約翰福音 3
耶穌同尼哥底母1 有個法利賽人,名尼哥底母,係猶太人嘅領袖。
2 佢係夜晚嚟見耶穌,話:「老師,我哋知道你係從上帝處嚟嘅教師。你行嘅神蹪,若唔係有上帝同在,冇人能行。」
3 耶穌答話:「我實在話你知,人若唔重生,就不能見上帝嘅國。」
4 尼哥底母問:「老咗嘅人點能重生呢? 佢能再入母胎生出嚟咩?」
5 耶穌答話:「我實在話你知,人若唔從水同聖靈重生,就不能成為上帝國嘅子民。
6 人嘅肉身係由父母而生,佢嘅靈性係由聖靈而生。
7 唔好因為我對你話:『你哋必須重生﹝或譯;你哋必須從上帝處領受新生命﹞』 而驚奇。
8 風隨意吹,你聽見佢嘅聲,但唔知道佢由邊處嚟,到邊處去。凡從聖靈生嘅,亦係噉樣。」
9 尼哥底母問:「點樣致有噉嘅事呢?」
10 耶穌答話:「你係以色列教師,連呢件事都唔明白咩?
11 我實在話你知,講論我哋所確知嘅,見證我哋所見到嘅;但係你哋偏偏唔願意領受我哋嘅見證。
12 我對你哋講有關世上嘅事,你哋尚且唔信,我若講天上嘅事,你哋又點會信呢?
13 除咗從天上降落嘅人子,從來冇人上過天。
14 摩西喺曠野舉起銅蛇,同樣人子亦必被舉起,
15 使所有信佢嘅人都得永生。
16 上帝愛世人,甚至將佢獨生子賜俾佢哋,使所有信佢嘅人不致滅亡,反得永生。
17 因為上帝打發佢嘅仔嚟到世上,唔係要定世人嘅罪,係要透過佢嚟拯救世人。
18 信佢嘅人唔被定罪;唔信嘅人已經被定罪,因為佢哋唔信上帝嘅獨生子。
19 光嚟到世上,世人因為自己惡嘅行為,唔愛光而愛黑暗;佢哋被定罪嘅原因就在此。
20 凡作惡嘅,都憎惡光,唔接近光,因為怕佢哋嘅惡行被揭露出嚟。
21 但係,依照真理做事嘅人,必接近光,等光顯明佢哋所做嘅一切都係照上帝嘅旨意做嘅。」
耶穌同約翰22 此後,耶穌同門徒到猶太地。喺嗰處同佢哋住咗一段時間,而且施洗。
23 約翰亦喺距離撒斂冇遠嘅哀嫩施洗;因為嗰處有多水,眾人都去受洗。
24 〈嗰時約翰重未被囚禁。〉
25 約翰嘅幾個門徒同一個猶太人為潔淨禮爭辯。
26 佢哋去見約翰,對佢話:「老師,以前同你喺約但河對岸、你為佢作證嗰一位,現今亦施洗,眾人都去佢處咯!」
27 約翰話:「除非上帝所賜,冇人能得到乜嘢。
28 我曾講過,我唔係基督;我不過係受打發做佢先鋒。呢啲話你哋可以為我作證。
29 娶新娘嘅係新郎;新郎嘅明友企喺旁邊等侯,佢一聽見新郎嘅聲就歡喜快樂。同樣,我已經得到完全嘅喜樂。
30 佢必一日比一日興旺,而我一日比一日衰微。」
從天上嚟嗰一位31 從上嚟嘅,係超越萬有。從地嚟嘅,係屬於地;佢所講嘅亦係地上嘅事。從天上嚟嘅,係超越萬有。
32 佢為所睇見所聽到嘅作證,但係冇人接受佢嘅見證。
33 接受佢見證嘅,證明上帝係信實嘅。
34 上帝所打發嘅就傳講上帝嘅話,因為上帝賜聖靈過佢係無限嘅。
35 父愛子,已經將萬有交喺佢手中。
36 信子嘅,有永生;唔信從子嘅,唔會有生命,而且上帝嘅懲罰永遠唔離開佢。