Library · yue

馬可福音 5

耶穌醫好被鬼迷嘅人

1 佢哋嚟到加利利湖嘅對岸,屬於格拉森人嘅地區。

2 耶穌一上岸就遇見一個由墳墓出嚟嘅人;呢個人被邪鬼所迷。

3 一向住喺墳地,冇人能控制佢,用鐵鍊亦鎖唔住佢。

4 好多次人用腳鐐手銬鎖住佢,但佢打碎腳鐐,扭斷手銬。冇人有夠大嘅氣力制伏佢!

5 佢日夜喺墳地同山野大叫,又拎石擊傷自己。

6 佢遠遠睇見耶穌,立刻走過嚟,跪喺耶穌面前,

7 大聲叫:「至高上帝之子耶穌,你點解嚟干擾我呢?我指住上帝求你,唔好折磨我!」

8 (佢講呢啲話係因為耶穌已經吩咐佢話:「邪鬼,由嗰個人身上出嚟!」)

9 耶穌問佢:「你叫乜名?」佢答話:「我名叫『大羣』,因為我哋數目眾多!」

10 佢再三哀求耶穌唔好趕佢哋離開嗰處。

11 喺附近山坡有大羣豬食緊嘢;

12 邪鬼就求耶穌話:「將我哋趕入豬羣,等我哋喺豬裏面。」

13 耶穌准佢哋;邪鬼就從嗰個人身上出嚟,入去豬羣;成羣豬衝落山崖,跳入湖,浸死,豬嘅數目約有二千。

14 看豬嘅人走去將此消息報告俾城裏同周圍鄉村嘅人知,眾人出嚟睇吓究竟發生乜嘢事。

15 佢哋去耶穌處,睇見以前被鬼羣迷嘅人坐係處,着好衣服,神智清醒,就好驚慌。

16 睇見呢啲事經過嘅人,將發生喺被鬼迷嘅人身上同豬羣嘅事話俾眾人知。

17 佢哋就求耶穌離開佢哋嘅地區。

18 耶穌上船時,嗰個曾被鬼迷嘅人嚟求耶穌話:「請准我跟從你。」

19 耶穌唔答應,反而對佢話:「你回家話俾親友知,主點樣以慈愛待你,同佢為你所做嘅事。」

20 個人走咗,開始喺低加波利地區傳揚耶穌喺佢身上所做嘅事;聽見嘅人無不驚奇。

睚魯嘅女同患血漏嘅女人

21 耶穌又坐船過湖去對岸;喺湖邊有一大班人喺佢面前聚集。

22 當地一個會堂主管名睚魯亦嚟。佢一見耶穌就俯伏喺佢腳前,

23 懇切求佢:「我嘅細女病重就嚟死,請你嚟為佢按手,醫好佢,救佢一命!」

24 耶穌就同佢一齊去。好多人跟住,逼住佢。

25 有個女人患咗十二年血漏,

26 睇過好多醫生,受盡好多痛苦,用盡所有嘅家產;但係佢嘅病不但冇起色,反而一日比一日沉重。

27 佢聽見耶穌嘅事,嚟雜喺人羣中,走到耶穌背後,摸佢嘅衣服,

28 心想:「我一摸佢嘅衣服,就必得到醫治。」

29 佢嘅血漏立刻止住,感覺身上嘅病已經好返。

30 耶穌立刻知道有能力從佢身上出嚟,就喺眾人中轉過來,話:「邊個摸我嘅衣服?」

31 佢嘅門徒答話:「咁多人逼住你,點解問邊個摸你呢?」

32 但係耶穌周圍睇吓,要知道係邊個摸佢。

33 個女人知道發生喺自己身上嘅事,就戰戰兢兢跪喺耶穌腳前,將實情講出嚟。

34 耶穌對佢話:「女呀,你嘅信心救咗你!平安返去喇,你嘅病痛消除咯。」

35 耶穌正在講呢啲話時,有人由會堂主管嘅家趕嚟,話俾睚魯知:「你嘅女已經死,何必再麻煩老師呢?」

36 耶穌聽到佢哋所講嘅話,就對會堂主管話:「唔使怕,只要信。」

37 於是佢帶彼得、雅各,同雅各嘅細佬約翰一齊去,唔准其他人跟住。

38 佢哋嚟到會堂主管嘅家裏,耶穌睇見眾人好混亂,又喊又叫。

39 耶穌入去對佢哋話:「你哋點解咁嘈哭啼呢?個女並冇死,只係瞓着。」

40 佢哋就譏笑佢,耶穌將佢哋趕出去,只准女仔嘅父母同佢嘅三個門徒跟佢入女仔嘅睡房。

41 佢拉住女仔嘅手,對佢話:「大利大,古米!」意思係:「小女孩,我吩咐你,起身!」

42 女仔立刻起身行(嗰時佢已經十二歲)。呢啲事使眾人非常驚奇!

43 耶穌鄭重囑咐佢哋唔好向人宣揚,又吩咐俾嘢過女仔食。