約翰福音 14
耶穌係道路、真理、生命1 耶穌又對佢哋話:「你哋心裏唔使愁煩;你哋信上帝,亦要信我。
2 喺我父家有好多房間,我去係為你哋預備地方;若唔係,我就唔噉講。
3 我去為你哋預備地方之後,就再返嚟,接你哋去我處,等你哋同我喺埋一處。
4 我去嘅地方,嗰條路你哋係知道嘅。」
5 多馬對佢話:「主呀,我哋唔知道你去邊處,點會知嗰條路呢?」
6 耶穌話:「我就係道路、真理、生命;若不藉着我,冇人能去到父處。
7 你哋若認識我,亦會認識我嘅父。從今以後,你哋認識佢,又見過佢。」
8 腓力對耶穌話:「主呀,將父顯示俾我哋睇,我哋就滿足喇。」
9 耶穌答話:「腓力,我同你哋一齊咁耐,你重未認識我咩?人睇見我,就係睇見父。點解你重話『將父顯示俾我哋睇』呢?
10 我喺父嘅生命裏,父喺我嘅生命裏,你唔信咩?我對你哋講嘅話唔係出於我自己,而係喺我生命裏嘅父親自做佢嘅工作。
11 你哋要信我,我喺父嘅生命裏,父喺我嘅生命裏;若唔信呢啲話,亦要因我所做嘅事而信我。
12 我實在話你哋知,信我嘅人亦會做我做嘅事,甚至要做得更大;因為我到父處。
13 你哋奉我嘅名,無論向我求乜嘢,我必成全,俾父因子得榮耀。
14 你哋奉我嘅名,無論向我求乜嘢,我必成全。」
應許聖靈嘅幫助15 「你哋若愛我,就必遵守我嘅命令。
16 我將祈求父,佢就賜俾你哋另一位保惠師,永遠與你哋同在。
17 佢就係真理嘅靈。世人唔接受佢;因為佢哋睇唔到佢,亦唔認識佢。但你哋認識佢;因為佢喺你哋嘅生命裏,時常與你哋同在。
18 我唔遺落你哋做孤兒,我要再返嚟你哋處。
19 唔使幾耐,世人唔再見到我;但係你哋會見我,因為我生,你哋都生。
20 到嗰日,你哋就會知道我喺我父嘅生命裏,而你哋喺我嘅生命裏,正如我喺你嘅生命裏一樣。
21 有我嘅命令又遵守嘅,就係愛我嘅人。愛我嘅,我父必定愛佢;我亦愛佢,而且向佢顯現我自己。」
22 猶大〈唔係加略人猶大〉問:「主呀,點解只向我哋顯現,唔向世人顯現呢?」
23 耶穌答話:「愛我嘅人會遵守我嘅話。我父必愛佢,而且我父同我要去到佢嗰處,與佢同在。
24 唔愛我嘅人就唔遵守我嘅話。你哋聽到嘅話唔係出於我,係出於打發我嚟嘅父。
25 我重同你哋一齊嘅時候,已經將呢啲話講俾你哋知。
26 但係保惠師,即係父因我嘅名將打發嚟嘅聖靈,會將一切嘅事指示你哋,而且使你哋記得我對你哋講過嘅一切話。
27 我留低平安俾你哋;我將我嘅平安賜俾你哋嘅,同世人所俾嘅唔同。你哋心裏唔好愁煩,亦唔好怕。
28 你哋聽見我講過:『我去,但係重要返嚟。』若你哋愛我,你哋必會因我去父處而歡喜,因為佢比我大。
29 我喺此事發生之前先話你哋知,等你哋喺事情發生時就可以信。
30 我現今不能同你哋多講,因為呢個世界嘅統治者將嚟。佢對我係無能為力嘅;
31 但係世人應該知道我愛我嘅父,所以我遵行佢所命令嘅一切事。起身,我哋去喇!」