約翰福音 19
1 於是,彼拉多命令將耶穌帶走,鞭打佢。
2 兵士用荊棘編成一頂華冠,戴喺佢頭上,又同佢着上紫色嘅袍。
3 佢哋上前對佢話:「猶太人嘅王萬歲!」然後用手掌打佢。
4 彼拉多又出嚟對羣眾話:「我帶佢出嚟,等你哋知道,我查唔出佢有乜嘢罪。」
5 於是耶穌出嚟,戴住荊棘嘅華冠,着住紫色嘅袍。彼拉多對佢哋話:「睇吓呢個人!」
6 祭司長同聖殿警衛一睇見耶穌,就大叫:「將佢釘十字架!將佢釘十字架!」彼拉多對佢哋話:「你哋自己帶佢去釘十字架喇。我查唔出佢有乜嘢罪。」
7 猶太人話:「我哋有律法,根據律法佢係應該死,因為佢自命為上帝之子。」
8 彼拉多聽見佢哋噉樣講,就更加驚慌。
9 佢再一次入去總督府,問耶穌:「你究竟係由邊處嚟?」但係耶穌冇回答。
10 彼拉多對佢話:「你唔答我咩?你要知道,我有權釋放你,亦有權將你釘十字架。」
11 耶穌話:「只因上帝俾呢啲權你,你致有權處置我。所以,將我交俾你嘅人嘅罪更重呀。」
12 彼拉多聽見呢啲話,愈想釋放耶穌。但係猶太人呼叫話:「你釋放佢,就唔係皇上嘅朋友!邊個自命為王,就係皇上嘅敵人。」
13 彼拉多聽見佢哋噉講,就帶耶穌出嚟,喺名叫「石砌階」〈希伯來話叫厄巴大〉嘅地方開庭審問。
14 嗰日係逾越節嘅預備日,約喺正午,彼拉多對猶太人話:「睇吓!你哋嘅王。」
15 佢哋就呼叫起來:「殺咗佢!殺咗佢!將佢釘十字架!」彼拉多問佢哋:「要我將你哋嘅王釘喺十字架上咩?」祭司長答話:「只有該撒係我哋嘅王!」
16 於是彼拉多將耶穌交俾佢哋去釘十字架。
耶穌被釘十字架17 佢哋將耶穌帶走。耶穌出嚟,孭住自己嘅十字架,到咗「髑髏岡」〈希伯來話叫各各他。〉
18 喺嗰處,佢哋將佢釘喺十字架上;另外重釘咗兩個人,一邊一個,耶穌喺中間。
19 彼拉多又寫個牌,叫人去釘喺十字架上。牌上寫:「拿撒勒人耶穌,猶太人嘅王。」
20 好多猶太人睇見牌上所寫嘅,因為耶穌被釘十字架嘅地方離城唔遠;而且呢個牌係用希伯來、拉丁,同希臘三種文字寫嘅。
21 猶太人嘅祭司長對彼拉多話:「唔好寫『猶太人嘅王』,要寫『呢個人自稱做猶太人嘅王』。」
22 彼拉多答話:「我所寫嘅,我唔改!」
23 兵士將耶穌釘十字架後,就拎佢嘅外衣分為四份,每人一份。佢哋又拎佢嘅內衣;呢件內衣冇縫線,成件係由上至下織成嘅,
24 所以,兵士彼此商量:「我哋唔好將佢撕開,我哋抽籤,睇邊個得到。」噉就應驗聖經嘅話:『佢哋分我嘅外衣,又為我嘅內衣抽籤。』兵士果然做噉樣嘅事。
25 企喺耶穌十字架旁邊嘅,有耶穌嘅母親、佢嘅姨媽、革羅罷嘅妻馬利亞,同抹大拉嘅馬利亞。
26 耶穌睇見佢母親同佢所愛嘅門徒企喺旁邊,就對佢母親話:「母親,睇吓,你嘅仔!」
27 跟住,佢又對嗰個門徒話:「睇吓,你嘅母親!」從嗰時起,嗰個門徒就接耶穌嘅母親到自己嘅家住。
耶穌嘅死28 耶穌知道一切事都已成就,為要應驗聖經上所講,就話;「我口渴。」
29 喺嗰處有一個壺,裝滿酸酒;佢哋就拎海綿浸滿酸酒,綁喺牛滕草嘅桿上,送到佢唇邊。
30 耶穌試過後就話:「成喇!」就嗚低頭,斷氣而死。
肋旁被刺31 嗰日係預備日,特別神聖嘅安息日快到。猶太人為避免安息日有屍體留喺十字架上,就去要求彼拉多叫人打斷受刑者嘅腳,然後將屍體取落嚟。
32 兵士奉命,將同耶穌一齊釘十字架嘅頭一個人同另一個人嘅腳打斷。
33 佢哋行近耶穌,見佢已經死,就冇打斷佢嘅腳。
34 但係,有一個兵士用槍㓤佢嘅肋旁,即刻有血同水流出。
35 〈呢啲係親眼睇見呢件事嘅人可靠嘅見證;佢知道佢嘅見證係真嘅,等你哋可以信。〉
36 因為此事要應驗聖經所講嘅話:『佢嘅骨連一條亦唔折斷。』
37 另外有一段經文話:『佢哋要仰望自己用槍㓤嘅人。』
耶穌嘅安葬38 呢啲事過後,有個亞利馬太人約瑟向彼拉多請求,准佢將耶穌嘅身體領去。〈約瑟係耶穌嘅門徒,因怕猶太人,唔敢公開。〉彼拉多准佢所求,約瑟就將耶穌嘅身體領去。
39 嗰個曾經喺夜晚嚟見耶穌嘅尼哥底母同約瑟一齊去。佢帶住沒藥同沉香混合嘅香料,約有三十公斤。
40 兩個人用配有香料嘅麻紗將耶穌嘅身體包好;呢啲係猶太人安葬嘅規矩。
41 喺耶穌被釘十字架嘅地方有一個園,裏面有個新墳墓,係從來冇人葬過嘅。
42 因為嗰日係猶太人嘅預備日,又因個墳墓近,佢哋就將耶穌葬喺嗰處。