Library · yue

約翰福音 5

喺畢士大池邊醫病

1 此事之後,係猶太人嘅節期,耶穌上去耶路撒冷。

2 喺耶路撒冷,靠近羊門有一個池,希伯來話叫畢士大,池邊有五個走廊。

3 喺走廊上瞓咗成羣病人,有盲眼嘅、跛腳嘅、癱瘓嘅。

4 ﹝有啲古卷加多:佢哋喺處等候池水轉動;因為佢哋相信每隔一啲時候,主嘅天使落嚟攪動池水,水動之後,最先落池嘅病人,無論乜嘢病,都得醫好。﹞

5 喺嗰處有一個已經病咗三十八年嘅人。

6 耶穌睇見佢喺處,知道佢患病多年,就問佢:「你想唔想好返呢?」

7 病人答話:「先生,水動時冇人將我放落池,等我正想落去,巳經有人先過我落去咯。」

8 耶穌對佢話:「起身,拎起你張床行喇!」

9 嗰個人即刻好返,拎起佢張床行去。嗰日係安息日,

10 故此猶太人對被醫好嘅人話:「今日係安息日,你拎住張床係唔合法嘅。」

11 佢話:「醫好我嘅人吩咐我:『拎起你張床行喇!』」

12 佢哋問:「吩咐你拎起張床行嘅係邊個?」

13 但被醫好嘅人唔知道係邊個;因為嗰處人好多,而耶穌又已經避開。

14 事後,耶穌喺聖殿裏搵到佢,對佢話:「你已經完全好返,唔好再犯罪,免致招嚟更大嘅禍患。」

15 嗰個人走開之後,話俾猶太人知,係耶穌醫好佢嘅。

16 從此,猶太人開始迫害耶穌,因為佢喺安息日醫病。

17 耶穌對佢哋話:「我父一直喺處工作,我亦應該照樣工作。」

18 呢啲話更使猶太人決意殺害佢;因為佢不但破壞咗安息日嘅戒律,而且話上帝係佢嘅父,當自己同上帝平等。

兒子嘅權柄

19 接住,耶穌對佢哋話:「我實在話你哋知,子憑自己不能做乜嘢;佢睇見父做乜嘢致去做乜嘢。父所做嘅,子亦做。

20 父愛子,將自己所做嘅指示佢。佢要將更重大嘅事指示佢睇,使你哋驚奇。

21 父點樣使死人復生;同樣,子亦隨自己嘅意思賜生命俾人。

22 父自己唔審判人;佢將審判嘅權交俾子。

23 等人都尊敬子,好似尊敬父一樣。唔尊敬子嘅,就係唔尊敬打發佢嚟嘅父。

24 我實在話你哋知,聽我話,又信打發我嚟嗰一位嘅,就有永生。佢不至於被定罪,而係已經出死入生。

25 我實在話你哋知,時候將到,現今已經到,死人要聽見上帝之子嘅聲;聽見嘅,就得生。

26 正如父本身係生命嘅根源,佢亦使子成為生命嘅根源。

27 佢又將審判權賜俾子,因為佢係人子。

28 你哋唔好為呢件事驚奇;因為時候將到,所有喺墳墓裏嘅人都聽見佢嘅聲,

29 而且從墳墓出嚟:行善嘅,復活得生;作惡嘅,復活被定罪。」

為耶穌作證

30 「我憑自己不能做乜嘢;我按照上帝嘅旨意嚟審判,但我嘅審判係公正嘅;因為我唔尋求自己嘅旨意,只實行打發我嚟嗰位嘅旨意。

31 若我為自己作證,我嘅見證就不足信。

32 但係,有一位為我作證嘅,我知道佢為我作嘅證係真實嘅。

33 你哋曾派人去見約翰,聽過佢為真理作證。

34 其實,我並唔需要人嘅見證;我講呢啲話係想你哋得救。

35 約翰好比一盞照明嘅燈,你哋願意暫時享受佢嘅光。

36 但係我可以提出比約翰更有力嘅見證,就係我嘅工作係我父交俾我去完成嘅。呢啲工作可以證明父打發我嚟。

37 打發我嚟嘅父亦為我作證。你哋從來冇聽見佢嘅聲音,冇睇見佢嘅容貌,

38 冇將佢嘅話存喺心中,因為你哋唔信佢打發嚟嗰位。

39 你哋研究聖經,認為從裏面可以搵到永生;其實聖經嘅話就係為我作證嘅!

40 但係,你哋唔肯到我處嚟得生命。

41 我唔係求人嘅稱讚。

42 但係我睇透你哋,你哋並冇愛上帝嘅心。

43 我奉我父嘅名嚟,你哋唔接待我;若有人奉自己嘅名嚟,你哋就接納佢。

44 你哋喜歡彼此恭維,但唔追求從獨一無二嘅上帝處嚟嘅稱讚;噉樣,你哋點樣能信呢?

45 唔好以為我喺我父面前控告你哋;控告你哋嘅,係你哋一向期望嘅摩西。

46 若你哋真係信摩西,你哋就會信我,因為佢喺佢嘅書上記載我嘅事。

47 你哋既然唔信佢所寫嘅,又點能信我嘅話呢?」