馬可福音 3
醫好手枯乾嘅病人1 耶穌又入會堂;嗰處有一個人一隻手枯乾咗。
2 有啲人想搵耶穌嘅錯處嚟控告佢;佢哋喺旁邊窺伺,睇佢喺安息日醫唔醫病。
3 耶穌對嗰個手枯乾嘅病人話:「你到前面嚟,」
4 然後問眾人:「關於安息日,我哋嘅律法係點樣規定?做好事吖,抑或做壞事?救命吖,抑或害命?」眾人一聲都唔出。
5 耶穌怒目周圍睇吓佢哋,同時心裏為呢啲人悲傷,因為佢哋嘅心腸剛硬。於是對嗰個病人話:「伸直隻手!」個人一伸,手就好返。
6 法利賽人從會堂出嚟後立刻同希律黨人商量要點樣除滅耶穌。
湖邊嘅羣眾7 耶穌同門徒離開嗰處去加利利湖邊,一大班人跟住佢。佢哋係由加利利、猶太、
8 耶路撒冷、以土買、約但河對岸等地區及推羅同西頓附近嘅城市嚟嘅。呢一大羣人嚟搵耶穌係因為佢哋聽見耶穌所做嘅一切事。
9 因為人太多,耶穌吩咐門徒準備一隻細船,免致人羣擁擠佢。
10 因為佢醫好好多病人,所有患病嘅人都逼近佢,想摸佢。
11 嗰啲被鬼迷嘅人一睇見佢,就俯伏喺佢面前,叫話:「你係上帝之子!」
12 耶穌嚴厲囑咐佢哋唔好講出佢係邊個。
耶穌揀選十二使徒13 耶穌上一座山,隨自己意思召集人到佢面前。佢哋嚟咗之後,
14 耶穌選出十二人,稱佢哋做使徒,又對佢哋話:「我揀選你哋,要你哋時常同我喺埋一齊,又要打發你哋出去傳道;
15 你哋會有趕鬼嘅權力。」
16 耶穌所揀選嘅十二人係:西門(耶穌又幫佢改名彼得),
17 西庇太嘅仔雅各同雅各嘅細佬約翰(耶穌又改佢名半尼其,意思係「性如暴雷嘅人」)
18 安得烈,腓力,巴多羅買,馬太,多馬,亞勒腓嘅仔雅各,達太,激進黨嘅西門,
19 同後來出賣耶穌嘅加略人猶大。
耶穌同別西卜20 耶穌返到屋裏;一大班人又嚟聚集,甚至佢同門徒連食飯嘅時間都冇。
21 耶穌家中嘅人知此情形,出嚟阻止佢,因為有人話:「佢發癲嘅!」
22 有啲從耶路撒冷落嚟嘅經學教師話:「佢被別西卜所迷!佢係靠鬼王趕鬼嘅!」
23 耶穌將呢啲人叫到佢面前,用比喻對佢哋話:「撒旦點能驅逐撒旦呢
24 一個國自相紛爭,嗰個國必然企唔住。
25 一個家自相紛爭,個家亦必然破碎。
26 假如撒旦嘅國自相紛爭,佢就企唔住,終必滅亡。
27 冇人能入武士家中,奪取佢嘅財物;佢必須先將武士綁起致能洗劫佢嘅家。」
28 「我實在話你哋知,人所犯一切嘅罪同所講一切毁謗嘅話都可以得到赦免;
29 但係褻瀆聖靈嘅人就永遠得唔到赦免,因為佢犯嘅係永遠嘅罪。」
30 (耶穌講呢啲話係因為有人話:「佢係被鬼所迷嘅。」)
耶穌嘅母親同兄弟31 嗰時,耶穌嘅母親同細佬嚟;佢哋企喺外邊,託人傳話俾耶穌知,話佢哋想見佢。
32 有一班人圍坐喺耶穌身邊;佢哋對佢話:「睇吓,你嘅母親同細佬喺外邊搵你呀!」
33 耶穌話:「邊個係我嘅母親?邊個係我嘅兄弟?」
34 佢周圍睇吓坐佢周圍嘅人,話:「你哋睇,呢啲人就係我嘅母親,我嘅兄弟!
35 凡實行上帝旨意嘅人就係我嘅兄弟、姊妹,同母親。」