Library · yue

約翰福音 18

耶穌被捕

1 耶穌噉樣禱告後,同門徒一齊出去,過汲淪溪。嗰處有個園,耶穌同門徒入去。

2 出賣耶穌嘅猶大亦知道嗰處,因為耶穌時常同佢嘅門徒喺嗰處聚集。

3 猶大帶領一隊羅馬兵,同祭司長及法利賽人所派嘅聖殿警衛隊嚟到園中。佢哋帶住武器,亦拎住燈籠同火把。

4 耶穌知道將發生喺佢身上嘅一切事,所以上前問佢哋:「你哋搵邊個?」

5 佢哋答話:「拿撒勒人耶穌。」耶穌話:「我就係。」嗰時,出賣耶穌嘅猶大亦同佢哋企喺處。

6 耶穌一話「我就係,」佢哋就退後,跌喺地上。

7 耶穌再一次問:「你哋搵邊個?」佢哋答話:「拿撒勒人耶穌。」

8 耶穌話:「我巳經話你哋知,我就係。若你哋搵嘅係我,就由得呢啲人走喇。」

9 〈耶穌噉樣講,就應驗佢以前所講話:「父呀,你俾我嘅人,我連一個都冇失落。」〉

10 西門彼得有把刀;佢拔刀,向大祭司嘅僕人馬勒古斬去,斬甩佢嘅右耳。

11 耶穌對彼得話:「收返把刀入刀殼喇!你以為我唔願意飲我父俾我嘅苦杯咩?」

在亞那面前

12 於是嗰隊羅馬兵同隊長,及猶太人嘅聖殿警衛捉住耶穌,綁住佢,

13 先拉佢到亞那面前;亞那係當年嘅大祭司該亞法嘅岳父。

14 該亞法曾向猶太人建議,話由得一個人替全部百姓死係一件有益嘅事。

彼得唔認耶穌

15 西門彼得同另一個門徒跟住耶穌;嗰個門徒係大祭司熟悉嘅,佢跟住耶穌入去大祭司嘅院。

16 彼得留喺門外。嗰個同大祭司相識嘅門徒出嚟,對看門嘅女工講咗一聲,然後帶彼得入去。

17 嗰個看門嘅女工指住彼得,話:「你唔係嗰個人嘅門徒咩?」彼得話:「我唔係!」

18 當時天氣寒冷,僕人同警衛透起炭火,企喺嗰處取暖;彼得亦上前,同佢哋企喺處取暖。

大祭司盤問耶穌

19 大祭司盤問耶穌有關佢嘅門徒同佢嘅教導等事。

20 耶穌答話:「我對人講話一向都係公開嘅。我時常喺會堂同聖殿裏,猶太人聚會嘅場所教導人,從來冇暗中講過乜嘢。

21 你為乜事盤問我呢?去問嗰啲聽過我講話嘅人喇,佢哋知道我講過乜嘢。」

22 耶穌講完呢啲話,旁邊一個警衛一巴掌打落佢面上,話:「你竟敢噉樣答大祭司咩!」

23 耶穌話:「若我講錯,你即管指出我嘅錯處;若我嘅話係啱,你點解打我呢?」

24 嗰時耶穌重係被綁住,亞那又將佢解送去大祭司該亞法處。

彼得一再唔認耶穌

25 嗰時,彼得重企喺處取暖。有人對佢話:「你唔係嗰個人嘅門徒咩?」彼得否認話:「我唔係!」

26 有一個大祭司嘅僕人,係彼得斬甩佢耳嗰個人嘅親戚,話:「我唔係睇見你同嗰個人喺園處咩?」

27 彼得又話:「唔係!」即時,雞就啼。

喺彼拉多面前受審

28 佢哋由該亞法嘅府邸將耶穌押到總督府。嗰時天巳光。猶太人冇入總督府裏,佢哋要喺節期中保持潔淨,為要食逾越節嘅筵席。

29 於是彼拉多出嚟見佢哋,問佢哋:「你哋以乜嘢罪名控告呢個人?」

30 佢哋答話:「佢若冇做壞事,我哋就唔會將佢帶到嚟你呢處。」

31 彼拉多對佢哋話:「你哋自己將佢帶走,照你哋嘅律法審判佢好喇。」猶太人話:「但係我哋冇權判人死刑。」

32 〈噉就應驗耶穌所講過,自己將會點樣死嗰句話。〉

33 彼拉多又入去總督府,叫耶穌嚟,問佢:「你係猶太人嘅王咩?」

34 耶穌答話:「你噉問係出於你自己,抑或係聽人哋談論我呢?」

35 彼拉多話:「你以為我係猶太人咩?係你本國人同祭司長將你交俾我。你做過乜嘢事呢?」

36 耶穌話:「我嘅國唔屬呢個世界;我嘅國若屬呢個世界,我嘅臣民必為我爭戰,使我不至於落喺猶太人手中。但係,我嘅國唔屬呢個世界!」

37 彼拉多話:「噉樣,你係王咩?」耶穌答話:「我係王,你講得啱。我嘅使命係為真理作證,我為此而生,亦為此嚟到世上。凡係屬真理嘅人必聽我嘅話。」

38 彼拉多問:「真理係乜嘢?」

耶穌被判死刑

39 彼拉多又出嚟,對猶太人話:「我查唔出此人有乜嘢罪。」但係你哋有個慣例,要我喺逾越節為你哋釋放一個囚犯。你哋想唔想我為你哋釋放猶太人嘅王呢?」

40 佢哋又大叫:「唔要佢!我哋要巴拉巴!」〈巴拉巴係個兇犯。〉