約翰福音 17
耶穌為門徒禱告1 耶穌講完呢啲話,就舉目望天,話:「父呀,時候巳到,求你榮耀你嘅仔,使個仔亦榮耀你。
2 你將管理全人類嘅權柄俾佢,使佢將永生賜俾你所賜俾佢嘅人。
3 認識你係惟一嘅真神,而且認識你所打發嚟嘅耶穌基督,就係永生。
4 我巳經喺地上榮耀你;完成你所付託我嘅使命。
5 父呀!現今求你喺你自己面前榮耀我,即係我同你喺創世之前一齊享有嘅榮耀!
6 我巳經將你顯明俾佢哋,你從世界選召出嚟賜俾我嘅人。佢哋原屬於你,你將佢哋賜俾我;佢哋亦遵守你嘅話。
7 現今,佢哋都知道,你所賜俾我嘅,都係從你嗰處嚟嘅。
8 我將你所俾我嘅信息話俾佢哋知,佢哋亦領受咗。佢哋確實知道我係從你處嚟嘅,又信你打發我嚟嘅。」
9 「我為佢哋祈求;我唔為世人祈求,而係為你所賜俾我嘅人祈求,因為佢哋係屬於你嘅。」
10 我所有嘅,都係你嘅;你所有嘅,亦都係我嘅。我而且係因佢哋得榮耀嘅。
11 我現今去你處,唔再留喺世上,但佢哋仍然喺世上。聖父呀!求你因你嘅名,即係你賜俾我嘅名,保守佢哋,使佢哋合而為一,如同你同我係合一嘅。
12 我同佢哋一齊時,我因你嘅名,即係你賜俾我嘅名,保守佢哋。我保護佢哋,其中除註定滅亡嗰個人外,冇一個失落;正係應驗聖經嘅話。
13 現今,我去你處,我重喺世上時講呢啲話,俾佢哋心裏充滿我嘅喜樂。
14 我將你嘅信息話俾佢哋知;世人憎恨佢哋,因為佢哋唔屬呢個世界,正如我唔屬呢個世界一樣。
15 我唔求你從世上將佢哋帶走,但我求使佢哋脫離嗰個邪惡者。
16 正如我唔屬世界,佢哋亦唔屬世界。
17 求你用真理使佢哋將自己奉獻俾你;你嘅話就係真理。
18 正如你打發我進入世界,我亦打發佢哋進入世界。
19 為佢哋緣故,我將自己奉獻俾你,使佢哋亦真奉獻俾你。
20 我唔單止為佢哋祈求,亦為嗰啲因接受佢哋嘅信息而信我嘅人祈求。
21 願佢哋都合而為一。父呀!願佢哋喺我哋嘅生命中;正如你喺我生命中,我喺你生命中一樣。願佢哋都合而為一,使世人信我係你所打發嘅。
22 你俾我嘅榮耀,我亦俾佢哋,使佢哋合而為一,好似我哋合而為一一樣。
23 我喺佢哋嘅生命中,而你喺我嘅生命中,使佢哋完全合一,等世人知道你打發我,亦知道你愛佢哋,好似你愛我一樣。
24 父呀!你已經將佢哋賜俾我;我喺邊處,願佢哋亦同我一齊喺嗰處,俾佢哋睇見你賜俾我嘅榮耀;因為喺創世之前,你已經愛我。
25 公義嘅父呀;世人唔認識你,但我認識你。呢啲人亦知道你打發我。
26 我巳經將你顯明俾佢哋;我將會繼續噉樣做,使你對我嘅愛能喺佢哋嘅生命中生長,我亦喺佢哋嘅生命中。」