約翰福音 11
拉撒路嘅死1 有一個患病嘅人名叫拉撒路,住喺伯大尼;馬利亞同佢嘅家姐馬大亦住喺呢條村。
2 〈呢個馬利亞係曾用香油抹主,又用自己嘅頭髪去擦乾佢腳嘅。有病嘅拉撒路係佢嘅細佬。〉
3 佢兩姊妹打發人見耶穌,話:「主呀,你所愛嘅朋友病咗。」
4 耶穌聽見就話:「拉撒路嘅病不至於死,而係要榮耀上帝,而且使上帝之子因此得榮耀。」
5 耶穌一向愛馬大同佢嘅妹及拉撒路。
6 佢聽到拉撒路有病嘅消息後,重喺所住嘅地方停留兩日。
7 然後佢對門徒話:「我哋要再去猶太。」
8 佢嘅門徒話:「老師,近來猶太人想拎石掟你,你重想去嗰處咩?」
9 耶穌話:「一日唔係有十二個鐘頭咩?人喺日間行路,就唔會跌倒,因為佢睇見世上嘅光。
10 人喺黑夜行路,就會跌倒,因為冇光喺佢處。」
11 耶穌講完,就話:「我哋嘅朋友拉撒路瞓咗,我去叫醒佢。」
12 門徒話:「主呀,若佢係瞓咗,佢會好返咯。」
13 其實,耶穌嘅意思係話拉撒路已經死咗;但佢哋以為佢講嘅係平常嘅瞓覺。
14 於是耶穌就明明對佢哋話:「拉撒路死咗;
15 為使你哋相信,我唔喺佢嗰處重好,現今我哋去睇佢。」
16 多馬〈花名雙胞胎〉對其他門徒話:「我哋同老師一齊去,同佢一齊死喇!」
復生同生命嘅主17 耶穌到伯大尼,知道拉撒路已經喺四日前埋葬。
18 伯大尼離耶路撒冷唔夠三公里;
19 有好多猶太人嚟探馬大同馬利亞,為佢哋細佬嘅死嚟安慰佢哋。
20 馬大聽見耶穌嚟咗,就出去迎接佢;但馬利亞仍然坐喺屋裏。
21 馬大對耶穌話:「主呀,你若早喺呢處,我細佬就唔會死!
22 但係我知道,甚至現今,你對上帝求乜嘢,佢必賜俾你。」
23 耶穌話:「你細佬必會復生。」
24 馬大話:「我知道喺末日佢必會復生。」
25 耶穌話:「復生在我,生命亦在我。信我嘅人,雖然死咗,亦必復生;
26 凡在生信我嘅人必永遠唔死。你信唔信呢啲呢?」
27 馬大答話:「主呀,我信!我信你係嗰位要嚟世上嘅基督─上帝之子。」
耶穌流淚28 馬大講完呢啲話,就返去,靜靜對佢細妹馬利亞話:「老師嚟咗,佢叫你。」
29 馬利亞一聽見,就即刻起身,去見耶穌。
30 〈當時耶穌重未入村,重喺馬大迎接佢嘅地方。〉
31 喺屋裏安慰馬利亞嘅猶太人睇見佢急忙起身出去,就跟住佢,以為佢去墳墓處哭。
32 馬利亞嚟到耶穌處,一見佢,就俯伏喺佢腳前,話:「主呀,若你喺呢處,我細佬就唔會死喇!」
33 耶穌睇見馬利亞哭,又睇見同佢一齊嚟嘅猶太人亦哭,心裏非常悲傷,又好難過,
34 就問佢哋:「你哋將佢葬喺邊處?」佢哋答話:「主呀,請嚟睇。」
35 耶穌就流眼淚。
36 所以猶太人話:「你睇, 佢幾咁愛呢個人!」
37 但有人話:「佢開過盲人嘅眼,唔通佢不能使拉撒路唔死咩?」
使拉撒路復生38 耶穌心裏又非常悲傷。佢嚟到墳墓前;墳墓係一個洞,入口處有石塞住。
39 耶穌吩咐:「將石搬開!」死者嘅家姐馬大話:「主呀,佢已經葬咗四日,屍體都發臭咯!」
40 耶穌對佢話:「我唔係同你講過,你若信,就會睇見上帝嘅榮耀咩?」
41 於是佢哋移開石。耶穌舉目望天,話:「父呀,我感謝你,因為你已經聽我。
42 我知道你時常聽我;但係我噉講係為周圍嘅人,俾佢哋信係你打發我嚟嘅。」
43 講完,就大聲叫:「拉撒路,出嚟!」
44 個死人就出嚟;佢嘅手腳包住布條,面上亦包住布。耶穌吩咐佢哋話:「解開佢,俾佢行!」
殺害耶穌嘅陰謀45 好多嚟探馬利亞嘅猶太人睇見耶穌所做嘅事,就信佢。
46 但亦有人去法利賽人處,將耶穌所做嘅事向佢哋報告。
47 於是,祭司長同法利賽人召開議會,喺會上話:「此人行咁多神蹟,我哋應該點樣做呢?
48 若我哋俾佢噉樣搞落去,眾人都會信佢,羅馬人就會嚟奪取我哋嘅聖殿同民族!」
49 佢哋中有一人名叫該亞法,係當年嘅大祭司。佢發言話:「你哋乜嘢都唔知!
50 一個人替全部百姓死,免致成個民族被消滅。唔通你哋冇諗到噉樣對你哋係一件有益嘅事咩?」
51 其實,佢噉講唔係出於佢自己;只因佢係當年嘅大祭司,預言耶穌將替猶太人死,
52 唔止替佢哋死,而且亦將分散喺各地上帝嘅仔女都召集埋一齊,合成一羣。
53 由嗰日起,猶太人嘅領袖就計劃殺害耶穌。
54 所以耶穌唔喺猶太地區公開活動。佢去一個近住曠野、叫做以法蓮嘅市鎮,喺嗰處同門徒一齊住。
55 猶太人嘅逾越節快到。有好多人由鄉下上去耶路撒冷,想喺節前守潔淨禮。
56 佢哋到處搵耶穌;眾人企喺聖殿裏,彼此講話:「你哋認為點樣,佢嚟過節呢!」
57 祭司長同法利賽人早已下命令:若有人知道耶穌喺邊處,必須報告,等佢哋去捉佢。