約翰福音 13
耶穌為門徒洗腳1 逾越節前,耶穌知道自己離世返去父處嘅時候快到。佢既然愛世上屬自己嘅人,就愛佢哋到底。
2 耶穌同佢嘅門徒食晚飯時,魔鬼已經將出賣耶穌嘅意思放喺加略人西門嘅仔猶大心裏。
3 耶穌知道父已經將一切權力交俾佢;佢知道自己係從上帝處嚟,又將返到上帝處。
4 於是從席位起嚟,除咗外衣,拎一條毛巾束喺腰間,
5 然後倒水喺盆裏,幫門徒洗腳,又用毛巾擦乾。
6 佢嚟到西門彼得前,彼得話:「主呀,你幫我洗腳咩?」
7 耶穌答話:「我所做嘅,你現今唔知道,日後你就會明白。」
8 彼得話:「你永不可洗我嘅腳!」耶穌話:「若我唔洗你嘅腳,你就同我冇關係。」
9 西門彼得話:「主呀,噉就唔單只洗我嘅腳,連我嘅手同頭都洗!」
10 耶穌話:「凡洗過身嘅人只要洗腳,全身就潔淨喇。你哋係潔淨嘅,但唔係個個都潔淨。」
11 因為耶穌知道邊個將出賣佢,所以佢話:「唔係個個都潔淨。」
12 耶穌洗完佢哋嘅腳,就着返外衣,然後又返到佢嘅座位。對門徒話:「我為你哋所做嘅,你哋明唔明白呢?」
13 你哋尊我為師,為主,噉樣講係冇錯嘅,因為我本來就係。
14 我係你哋嘅主,你哋嘅老師,我尚且幫你哋洗腳,你哋亦應該彼此洗腳。
15 我為你哋做咗榜樣,係要你哋照我為你哋做嘅去做。
16 我實在話你哋知,奴僕唔大得過主人,受打發嘅亦唔重要過打發佢嘅人。
17 你哋既然明白呢啲事,照住去做就有福咯!
18 我所講嘅唔係指你哋全體嚟講;我認識我所揀選嘅人。但係聖經上所講『同我一齊食飯嘅人竟然用腳踢我』呢句話必實現。
19 我喺事情重未發生之前就先話俾你哋知,等你哋到事情成就可以信我就係嗰位『自有永有』嘅。
20 我實在話你哋知,接待我所打發嘅,就係接待我;接待我嘅,就係接待打發我嚟嗰位。」
耶穌預言將被出賣21 耶穌講完呢啲話,心裏非常傷痛,就宣佈:「我實在話你哋知,你哋中有一個將出賣我。」
22 門徒彼此對望,唔知佢所講嘅係指邊個。
23 門徒中有一個係耶穌所愛嘅,佢坐喺耶穌身邊。
24 西門彼得向佢示意,話:「問吓佢,睇佢指嘅係邊個。」
25 於是嗰個門徒近耶穌,問佢:「主呀,係邊個?」
26 耶穌答話:「我將啲餅㳝吓俾邊個,就係佢咯。」於是耶穌將啲餅俾加略人西門嘅仔猶大。
27 猶大食咗,撒但就入佢心。耶穌對佢話:「你要做嘅,快去做喇!」
28 在座嘅人都唔明白耶穌為乜對佢講呢啲話。
29 因為猶大係管錢嘅,有啲門徒以為耶穌吩咐佢去買過節用嘅嘢,或係叫佢帶啲嘢去分俾窮人。
30 猶大食咗餅,就立刻出去。嗰時正係黑夜。
新嘅命令31 猶大出去後,耶穌就話:「現今人子已經得榮耀;上帝喺人子身上亦得榮耀。」
32 既然上帝喺人子身上得榮耀,佢因自己就榮耀人子,而且即時榮耀佢。
33 小子呀,我同你哋喺一齊嘅時間無多。你哋將搵我;但我去嘅地方你哋不能去,呢啲話我曾對猶太人講過,現今亦照樣對你哋講。
34 我俾一條新命令你哋:你哋要彼此相愛;我點樣愛你哋,你哋亦要點樣彼此相愛。
35 若你哋彼此相愛,世人就知道你哋係我門徒咯。」
預言彼得唔認主36 西門彼得問耶穌:「主呀,你去邊處?」耶穌答話:「我去嘅地方,你現今不能跟我去,但後來你會跟我去。」
37 彼得話:「主呀,點解現今我唔可以跟你去呢?我願意為你捨命!」
38 耶穌話:「你願意為我捨命咩?我實在話你知,雞啼以前,你會三次唔認我。」