約翰福音 16
1 「我將呢啲事話俾你哋知,等你哋嘅信心不至於搖動。」
2 佢哋將你哋趕出會堂;而且時候到,凡殺害你哋嘅人重以為做呢種事係事奉上帝。
3 其實,佢哋噉樣做係因為佢哋唔認識父,亦唔認識我。
4 我將呢啲事講俾你哋知,等時候到,你哋就記得我曾對你哋講過咯。」
聖靈嘅工作5 「我當初未有將此事話俾你哋知,因為我一直與你哋同在。現今我返到打發我嚟嗰處,你哋中冇人問我你去邊處?
6 但係,因為我將此事話俾你哋知,你哋就滿心憂愁。
7 其實我去,對你哋係有益嘅;我唔去,保惠師就唔會嚟你哋處;我去,就打發佢嚟。
8 佢嚟時,就向世人證明,佢哋對於罪,對於義,對於上帝審判嘅觀念係錯嘅。
9 對罪嘅觀念係錯,因佢哋唔信我;
10 對義嘅觀念係錯,因為我去父處,你哋再見唔到我;
11 對審判嘅觀念係錯,因為呢個世界嘅王已經受審判。
12 我重有好多事要話俾你哋知,但係你哋現今擔負唔嚟。
13 等到賜真理嘅聖靈嚟到,佢就指引你哋明白一切嘅真理。佢唔係憑自己講話,係將佢所聽到嘅話俾你哋知,而且要講出將來嘅事。
14 佢將榮耀我,將我所要講嘅,話俾你哋知。
15 我父所有嘅一切都係我嘅,所以我話,聖靈要將我所要講嘅,話俾你哋知。」
憂愁同喜樂16 「等冇耐,你哋就見唔到我;再等冇耐,你哋就再要見我。」
17 門徒中有幾個彼此話:「佢話俾我哋知:『等冇耐,你哋就見唔到我;但係,再等冇耐,你哋就再要見我』;又話:『因為我去父處。』呢啲係乜嘢意思呢?」
18 亦有人問:「佢講『等冇耐』係指乜嘢呢?我哋唔知道佢講乜嘢!」
19 耶穌知道佢哋想問佢,就話:「我話:『等冇耐,你哋就見唔到我;再等冇耐,你哋就再要見我』;你哋喺處討論呢啲話咩?
20 我實在話你哋知,你哋將要痛哭哀號,世人反轉歡樂;你哋將憂愁,但係你哋嘅憂愁會變成喜樂。
21 一個女人將生產時就憂愁,因為受苦嘅時候到;但生仔之後就唔記得嗰啲痛苦,因為高興有一人生在世上。
22 你哋亦係噉樣:現今你哋有憂愁,但我將再見到你哋,你哋心裏就會充滿喜樂;你哋嘅喜樂係冇人能奪去嘅。
23 到嗰日,你哋唔向我求乜嘢。我實在話你哋知,你哋奉我嘅名,無論向父求乜嘢,佢必賜俾你哋,佢會因我嘅名而賜俾你哋。
24 直到現今,你哋並冇奉我嘅名求過乜嘢;你哋求就必得到,令你哋嘅喜樂可以滿足。」
克服世界25 「我用比喻將呢啲事向你哋講。時候將到,我唔再用比喻,將父嘅事明講俾你哋知。
26 到嗰日,你哋將奉我嘅名祈求;我唔話我將為你哋求父,
27 因為父自己愛你哋。因為你哋愛我,而且信我係從上帝處嚟嘅。
28 我從父處嚟到此世界;現今我離開此世界,返去父處。」
29 門徒對佢話:「現今你係明講,並冇用比喻。
30 現今我哋知道你無所不知,亦唔需要人問你。故此,我哋信你係從上帝處嚟嘅。」
31 耶穌話:「現今你哋信囉咩?」
32 時候將到,現在巳到,你哋要分散,各人返到自己嘅地方,只留低我獨自一人。其實,我唔係獨自一人,因為有父與我同在。
33 我將此事話你哋知,係俾你哋因同我連結而有平安。喺世上,你哋有苦難;但係你哋要勇敢,我巳經克服世界!」