Library · yue

馬可福音 6

拿撒勒人厭棄耶穌

1 耶穌離開嗰處,返到自己嘅家鄉,佢嘅門徒亦同佢一齊嚟。

2 安息日,佢喺會堂教導人。好多人聽見佢嘅話都好驚奇,話:「佢從邊處得到呢啲本領呢?邊個俾佢呢種智慧呢?佢居然重能行神蹟!

3 佢豈唔係木匠咩?唔係馬利亞嘅仔,雅各、約西、猶太,西門嘅大哥咩?」佢幾個妹唔係喺我哋處咩?」噉就厭棄佢。

4 耶穌對佢哋話:「除本鄉、本族、本家外,先知冇話唔受人尊敬嘅。」

5 所以,佢喺自己嘅家鄉冇行乜嘢神蹟,只係按手喺一啲病人身上,醫好佢哋。

6 因呢啲人唔信,佢非常詫異。

耶穌打發十二門徒

7 耶穌繼續喺附近各鄉村教導人。佢召集十二個門徒,打發佢哋兩個兩個出去。俾佢哋驅逐邪鬼嘅權力,

8 同時吩咐佢哋話:「喺旅途上除咗一枝拐杖,乜嘢都唔使帶;唔使帶食物,同旅行袋,亦唔使帶錢,

9 腳上着一對鞋,亦唔需要兩件內衣。」

10 又對佢哋話:「你哋到一處,邊一家願意接待你哋,就住喺嗰家,直到你哋離開嗰處。

11 無論到乜嘢地方,若當地嘅人唔接待你哋,唔聽你哋嘅話,你哋就離開嗰處,將腳上嘅塵都拍去,表示對佢哋嘅警告。」

12 門徒就出去傳道,勸人離棄罪惡。

13 佢哋又趕走好多鬼,用油搽好多病人,醫好佢哋嘅疾病。

施洗約翰嘅死

14 關於耶穌嘅一切事希律王都聽到,因為耶穌嘅名聲傳遍各地。有人話:「佢係施洗約翰從死者中復生,所以有行神蹟嘅權力。」

15 有人話:「佢係以利亞。」亦有人話:「佢係個先知,好似古時先知中嘅一位。」

16 希律聽見,就話:「佢係我所斬嘅施洗約翰,佢從死者中復生咯!」

17 希律曾下令捉約翰,將佢綁起,鎖喺監裏。希律噉做係為討好希羅底,因為希律娶咗佢兄弟腓力嘅妻希羅底。

18 約翰多次指責佢:「你佔有兄弟嘅妻係唔合理嘅!」

19 所以希羅底對約翰懷恨在心,想殺佢,但係不能如願。

20 希律怕約翰,知佢係一個正真聖潔嘅人,要保護佢。希律每次聽約翰講論,都非常不安,不過佢仍然喜歡聽佢談論。

21 希羅底所盼望嘅機會終於嚟到。希律生日,舉行盛大宴會招待政府顯要、文武官員,同加利利民間嘅領袖。

22 宴會間,希羅底嘅女出嚟跳舞;希律同賓客都賞心悅目。於是王對佢話:「無論你向我求乜嘢,我都俾你。」

23 跟住又發誓話:「無論你求乜嘢,就算係我江山嘅一半,我都俾你!」

24 個女出去問佢母親:「我應該求乜嘢呢?」佢母親答話:「施洗約翰嘅頭。」

25 個女立刻返嚟見王,請求話:「求王立刻將施洗約翰嘅頭放喺盤上,俾我!」

26 王聽見呢個請求,非常苦惱;但係佢已經喺賓客前發誓,冇辦法拒絕個女嘅請求。

27 於是佢命令侍衛去拎約翰嘅頭。侍衛出去,到監裏,斬咗約翰嘅頭,

28 放喺盤上,帶嚟俾希羅底嘅女;個女拎去交俾佢母親。

29 約翰嘅門徒聽見呢啲消息,就嚟將約翰嘅屍體領去,葬喺墳墓。

耶穌俾五千人食飽

30 使徒返嚟見耶穌,將佢哋所做所傳嘅一切都向佢報告。

31 因為來往嘅人太多,耶穌同門徒連食飯嘅時間都冇,所以耶穌對佢哋話:「你哋同我靜靜到偏僻嘅地方休息一陣。」

32 於是佢哋坐船,靜靜去偏僻嘅地方。

33 但係,好多人見佢哋離開,立刻認出佢哋。就由各城出嚟,爭先恐後趕路,比耶穌同門徒先到嗰處。

34 耶穌一上岸,見呢一大班人,就憐憫佢哋,因為佢哋好似冇牧人嘅羊羣。佢就用好多話教導佢哋。

35 挨晚時,門徒嚟見佢,對佢話:「夜喇,呢處又係偏僻嘅地方,

36 請叫眾人散開,去附近嘅鄉村買嘢食。」

37 耶穌話:「你哋俾佢哋食喇。」佢哋問:「你要我哋去買二十兩銀嘅餅嚟俾佢哋食咩?」

38 耶穌對佢哋話:「去睇吓你哋有幾多個餅?」佢哋查過之後話:「五個餅同兩條魚。」

39 耶穌吩咐門徒叫羣眾一組一組坐喺草地上。

40 眾人坐低,有一百人一組,有五十人一組。

41 耶穌拎起五個餅同兩條魚,舉目望天,感謝上帝,然後擘開餅,遞俾門徒;門徒就分俾眾人。同樣,佢將兩條魚亦分俾眾人。

42 眾人都食飽,

43 門徒將食剩嘅餅同魚裝滿十二籃。

44 食飽嘅人淨係男人就有五千。

耶穌喺水上面行

45 事後,耶穌隨即催門徒上船,先過對岸嘅伯賽大,等佢散開羣眾。

46 佢送走佢哋就上山禱告。

47 到夜晚,船已經開到湖中,耶穌自己留喺岸上。

48 佢睇見門徒搖船非常辛苦,因為船逆風。近天光時,耶穌喺湖上行到門徒處,想由佢哋旁邊經過。

49 門徒見佢喺湖面行,以為係鬼,就驚叫起來;

50 因為佢哋睇見佢,都非常驚慌。耶穌立刻對佢哋話:「放心,係我,唔使怕!」

51 於是佢上船,同佢哋一齊,風就停息。門徒又驚奇又困惑,

52 因為佢哋重未了解分餅事嘅意義;佢哋嘅思想遲鈍。