Library · yue

馬可福音 7

祖先嘅傳統

1 法利賽人同由耶路撒冷嚟嘅經學教師一齊嚟見耶穌。

2 佢見耶穌嘅門徒有啲用唔潔淨嘅手食飯一即係冇好似法利賽人噉樣先洗手。

3 (原來法利賽人同一般猶太人都遵守祖先嘅傳統,若唔按規定嘅方法洗過手就唔食飯;

4 由街上買嚟嘅嘢若唔先洗過亦唔食。佢哋重遵守好多其他傳統嘅規例如點樣洗杯,洗鍋,洗銅器同床鋪。)

5 所以法利賽人同經學教師問耶穌:「點解你嘅門徒唔遵守祖先嘅遺訓,竟然用唔潔淨嘅手食飯呢?」

6 耶穌話:「以賽亞指你哋假冒為善嘅人所講嘅預言係啱嘅;佢話:上帝噉樣話:呢啲人用口尊敬我,但佢哋嘅心遠離我。

7 佢哋竟將人嘅規例當做我嘅命令;佢哋敬拜我都係枉然!」

8 耶穌話:「你哋遵守人嘅遺訓,放棄上帝嘅命令。」

9 佢又話:「你哋真係放棄上帝嘅命令,而拘守傳統。

10 摩西命令你哋:『要孝敬父母』;又規定:『咒罵父母嘅,要受死刑。』

11 你哋偏偏話,若有人將奉養父母嘅嘢當做『各耳板』(意思係獻俾上帝嘅禮物),

12 佢就唔使奉養父母。

13 你哋噉樣做,等於拎你哋傳授俾人嘅傳統嚟抵消上帝嘅話。你哋重做咗好多類似嘅事。」

使人唔潔淨嘅嘢

14 耶穌再一次召集羣眾到佢面前,對佢哋話:「你哋眾人都要聽我嘅話,亦要明白。

15 從外面入到人裏面嘅唔會使人唔潔淨;從人裏面出嚟嘅致會使人唔潔淨。」

16 (有啲古卷加16節「有耳可聽嘅,就應當聽!」)

17 耶穌離開羣眾入屋時,門徒問佢呢個比喻嘅意思。

18 耶穌對佢哋話:「你哋亦同佢哋一樣唔明白咩?你哋唔知道?從外面入到人裏面嘅唔會使佢唔潔淨咩?

19 因為從外面入去嘅唔係入去佢嘅心,係到佢嘅肚,然後排泄出嚟。)(耶穌講呢啲話意思係指一切食物都係潔淨嘅。)

20 佢繼續話:「使人唔潔淨嘅係從人裏面出嚟嘅。

21 因為從人心裏出嚟嘅有種種惡念;指使佢去犯通姦、偷盜、兇殺、

22 淫亂、貪心、邪惡、詭詐、放蕩、嫉妒、毀謗、驕傲、狂忘等罪。

23 呢一切嘅邪惡都係從人裏面出嚟而真正使人唔潔淨嘅。」

一個女人嘅信心

24 耶穌離開嗰處,去靠近推羅城嘅地區。住喺一家,唔想人知,但係隱藏唔住。

25 有個女人,佢女被鬼所迷。佢聽見耶穌嘅事,立刻嚟見佢,跪喺佢腳前。

26 呢個女人係一個異邦人,屬利腓尼基族。佢求耶穌將佢女身上嘅鬼趕出。

27 耶穌對佢話:「先俾仔女食飽;拎仔女嘅食物扔俾狗食係唔啱嘅。」

28 個女人答話:「主呀,冇錯,但係檯下嘅狗亦食仔女剩低嘅零碎呀!」

29 耶穌對佢話:「因為呢句話,你可以返去;鬼已經由你嘅女身上出去咯!」

30 於是女人返屋企,見個女瞓喺床上;鬼已經離開佢。

耶穌醫好一個聾啞嘅人

31 耶穌離開推羅附近地區,經過西頓,由低加波利境界返到加利利湖。

32 有人將一個又聾又啞嘅人帶到耶穌面前,請耶穌為佢按手。

33 耶穌將佢從人羣中帶出嚟,到一邊,用手指探入佢耳,又用口水搽喺佢條脷上。

34 耶穌抬頭望天,歎一口氣,對個人話:「以法大!」意思係張開!

35 個人嘅耳立刻開咗,條脷亦鬆咗,佢就開口講話,毫無困難。

36 耶穌吩咐眾人千祈唔好向人提起呢件事;但係佢越係囑咐,佢哋越發傳揚。

37 所有聽見嘅人都非常驚奇;話:「佢所做嘅事極好!佢甚至使聾嘅聽見,啞嘅講話!」