約翰福音 12
喺伯大尼受膏1 逾越節前六日,耶穌到伯大尼,係拉撒路住嘅地方〈耶穌曾經喺呢處使拉撒路復生。〉
2 有人喺嗰處為耶穌預備晚飯;馬大幫忙招待,拉撒路同其他客人同耶穌一齊食飯。
3 嗰時,馬利亞拎一斤極珍貴嘅純哪噠香油,倒喺耶穌腳上,又用自己頭髪去擦;屋裏就充滿香氣。
4 耶穌嘅一個門徒,係要出賣佢嘅加略人猶大,話:
5 「點解唔拎呢啲香油去賣得三十兩銀,嚟分俾窮人呢?」
6 佢噉樣講,唔係真係關心窮人,係因為佢係賊;佢管團體嘅錢,經常盜用公款。
7 但係耶穌話:「由得佢喇!呢啲係佢留低為我安葬嗰日用嘅。
8 因為時常有窮人同你哋一齊,但係你哋唔係時常有我。」
殺害拉撒路嘅陰謀9 一大班猶太人聽講耶穌喺伯大尼,就去嗰處。佢哋不但為耶穌而去,亦係想睇吓從死裏復生嘅拉撒路。
10 所以,祭司長計劃連拉撒路亦要殺,
11 因為好多猶太人為佢嘅緣故,去信耶穌。
光榮入耶路撒冷12 第二日,一大班到耶路撒冷過節嘅人聽聞耶穌將入城。
13 佢哋就拎住棕樹枝出去迎接佢,歡呼話:「讚美上帝!願上帝賜福俾嗰位奉主名嚟嘅!願上帝賜福俾以色列嘅君王!」
14 耶穌搵到一隻驢,騎上去,正如聖經所記載嘅:
15 『鍚安城嘅女呀,唔使驚。睇吓,你哋嘅君王騎住驢仔嚟喇!』
16 呢啲事,門徒起初唔明白,等耶穌得榮耀之後致想起聖經嘅話係指佢講嘅,而且佢哋果然照所講嘅去做。
17 當耶穌叫拉撒路,從死裏復生出墳墓時,同耶穌喺一齊嘅人將佢哋所見嘅傳開。
18 好多人因聽聞佢所行嘅神蹟,就去迎接佢。
19 法利賽人彼此話:「我哋真係一事無成;你睇,全世界都跟佢去喇!」
希臘人求見耶穌20 節期中,到耶路撒冷崇拜嘅人中有啲希臘人。
21 佢哋嚟見加利利伯賽大嘅人腓力,求佢話:「先生,我哋想見耶穌。」
22 腓力去話俾安得烈知,兩人就一齊去話俾耶穌知。
23 耶穌話:「人子得榮耀嘅時候到喇。
24 我實在話你哋知,一粒麥唔落地死咗,依然係一粒;若係死咗,就結出好多咯。
25 愛惜自己生命嘅,就喪失生命;願意犧牲自己喺世上生命嘅,就保存生命到永生。
26 人若事奉我,就當跟從我;我喺邊處,我嘅僕人亦喺嗰處。事奉我嘅人,我父必尊重佢。」
耶穌講到自己嘅死27 「現今我心裏愁煩,我要講乜嘢好呢?我應該話『父呀,救我脫離呢嗰時候』咩?但我正係為呢嗰時候嚟,要經歷呢個苦難嘅時候。
28 父呀,願你榮耀你嘅名!」當聲音從天上出嚟,話:「我已經榮耀我嘅名,我要再榮耀!」
29 企喺嗰處嘅羣眾聽聞,就話:「行雷呀!」亦有人話:「有天使同佢講話!」
30 但係耶穌對佢哋話:「此聲音唔係為我,係為你哋發嘅。
31 現今呢個世界受審判;世上嘅統治者被趕逐。
32 我從地上被舉起時,就將吸引萬人嚟歸我。」
33 〈佢噉講係指自己要點樣死。〉
34 羣眾答話:「我哋嘅律法有話,基督係永存嘅;你點解話人子必被舉起呢?呢個人子係邊個呢?」
35 耶穌話:「光喺你哋中冇幾多時候喇,你哋應該趁住重有光時繼續行,免致黑暗臨到,因為喺黑暗中行嘅人唔知道去邊處。」
36 你哋應該趁住重有光時就信從個光,等你哋成為光明之子。
猶太人嘅唔信37 講完呢啲話,耶穌就離開佢哋,隱藏起嚟。佢雖然喺佢哋面前行過好多神蹟,佢哋都係唔信佢。
38 以致應驗先知以賽亞所講嘅話:『主呀,我哋所傳嘅信息有邊個信呢?主嘅權力向邊個彰顯呢?』
39 佢哋唔信,因以賽亞亦講過:
40 『上帝使佢哋嘅眼盲,使佢哋嘅心智麻木,免致佢哋嘅眼睇得見,佢哋嘅心能領悟。所以上帝話:佢哋唔會轉向我,俾我醫好佢哋。』
41 以賽亞講呢啲話係因為佢睇見耶穌嘅榮耀,指佢講嘅。
42 雖然係噉,猶太人嘅領袖中亦有好多信耶穌嘅,但因為怕法利賽人,唔敢公開承認,免致被趕出會堂。
43 佢哋喜愛人嘅讚許多過愛上帝嘅讚許。
耶穌嘅話要審判人44 耶穌大聲話:「信我嘅,唔單止信我,亦係信打發我嚟嗰位。
45 睇見我嘅,亦即係睇見嗰位打發我嚟嘅。
46 我係光,嚟到世上,使信我嘅人唔住喺黑暗裏。
47 凡聽見我嘅信息而唔遵守嘅,我唔審判佢。我嚟嘅目的唔係審判世人,係拯救世人。
48 凡拒絕我、唔接受我信息嘅人自有審判佢嘅;喺末日,我所講嘅話將審判佢!
49 因為我冇憑自己講乜嘢,嗰位打發我嚟嘅父命令我點樣講,點樣話。
50 我知道佢嘅命令會帶嚟永生。所以,我講嘅正係父要我講嘅。」