路加福音 22
殺死耶穌嘅陰謀1 除酵節(又叫逾越節)快到。
2 祭司長同經學教師因懼怕羣眾,就想法子秘密殺耶穌。
猶大同意出賣耶穌3 嗰時,撒但入去加略人猶大嘅心。(猶大係耶穌十二門徒之一。)
4 猶大去同祭司長及聖殿嘅警衛官商量,點樣可以將耶穌交過佢哋。
5 佢哋好歡喜,又答應俾錢過佢。
6 猶大同意,開始搵機會,喺羣眾唔知情時將耶穌交俾佢哋。
預備逾越節嘅晚餐7 除酵節,即係要劏逾越節羔羊嗰日到咗。
8 耶穌打發彼得同約翰出去,吩咐佢哋話:「你哋去為我哋預備逾越節嘅晚餐。」
9 佢哋就問:「你要我哋喺邊處預備呢?」
10 耶穌話:「你哋入城,會遇見一個人,拎住一埕水,你哋跟住佢,到佢入去嗰間屋,
11 問嗰家嘅主人話:『老師問,佢同門徒食逾越節晚餐嘅嗰間客房喺邊處?』
12 佢會帶你哋睇樓上一間佈置好嘅大房;你哋就喺嗰處預備。
13 佢哋去,所遇見嘅正同耶穌所講嘅一樣,佢哋就預備逾越節嘅晚餐。
主嘅晚餐14 晚餐嘅時間到,耶穌坐席;使徒同佢一齊坐。
15 佢對佢哋話:「我一直盼望喺受難前同你哋一齊食呢個逾越節嘅晚餐。
16 我話你哋知,我唔再食此晚餐,直到此意義成就在上帝國裏。」
17 於是耶穌拎起隻杯,向上帝感謝,話:「你哋拎呢隻杯,眾人分開飲。
18 我話你哋知,從今以後,我唔再飲此葡萄汁,直等到上帝國嚟到。」
19 然後佢拎起餅,向上帝感謝,擘開,分俾佢哋,話:「呢啲係我嘅身體,為你哋捨嘅,你哋要噉樣做嚟記念我。」
20 飯後,佢照樣拎起杯,話:「此杯係上帝嘅新約,係用我為你哋流出嘅血設立嘅。」
21 「睇吓,嗰個出賣我嘅人與我同檯!
22 人子固然要照上帝所安排嘅去世,但出賣佢嘅人有禍咯!」
23 佢哋彼此追問:「做呢件事嘅人到底係邊個呢?」
門徒爭論邊個最大24 門徒發生爭論,究竟佢哋中邊個算係最大嘅。
25 耶穌對佢哋話:「世上嘅君王有管轄人民嘅權力,而統治者被尊稱為救星;
26 但係你哋唔應該噉樣。你哋中做最大嘅,應該好似年幼嘅;做領袖嘅,應該好似僕人。
27 坐喺處飲食嘅大,抑或伺候佢嘅大呢?當然係坐喺處嘅大。但係,我喺你哋中係伺候人嘅。
28 我喺試煉中,你哋始終同我喺一齊。
29 我將我父賜俾我嘅國賜俾你哋。
30 等你哋喺我嘅國裏與我同飲食,並坐喺寶座上審判以色列嘅十二支派。」
預言彼得唔認佢31 耶穌又話:「西門!西門!撒但已得到准許嚟試探你哋,好似農夫篩麥一樣嚟篩你哋。
32 但係我已經為你祈求,使你不至失去信心。你回轉歸我以後,要激勵你嘅兄弟。」
33 彼得話:「主呀,我願意同你一齊坐監,一齊死!」
34 耶穌話:「彼得,我話你知:今日雞啼以前,你會三次話你唔識我。」
錢袋、旅行袋、刀35 耶穌又對佢哋話:「從前我打發你哋出去,叫你哋唔需要帶錢袋,旅行袋或鞋,你哋有冇缺少呢?」佢哋答話:「冇。」
36 耶穌話:「現在有錢袋或旅行袋嘅,要帶住;冇刀嘅,要賣去衣服嚟買一把。
37 我話你哋知,聖經所講『佢被列喺罪犯中』嗰句話必須喺我身上實現。其實,有關我嘅一切記載必要得到應驗。」
38 門徒話:「主呀,你睇,呢處有兩把刀。」耶穌話:「夠咯!」
耶穌喺橄欖山上禱告39 耶穌出城,照常去橄欖山;門徒跟住佢去。
40 到咗嗰處,耶穌對佢哋話:「你哋要禱告,免致陷入誘惑。」
41 於是耶穌離開佢哋,喺大約扔一嚿石仔嘅距離,跪下禱告,
42 話:「父呀,若你願意,就將此杯移去;但係,唔好照我嘅意思,只要成全你嘅旨意。」
43 (有一個天使從天上向佢顯現,加強佢嘅力量。
44 喺極度傷痛中,耶穌更懇切禱告,佢嘅汗珠好似大滴嘅血滴落地。)
45 禱告之後,耶穌起身,返到門徒處,發現佢哋因憂傷過度瞓着咗。
46 佢對佢哋話:「你哋點解瞓着呢?起身,禱告喇,免致陷入誘惑。」
耶穌被捕47 耶穌喺處講話時,有一羣人嚟。十二門徒之一嘅猶大帶住佢哋,佢上前去同耶穌接吻。
48 耶穌對佢話:「猶大,你用接吻嚟出賣人子咩?」
49 跟耶穌一齊嘅門徒睇見呢種情形,就話:「主呀,我哋用刀斬佢哋可以唔可以?」
50 其中一人將大祭司嘅僕人斬咗一刀,削甩佢嘅右耳。
51 耶穌話:「唔好噉樣!」就伸手摸嗰個人嘅耳,醫好佢。
52 於是,耶穌對嗰啲嚟捉佢嘅祭司長、聖殿警衛官,同長老話:「你哋帶住刀同棍出嚟捉我,將我當做強盜咩?
53 我日日同你哋喺聖殿,你哋並冇落手捉我;現在係你哋橫行嘅時刻,黑暗當權咯。」
彼得唔認耶穌54 嗰時,佢哋捉住耶穌,拉佢到大祭司嘅家;彼得遠遠跟住。
55 佢哋喺院中透火,眾人圍住火坐,彼得亦混喺佢哋中。
56 有個女工睇見彼得坐住焙火,就定眼望住佢,話:「此人同佢係一齊嘅!」
57 彼得否認話:「女人呀,我唔識佢!」
58 過冇耐,又有人注意到佢,話:「你亦係佢哋嘅同伴!」彼得話:「人呀,我唔係!」
59 大約再過一個鐘頭,另一個人一口咬定話:「唔使問,此人同佢係一齊嘅,因為佢亦係加利利人!」
60 但彼得話:「人呀,我唔知你講乜嘢!」佢嘅話重未講完,雞就啼。
61 主轉過身嚟,睇住彼得;彼得記起主講過嘅話:「今日雞啼以前,你要三次話你唔識我。」
62 彼得就出去,忍唔住痛哭起嚟。
耶穌受戲弄侮辱63 看守耶穌嘅人戲弄佢,毆打佢。
64 佢哋蒙住佢嘅眼,問佢:「你估吓,係邊個打你?」
65 佢哋又講好多侮辱佢嘅話。
喺議會受審66 一到天光,猶太人嘅長老、祭司長,同經學教師都聚埋,將耶穌帶到佢哋嘅議會。
67 佢哋問佢:「話我哋知,你係唔係基督?」佢答話:「我若話你哋知,你哋亦唔會相信我;
68 若我問你哋乜嘢問題,你哋亦唔會回答。
69 但從今以後,人子要坐喺權能嘅上帝右邊。」
70 佢哋都話:「噉樣,你係上帝之子咩?」耶穌答話:「你哋講得對!」
71 於是佢哋話:「我哋再唔需要乜嘢證據!我哋已經聽見佢親口所講嘅!」