Library · yue

約翰福音 10

羊牢嘅比喻

1 耶穌又話:「我實在話你哋知,凡係唔從門入羊牢嘅人,由另處爬入去嘅,係賊,係強盜。

2 凡從門入去嘅,致係羊嘅牧人。

3 看門嘅為佢開門;佢嘅羊認得佢嘅聲音。佢依照名字叫自己嘅羊,帶佢哋出嚟。

4 佢將自己嘅羊帶出嚟之後,就行喺佢哋前頭;佢嘅羊就跟住佢,因為佢哋認得佢嘅聲音。

5 佢哋唔會跟陌生人,反要逃避,因為唔認得陌生人嘅聲音。」

6 耶穌對佢哋講呢個比喻,但係佢哋唔明白佢所講嘅係乜嘢意思。

好牧人耶穌

7 於是,耶穌又對佢哋話:「我實在話你哋知,我就係羊嘅門。

8 喺我之前嚟嘅係賊,係強盜;羊唔聽從佢哋。

9 我係門,凡從我入嚟嘅,就必得救,而且出入都搵到草食。

10 盜賊入嚟,無非想偷,殺害,毀滅。我嚟係使佢哋得生命,而且係豐盛嘅生命。

11 我係好牧人;好牧人願意為羊捨命。

12 雇工唔係牧人,羊亦唔係佢自己嘅。佢一見豺狼嚟,就丟低啲羊逃走;豺狼捉住羊,趕散羊羣。

13 雇工逃走,因為佢係雇工,並唔關心羊羣。

14 我係好牧人。正如父認識我,我亦認識父。同樣,我認識我嘅羊;佢哋亦認識我。我願意為佢哋捨命。

15 我重有其他嘅羊唔喺此羊牢裏,我必帶佢哋嚟;佢哋會聽我嘅聲音。佢哋兩羣要合成一羣,同屬於一個牧人。

16 拼於上節

17 我父愛我;因為我願意犧牲我嘅生命,又再得返生命。

18 冇人能奪得我嘅生命,係我自願犧牲嘅;我有權捨去,亦有權攞返。呢啲係我父命令我做嘅。」

19 猶太人又為呢啲話起紛爭。

20 佢哋中有好多人話:「佢係被鬼迷嘅!發癲嘅!何必聽佢呢?」

21 另有啲人話:「被鬼迷嘅人唔會講出噉樣嘅話!鬼能開盲人嘅眼咩?」

被猶太人棄絕

22 喺耶路撒冷,有個修殿節,係喺冬天時。

23 耶穌喺聖殿裏嘅所羅門廊行;

24 猶太人圍住佢,對佢話:「你使我哋猶疑不定到幾時呢?若你係基督,就坦白話我哋知?」

25 耶穌答話:「我已經話過你哋知,但係你哋唔信。我奉我父嘅名所做嘅事就係我嘅證據。

26 但係,你哋唔係我嘅羊,所以你哋唔信。

27 我嘅羊聽我嘅聲音,我認得佢哋;佢哋跟從我。

28 我賜永生俾佢哋,佢哋不至於死亡;無論邊個都不能從我手中將佢哋奪去。

29 我父將佢哋賜俾我,佢大過萬有,冇人能從我父嘅手中將佢哋奪去。

30 我同父係一體。」

31 嗰時,猶太人又拎起石想掟佢。

32 耶穌對佢哋話:「我喺你哋面前做咗父要我做嘅好多善事;你哋究竟為邊一件事要拎石掟我?」

33 猶太人答話:「我哋唔係為你所做嘅善事要拎石掟你,係因為你侮辱上帝!你不過係一個人,竟然將自己當做上帝!」

34 耶穌話:「你哋嘅律法書豈唔係寫落話,『上帝噉樣講:你哋係神』咩?

35 我哋知道聖經嘅話係永唔改變嘅;對嗰啲接受上帝信息嘅人,上帝尚且稱佢哋做神。

36 何況,我係父所揀選又打發到世上嚟嘅。我話我係上帝之子,你哋點解話我侮辱上帝呢?

37 若我唔做我父嘅事,你哋就唔好信我;

38 若我做,你哋雖然唔信我,亦應該相信我嘅工作,使你哋確實知道我父喺我嘅生命中,我亦喺我父嘅生命中。」

39 於是佢哋又想捉佢,但佢避開走去。

40 耶穌返到約但河嘅對岸,到約翰以前施洗嘅地方,住喺嗰處。

41 有好多人嚟搵佢,話:「約翰冇行過神蹟,但係佢指呢個人所講嘅一切話都係真嘅。」

42 喺嗰處,有好多人信耶穌。