約翰福音 9
醫好生嚟盲眼嘅1 耶穌喺路上睇見一個生嚟就盲眼嘅人。
2 佢嘅門徒問佢:「老師,呢個人生嚟就盲眼,係邊個嘅罪造成嘅呢?係佢自己嘅罪,抑或係佢父母嘅罪呢?」
3 耶穌答話:「佢盲眼同佢自己或佢父母嘅罪都冇關係,係要喺佢身上彰顯上帝嘅能力。
4 趁住白日,我哋要做打發我嚟嗰位嘅工作;黑夜一到,就冇人能工作。
5 我喺世上時,我就係世上嘅光。」
6 講完呢啲話,耶穌吐口水喺地,用嚟調和的泥,搽喺盲人嘅眼,
7 又對佢話:「你去西羅亞池洗。」〈西羅亞嘅意思係:「受打發」。〉佢就去洗,返嚟時,就睇得見。
8 佢嘅鄰居同經常睇見佢喺處乞飯嘅人話:「呢個唔係一向坐喺呢處乞飯嘅人咩?」
9 有啲話:「係佢。」亦有啲話:「唔係,不過好似佢。」嗰個人自己話:「我就係佢。」
10 佢哋問:「你嘅眼係點樣開嘅呢?」
11 佢答話:「一個名叫耶穌嘅,調和的泥搽我嘅眼,對我話:『你去西羅亞池洗。』我去,一洗就睇見咯。」
12 佢哋問:「嗰個人喺邊處?」佢答話:「我唔知道。」
法利賽人查究盲人嘅事13 佢哋帶嗰個以前係盲眼嘅人去見法利賽人。
14 耶穌調和的泥開佢眼嗰日係安息日。
15 法利賽人又一次盤問嗰個人係點樣睇得嘅。佢答話:「佢用泥搽我嘅眼,我一洗就睇見咯。」
16 有啲法利賽人話:「做噉樣事嘅人唔可能係由上帝處嚟嘅,因為佢唔守安息日。」另有人話:「一個有罪嘅人點能行噉樣嘅神蹟呢?」佢哋就因此爭論起嚟。
17 於是,法利賽人再次盤問嗰個人:「既然佢開咗你嘅眼,你話佢係點樣嘅人呢?」佢答話:「佢係一位先知。」
18 猶太人唔信佢以前係盲眼,現今睇得見;等到叫佢嘅父母嚟,
19 就問佢哋話:「此人係你哋嘅仔咩?佢係唔係生嚟就盲嘅呢?現在又點會睇得見呢?」
20 佢父母答話:「佢係我哋嘅仔,佢生嚟係盲眼嘅,呢啲我哋知道。
21 至於佢點樣會睇見,係邊個開佢嘅眼,我哋唔知。佢巳經長大,你哋去問佢,等佢自己答你哋喇!」
22 佢父母噉講係因為怕猶太人;當時猶太人已經商量好,若有人承認耶穌係基督,就將佢趕出會堂。
23 所以佢父母答話:「佢巳經長大,你哋去問佢喇!」
24 佢哋再一次叫嗰個生嚟就盲眼嘅嚟,對佢話:「你必須喺上帝面前講真話!我哋知道耶穌係一個罪人。」
25 佢答話:「佢係唔係罪人,我唔知;不過我知道一件事:我本來盲眼,現今睇得見。」
26 佢哋問:「佢幫你做咗乜嘢?點樣開你嘅眼呢?」
27 佢答話:「我已經對你哋講過,你哋唔肯聽。點解現今又要聽呢?唔通你哋亦想做佢嘅門徒咩?」
28 佢哋辱罵佢:「你係佢嘅門徒;我哋係摩西嘅門徒。
29 我哋知道上帝對摩西講嘅話;至於此人,我哋根本唔知道佢係邊處嚟嘅!」
30 佢答話:「噉就怪咯。佢開咗我嘅眼,你哋竟然唔知道佢係由邊處嚟嘅!
31 我哋知道上帝唔聽罪人嘅祈求;佢只聽敬拜佢,又實行佢旨意嘅人。
32 從創世以來,未曾聽見有人開咗生嚟係盲嘅眼。
33 除非佢係從上帝處嚟嘅,否則佢乜嘢都不能做。」
34 佢哋斥責佢:「你全身喺罪中長大嘅,居然教訓我哋咩!」於是將佢從會堂裏趕出去。
靈性嘅盲目35 耶穌聽見佢哋趕佢出會堂。就搵到佢,對佢話:「你信人子咩?」
36 佢答話:「先生,請話我知人子係邊個,等我信佢!」
37 耶穌對佢話:「你已經見到佢,現今同你講話嘅就係佢。」
38 佢話:「主呀,我信!」就向耶穌下拜。
39 耶穌話:「我為審判嚟呢個世界,使盲眼嘅,睇見;睇見嘅,反而盲眼。」
40 同佢喺處嘅法利賽人聽見,就問佢:「唔通我哋都係盲眼嘅咩?」
41 耶穌答話:「若你哋係盲嘅,你哋就冇罪;但你哋既然話『我哋睇得見』,所以,你哋仍然係有罪。