約翰福音 6
俾五千人食飽1 此後,耶穌渡過加利利湖〈又稱提比利亞湖〉。
2 有一大班人跟隨佢,因為佢哋睇見佢醫病嘅神蹟。
3 耶穌上山,同佢嘅門徙坐喺嗰處。
4 嗰時猶太人嘅逾越節快到。
5 耶穌抬頭,睇見一大班人嚟到佢面前,就對腓力話:「我哋去邊處買食物,俾呢啲人食飽呢?」
6 〈佢噉樣講係想試驗腓力;佢自己已經知道要點樣做。〉
7 腓力答話:「就算用二十兩銀去買餅,每人食啲都唔夠!」
8 另外一個門徒,西門彼得嘅細佬安得烈,上前話:
9 「呢處有一個童子有五個大麥餅同兩條魚,但係點夠分俾咁多人呢?」
10 耶穌吩咐佢哋:「叫眾人坐低。」〈嗰處地方有好多草。〉眾人都坐低,淨係男人,總數約有五千。
11 耶穌拎起餅,祝謝,就分俾坐喺處嘅人;魚亦係噉樣分;佢哋都盡量食。
12 佢哋食飽後,耶穌吩咐門徒話:「將剩低嘅零碎收拾起嚟,唔好嘥咗。」
13 佢哋就將五個餅嘅碎塊,即係眾人所食剩嘅,收拾起嚟,一共裝滿十二籃。
14 眾人睇見耶穌所行嘅神蹟,就話:「呢個人一定係嗰個要嚟到世上嘅先知!」
15 耶穌知道佢哋想強迫佢做王,就自己一人避到山上。
喺水面行走16 挨晚,耶穌嘅門徒嚟到湖邊,
17 上咗船,向對岸嘅迦百農出發。嗰時天已黑,耶穌重未嚟到佢哋處。
18 忽然,狂風大作,浪濤翻騰。
19 門徒撐船,約行咗五、六公里,睇見耶穌喺水面向住船行嚟,就好驚。
20 耶穌對佢哋話:「係我,唔使怕!」
21 佢哋接佢上船;船立刻到達目的地。
羣眾尋找耶穌22 第二日,留喺湖對岸嘅一班人睇見嗰處只有一隻小船;佢哋知道耶穌並冇同門徒一齊上船,係門徒自己去。
23 有幾隻從提比利亞嚟嘅小船停靠喺岸邊,係主祝謝之後分餅俾眾人食嘅地方附近。
24 呢班人發覺耶穌同佢嘅門徒都唔喺嗰處,就上船去迦百農搵佢。
耶穌係生命嘅糧25 佢哋喺湖嘅對岸搵到耶穌,問佢:「老師,你幾時到呢處?」
26 耶穌答話:「我實在話你哋知,你哋搵我,唔係為見神蹟,而係為食餅得飽。
27 唔好為會壞嘅食物操勞,要為存到永生嘅食物努力。呢啲食物係人子賜俾你哋嘅,因為人子係父上帝所印記嘅。」
28 佢哋就問:「我哋應該做乜嘢致算係做上帝嘅工作呢?」
29 耶穌答話:「信佢打發嚟嗰一位,就係上帝要你哋做嘅工作。」
30 佢哋又話:「噉樣,你會行乜嘢神蹟,俾我哋睇見就信你呢?你嘅工作到底係乜嘢呢?
31 我哋嘅祖宗喺曠野食過嗎哪,正如聖經記載話:『佢從天上賜糧俾佢哋食。』」
32 耶穌話:「我實在話你哋知,摩西並冇俾你哋從天上嚟嘅糧;從天上嚟嘅真糧係我父賜俾你哋嘅。
33 因為上帝所賜嘅糧係從天上降落嚟、將生命賜俾世界嗰一位。」
34 佢哋話:「先生,請時常將呢啲糧賜俾我哋!」
35 耶穌對佢哋話:「我就係生命嘅糧;到我處嘅,永遠唔餓;信我嘅,永遠唔渴。
36 但係我對你哋講過,你哋已經見我,仍然唔信。
37 凡係父所賜俾我嘅人都會嚟我處。到我處嘅,我絕對唔會拒絕佢,
38 因為我從天上落嚟,唔係要憑我自己嘅意思行事,係要實行打發我嚟嗰位嘅旨意。
39 打發我嚟嗰位嘅旨意係:要我保守佢所賜俾我嘅人,連一個都唔會失落,而且喺末日我就使佢哋復生。
40 因為父嘅旨意係要使所有睇見子而信佢嘅人獲得永生;喺末日,我就使佢哋復生。」
41 猶太人因為耶穌話:「我係從天上降落嚟嘅糧。」就私下議論話:
42 「呢個人唔係約瑟嘅仔耶穌咩?我哋認識佢嘅父母。現今佢意然話佢係從天降落嚟嘅!」
43 耶穌話:「你哋唔使私下議論。
44 若唔係打發我嚟嘅父引導佢,冇人能嚟到我處;到我處嘅,喺末日我就使佢復生。
45 先知書上講過:『眾人都要蒙上帝嘅教導。』所有聽從父而接受佢教導嘅,都要嚟到我處。
46 噉樣講唔係話邊個見過父,只有從上帝嗰處嚟嘅嗰位見過父。
47 我實在話你哋知,信嘅人就有永生。
48 我就係生命嘅糧。
49 你哋嘅祖宗喺曠野食過嗎哪,都死咗;
50 但係從天降落嚟嘅糧係使人食咗唔會死嘅。
51 我係從天降落嚟賜人生命嘅糧;食呢啲糧嘅人永遠唔死。我所賜俾人嘅糧係我嘅肉,係為使世人得生命而獻出嘅。」
52 呢啲話喺猶太人中引起劇烈嘅爭論。佢哋話:「呢個人點能夠將自己嘅肉俾我哋食呢?」
53 耶穌對佢哋話:「我實在話你哋知,若你哋唔食人子嘅肉,唔飲佢嘅血,你哋就冇真生命。
54 食我肉,飲我血嘅,就有永生;喺末日我就使佢復生。
55 我嘅肉係真嘅食物,我嘅血係真嘅飲料。
56 食我肉,飲我血嘅人,常喺我生命中,而我亦喺佢生命中。
57 永生嘅父打發我嚟,我亦因佢而活;同樣,食我肉嘅人亦要因我而活。
58 呢啲就係從天降落嚟嘅糧;食呢啲糧嘅人,生存到永遠。呢啲糧唔似你哋祖宗食過嘅,佢哋食咗,仍然死咗。」
59 呢啲話係耶穌喺迦百農會堂教導人時講嘅。
永生嘅話60 好多門徒聽見呢啲,就話:「此教訓太難喇,邊個能聽呢?」
61 耶穌知道佢嘅門徒私下議論呢件事,就對佢哋話:「此話使你哋信心動搖咩?
62 倘若你哋睇見人子上升返到佢原來所在嘅地方,又點樣呢?
63 賜人生命嘅係聖靈,肉體係無益嘅;我對你哋講嘅話係從賜生命嘅靈嚟嘅。
64 但係,你哋中有人唔信。」 〈耶穌早就知道邊啲人唔信,邊個會出賣佢。〉
65 佢又話:「所以,我對你哋講過,若唔係出於我父嘅恩賜,就冇人能嚟到我處。」
66 從此,跟從佢嘅人中有好多退出,唔再與佢同行。
67 耶穌就問佢嘅十二門徒:「你哋呢?你哋亦想退出咩?」
68 西門彼得答話:「主呀,你有永生之道,我哋重跟從邊個呢?
69 我哋信,而且知道你係從上帝處嚟嘅聖者。」
70 耶穌話:「我豈唔係選召你哋十二人咩?但係你哋中有一個係魔鬼!」
71 耶穌噉講係指加略人西門嘅仔猶大。佢係十二門徒之一,後來出賣佢嘅。