Library · yue

約翰福音 15

耶穌係真葡萄樹

1 「我係真葡萄樹;我父係園丁。

2 所有連接住我而唔結果嘅樹枝,佢就剪去;能結果嘅樹枝,佢就修剪,使佢結更多果。

3 我對你哋所講嘅信息巳經使你哋潔淨。

4 你哋要常同我連結,我就常同你哋連結。若唔同我連結,你哋就不能結出果實,正如枝唔同葡萄樹連接就不能結果一樣。

5 我係葡萄樹;你哋係樹枝。常同我連結嘅,我亦常同佢連結,佢必定結好多果;因為一脫離我,你哋就不能做乜嘢。

6 人若唔係常同我連結就被拋棄,好似枯乾嘅樹枝被拋棄,等人執去扔喺火裏焚燒。

7 你哋若常同我連結,而我嘅話亦常存在你哋心中,你哋無論想得乜嘢,祈求,就為你哋成就。

8 我父將因你哋結好多果實而得到榮耀,你哋亦為噉成為我嘅門徒。

9 我愛你哋如同父愛我,你哋要時常生活喺我嘅愛中。

10 你哋若遵守我嘅命令,就時常生活喺我嘅愛中,正如我遵守我父嘅命令,而常喺佢嘅愛中一樣。

11 我講呢啲事俾你哋知,係使你哋得到我嘅喜樂,而且令你哋嘅喜樂滿足。

12 你哋要彼此相愛,好似我愛你哋一樣;呢啲係我嘅命令。

13 人為朋友犧牲自己嘅性命,人間嘅愛冇比呢啲更偉大。

14 你哋若遵守我嘅命令,就係我嘅朋友。

15 我唔再將你當做僕人,因為僕人唔知道主人所做嘅事。我將你哋當做朋友,因為我已經將從我父處所聽到嘅一切都話俾你哋知。

16 唔係你哋揀選我,係我揀選你哋,而且指派你哋去結果,使你哋嘅果實常存。你哋奉我嘅名,無論向父求乜嘢,佢必賜俾你哋。

17 你哋要彼此相愛;呢啲就係我俾你哋嘅命令。」

世人嘅憎恨

18 「若世人憎恨你哋,你哋應該知道,佢哋憎恨你哋之先已經憎恨我。

19 若你哋屬世界,世界就愛屬自己嘅。但係,我從世界裏揀選你哋,因為你哋唔屬世界;所以世界憎恨你哋。

20 你哋要記住我對你哋講過嘅話:『僕人唔大得過主人。』若佢哋迫害我,亦會迫害你哋;若佢哋遵從我嘅話,亦會遵從你哋嘅話。

21 為我嘅緣故,佢哋要對你哋做呢一切嘅事,因為佢哋唔認識打發我嚟嗰位。

22 若我冇嚟過,冇教訓過佢哋,佢哋就冇罪;但現今,佢哋嘅罪無可推諉。

23 憎恨我嘅,亦憎恨我嘅父。

24 若我冇喺佢哋中做過從來冇人做過嘅事,佢哋就冇罪。事實上,佢哋已經見我所做嘅,而且重憎恨我,亦憎恨我嘅父。

25 呢啲無非係應驗佢哋律法書所寫嘅:『佢哋無緣無故憎恨我!』

26 但係,嗰位出於父嘅保惠師要嚟;即係真理嘅靈。佢嚟到,就為我作證。

27 你哋亦要為我作證,因為你哋從開始就同我一齊。