Library · yue

馬可福音 4

撒種嘅比喻

1 耶穌又喺加利利湖邊教導人。有好多人集合去佢面前,致令佢要落船坐。船喺湖上,羣眾靠近湖企喺岸上。

2 耶穌用比喻教導佢哋好多道理。在教導之間,對佢哋話:

3 「你哋留心聽!有一個撒種嘅出去撒種。

4 撒種時,有啲落喺路邊,飛鳥嚟食。

5 有啲落喺淺土嘅石地,因為泥土唔深,發苗好快,

6 日頭一出,幼苗就曬乾,又因為根唔夠深,就枯乾咗。

7 有啲落喺荊棘裏,荊棘生起嚟,將幼苗逼住,不能結出果實。

8 有啲落喺好嘅呢土,就長大結實,收成有三十倍,六十倍,一百倍。」

9 耶穌又話:「有耳可聽嘅,就應當聽!」

比喻嘅目的

10 耶穌獨自喺處時,有啲聽過佢講論嘅人同十二門徒一齊嚟見佢,要求佢解釋呢啲比喻嘅意思。

11 耶穌話:「上帝國嘅奧祕淨係俾你哋知道;至於外界嘅人,凡事就用比喻。

12 正如聖經所講:佢哋睇咗又睇,但睇唔見,聽咗又聽,但唔明白;若唔係,佢哋回心轉意,上帝就赦免佢哋。」

解釋撒種嘅比喻

13 耶穌又問佢哋:「你哋唔明白此比喻咩?噉樣,你哋點能明白其他比喻呢?

14 撒種嘅人撒嘅係上帝嘅信息。

15 有啲人好似撒落喺路邊嘅;佢哋聽咗信息,撒但立刻嚟,將撒喺佢哋心中嘅信息奪去。

16 另外有啲人好似落喺石地上嘅;佢哋聽見信息即時樂意接受,

17 但係扎根唔深,唔能持久,一旦為信息而遭遇困難或迫害,即時放棄。

18 再有啲人好似撒喺荊棘裏嘅;佢哋聽咗信息之後,

19 生活嘅憂慮、財富嘅誘惑,同其他各種慾望入嚟窒息信息嘅生機,不能結出果實。

20 但係,有啲人好似撒喺好泥土嘅;佢哋聽見信息,領受咗,又結出果實,收成有三十倍,六十倍,一百倍。」

斗底下嘅燈

21 耶穌又話:「有邊個點燈,會放喺斗下或床下呢?佢豈唔係將佢放喺燈臺上咩?

22 任何隱藏嘅事總會被張揚出嚟;任何掩蓋嘅事亦會被揭露出嚟。

23 有耳可聽嘅,就應當聽!」

24 佢又對佢哋講:「要留心你哋所聽嘅!你哋用乜嘢尺度衡量人,上帝亦用同樣嘅尺度衡量你哋,甚至更加嚴格。

25 嗰啲有嘅,要俾更多佢;冇嘅,連佢所有嘅都要攞走。」

種子長大嘅比喻

26 耶穌繼續話:「上帝國好似一個人撒種喺地上。

27 佢夜晚瞓覺,日頭起身,種子發芽生長,點解會噉樣,佢唔知。

28 泥土使植物生長、結果係自然嘅,先發芽,後長穗,最後穗上結滿穀。

29 農作物成熟,用鐮刀收割,因為收成嘅時候到咗。」

芥菜種嘅比喻

30 耶穌問:「我哋話上帝國好似乜嘢呢?我哋用乜嘢比喻嚟表明佢呢?

31 上帝國好比一粒芥菜種,係世上最小嘅種。有人將佢種落地,

32 長大起嚟,比各種蔬菜大;佢生出大枝,飛鳥亦喺佢蔭下棲宿。」

33 耶穌用好多類似嘅比喻向羣眾講道,照佢哋所能明白嘅教導佢哋。

34 佢總係用比喻對佢哋講論;但係佢單獨同門徒喺埋一齊時,就向門徒解釋一切。

耶穌平息風浪

35 嗰晚,耶穌對門徒話:「我哋過湖去對岸。」

36 於是佢哋離開羣眾。耶穌仍然喺船上,門徒上船同佢去;另外有其它船一齊去。

37 湖上忽然打起大風,波浪沖擊,浪打入船,船幾乎灌滿水。

38 當時耶穌喺船尾,枕住枕頭瞓咗。佢哋叫醒佢,話:「老師,我哋快死啦,你唔在乎咩?」

39 耶穌起身,命令風:「止息喇!」又吩咐浪:「平靜喇!」風就止息,湖面就平靜落嚟。

40 於是對門徒話:「做乜咁冇膽呢,你哋重未有信心咩?」

41 佢哋就非常驚慌,彼此講話:「呢個人究竟係邊個呢,連風浪都聽從佢!」