約翰福音 4
耶穌同撒馬利亞嘅女人1 法利賽人聽聞耶穌施洗,收人做門徒多過約翰。
2 〈其實,耶穌未曾親自為任何人施洗,係佢嘅門徒施洗。〉
3 耶穌知道有噉嘅傳聞,就離開猶太,返去加利利;
4 佢旅途必須經過撒馬利亞。
5 佢嚟到撒馬利亞嘅敘加鎮,近住雅各俾佢嘅仔約瑟嗰塊地;
6 雅各井喺嗰處。耶穌因為趕路疲倦,就坐喺井邊;約中午。
7 有個撒馬利亞女人嚟打水;耶穌對佢話:「請俾啲水我飲。」
8 〈耶穌嘅門徒已經去鎮上買食物。〉
9 個女人答話:「你係猶太人,而我係撒馬利亞人,你點解向我攞水飲呢?」〈原來猶太人同撒馬利亞人不相往來。〉
10 耶穌話:「若你知道上帝嘅恩賜同向你攞水飲嘅係邊個,你就會求佢,佢必將活水俾你。」
11 個女人話:「先生,你冇打水嘅器具,井又深,你去邊處得活水呢?
12 我哋祖先雅各俾呢個井我哋;佢自己同仔女,及牲畜都飲呢個井嘅水,唔通你大過佢咩?」
13 耶穌答話:「飲呢啲水嘅人必定再口渴;
14 但係,飲咗我俾佢嘅水,就永遠唔再口渴。我俾嘅水會喺佢裹面成為泉源,不停湧出嚟,使佢得到永生。」
15 女人話:「先生,請俾呢啲水我,使我永遠唔口渴,亦唔使再嚟呢處打水。」
16 耶穌對佢話:「去叫你嘅丈夫嚟呢處。」
17 女人話:「我冇丈夫。」耶穌話:「你話,你冇丈夫,係冇錯嘅。
18 你已經有五個丈夫,現今嗰個唔係你嘅丈夫。你所講嘅係真嘅。」
19 女人話:「先生,我睇你係先知。
20 我哋撒馬利亞人嘅祖宗喺呢個山敬拜上帝,但你哋猶太人話耶路撒冷致係敬拜上帝嘅地方。」
21 耶穌對佢話:「婦人呀,要信我!時候將到,人唔再喺呢個山或喺耶路撒冷敬拜天父。
22 你哋撒馬利亞人唔知你哋所拜嘅,我哋猶太人知我哋所拜嘅,因為救恩係從猶太人嚟嘅。
23 時候將到,現今已到,真正敬拜天父嘅人,用心靈同真誠敬拜佢。噉樣嘅敬拜係天父所要嘅。
24 上帝係靈,敬拜佢嘅人必須以心靈同真誠敬拜佢。」
25 女人對佢話:「我知道嗰個稱為基督嘅彌賽亞要嚟,佢嚟就會將一切事話俾我哋知。」
26 耶穌答話:「同你講緊嘅,就係佢!」
27 嗰時,耶穌嘅門徒返嚟。睇見佢同一個女人講話,就覺得好驚奇,但係冇人問女人:「你要乜嘢?」或係問耶穌:「你點解同佢講?」
28 個女人放低水埕,入城向眾人話:
29 「你哋嚟睇,有個人將我生平所做一切嘅事都講出嚟;佢唔通就係基督?」
30 眾人就離開鎮去睇耶穌。
31 嗰時,門徒勸耶穌:「老師,請食。」
32 耶穌答話:「我有嘢食,係你哋唔知道嘅。」
33 門徒彼此議論:「唔通有人拎嘢俾佢食咩?」
34 耶穌對佢哋話:「我嘅食物就係實行打發我嚟嗰一位嘅旨意,而且完成佢交俾我嘅工作。
35 你哋話:『再過四個月致係收割嘅時候。』 我話你哋知,舉目睇吓啲田;農作物已經成熟,可以收割咯!
36 收割嘅人得到報賞,為永生積聚果實,使撒種嘅同收割嘅,一齊快樂。
37 『一個人撒種,另一個人收割』呢句話係真嘅。
38 我打發你哋去收割你哋冇耕種過嘅田;人哋辛勞,而你哋享受佢哋辛勞嘅成果。」
39 鎮上有好多撒馬利亞人信耶穌,因為女人話:「佢將我所做嘅事都講出嚟。」
40 撒馬利亞人睇見耶穌,就要求佢去佢哋處住;於是耶穌喺嗰處住咗兩日。
41 有更多人因為耶穌嘅信息而相信佢。
42 佢哋對女人話:「我哋現今信,唔係因為你講嘅話,係因為我哋親自聽見佢嘅話,知道佢真係世界嘅救主。」
耶穌醫好一個異邦官員嘅仔43 耶穌喺嗰處住咗兩日,然後到加利利。
44 佢自己講過:「先知喺本鄉係不受尊重嘅。」
45 耶穌一到加利利,當地嘅人都歡迎佢;因為佢哋上耶路撒冷過逾越節時,睇見佢喺節期間所做嘅一切事。
46 耶穌又返到加利利嘅迦拿,係以前佢變水為酒嘅地方。嗰處有個官,佢嘅仔喺迦百農有病。
47 佢一聽到耶穌從猶太嚟到加利利,就去見佢,求佢去迦百農醫好佢病危嘅仔。
48 耶穌對佢話:「你哋如果唔睇見神蹟奇事總係唔信嘅。」
49 個官員答話:「先生,求你喺我個仔未死之前同我一齊去。」
50 耶穌對佢話:「返去喇,你嘅仔會好返!」嗰個人信耶穌所講就返去。
51 喺路上,佢嘅僕人迎接佢,對佢話:「你個仔好返咯!」
52 佢問佢哋,個仔係乜嘢時候好嘅呢。佢哋話:「昨日下午一點鐘,熱就退咯。」
53 個父親想起,就係喺嗰時,耶穌對佢話:「你嘅仔會好返。」故此佢同佢全家都信。
54 呢件係耶穌從猶太返到加利利之後所行嘅第二件神蹟。