71 彼得就發誓話:「我唔識得你哋所講嗰個人!」

72 就喺嗰時,雞第二次啼;彼得就記起耶穌對佢講過話:「雞啼兩次之前,你會三次唔認我。」佢就忍唔住痛哭起嚟。