約翰福音 8
犯姦淫嘅女人1 眾人都返自己家中;獨耶穌去橄欖山。
2 第二日一早,佢返到聖殿;羣眾嚟搵佢,佢坐低,開始教導佢哋。
3 經學教師同法利賽人帶嚟一個女人;佢係犯姦淫時被捉到嘅。佢哋叫佢企喺中間,
4 問耶穌話:「老師,呢個女人犯姦淫時被捉到。
5 摩西喺律法上命令我哋,噉樣嘅女人應該用石掟死。你認為點樣?」
6 佢哋噉講想陷害耶穌,搵事故控告佢。耶穌屈身,用指頭喺地上寫字。
7 佢哋不停噉問佢,耶穌就起身,對佢哋話:「你哋中冇犯過罪嘅,就可先拎石掟佢。」
8 於是,佢再屈身,喺地上寫字。
9 佢哋聽見呢啲話,就一個一個行咗去,由年紀大嘅走先,只剩低耶穌同嗰個仍然企喺處嘅女人。
10 耶穌就起身,問佢話:「婦人,佢哋去咗邊呢?冇人定你嘅罪咩?」
11 佢話:「先生,冇咯。」耶穌話:「好,我亦唔定你嘅罪。去喇,以後唔好再犯罪喇!」
耶穌係世界嘅光12 耶穌又對眾人話:「我係世界嘅光;跟從我嘅,會有生命嘅光,唔會喺黑暗處行。」
13 法利賽人對佢話:「你為自己作證;你嘅見證係無效嘅。」
14 耶穌話:「即使我為自己作證,我嘅見證亦係真實嘅;因為我知道我從邊處嚟,去邊處。你哋都唔知道我從邊處嚟,去邊處。
15 你哋係以人嘅標準嚟判斷人;但我唔判斷任何人。
16 即使我判斷人,我嘅判斷亦係正確嘅;因為我唔係獨自判斷,而係嗰位打發我嚟嘅父同我一齊判斷。
17 你哋嘅律法書記載,有兩個人見證相符,佢哋嘅見證就有效。
18 我為自己作證;嗰位打發我嚟嘅父亦為我作證。」
19 於是佢哋問:「你嘅父喺邊處?」耶穌答話:「你哋唔認識我,亦唔認識我嘅父;若你哋認識我,就會認識我嘅父。」
20 呢啲話係耶穌喺聖殿嘅庫房教導人時講嘅。當時冇人捉佢,因為佢嘅時候重未到。
我去嘅地方你哋唔可以去21 耶穌又對佢哋話:「我走喇,你哋將搵我;但係你哋將死喺自己嘅罪中。我去嘅地方,你哋不能去。」
22 猶太人就話:「佢話『我去嘅地方,你哋不能去』,唔通佢要自殺咩?」
23 耶穌話:「你哋係從地嚟嘅,我係從天上嚟嘅;你哋屬此世界,我唔屬此世界。
24 所以我話,你哋將死喺自己嘅罪中。若你哋唔信我就係:『自有永有』嘅嗰一位,你哋將死喺自己嘅罪中。」
25 佢哋就問:「你到底係邊個?」耶穌答話:「我從起首就話過俾你哋知嘅。」
26 關於你哋,有好多事我應該講,應該判斷。但係打發我嚟嗰位係真實可靠嘅;我只係將從佢處聽到嘅話俾世人知。」
27 佢哋唔明白耶穌所講關於父嘅事。
28 所以耶穌話佢哋知:「當你哋將人子舉起,你哋就會知道我係:『自有永有』嘅嗰一位,並且知道我唔係憑自己做乜嘢,我只講父所教導我嘅。
29 打發我嚟嘅嗰位同我一齊;佢並冇留低我,獨自喺處,因為我始終做佢喜歡嘅事。」
30 好多人聽到耶穌嘅話就信佢。
自由同奴隸31 耶穌對信佢嘅猶太人話:「你哋若時常遵守我嘅教訓,就真係我嘅門徒;
32 你哋必認識真理,真理必使你哋得自由。」
33 佢哋答話:「我哋係亞伯拉罕嘅子孫;我哋從來冇做過任何人嘅奴隸,你話『你哋必得自由』,噉樣講係乜嘢意思呢?」
34 耶穌對佢哋話:「我實在話你哋知」,每個犯罪嘅人都係罪嘅奴隸。
35 奴隸喺家庭中冇穩固嘅地位,但子始終屬於家庭。
36 若上帝之子使你哋得自由,你哋就真係自由人喇。
37 我知道你哋係亞伯拉罕嘅子孫,但係你哋想殺我,因為你哋唔接受我嘅教訓。
38 我講嘅係我父指示我嘅,但你哋係做你哋祖宗所講俾你哋知嘅。」
39 佢哋答話:「我哋嘅祖宗係亞伯拉罕。」耶穌話:「若你哋真係亞伯拉罕嘅子孫,就必會做亞伯拉罕所做嘅事。
40 我只不過話你哋知我從上帝處聽到嘅真理,但你哋就想殺我。亞伯拉罕並冇做過呢種事呀!
41 你哋係做你哋父所做嘅事。」佢哋答話:「上帝係我哋惟一嘅父;我哋並唔係私生子!」
42 耶穌對佢哋話:「若上帝真係你哋嘅父,你哋必會愛我;因為我係出於上帝亦係由上帝處嚟嘅。我唔係憑自己嚟嘅,而係佢打發我嚟嘅。
43 你哋點解唔明白我嘅話呢?因為我嘅話你哋唔肯聽。
44 你哋本來係魔鬼嘅仔女,淨係想隨從父嘅慾念做事。從起初佢係謀殺嘅,從來唔企喺真理嗰邊,因為佢根本冇真理。佢講大話係出於本性;因為佢本來係講大話嘅,亦係一切虛謊嘅根源。
45 正因為我講真理,你哋就唔信我。
46 你哋中間邊個能指證我有罪呢?我既然講真理,你哋點解唔信我呢?
47 凡係上帝嘅仔女,必聽上帝嘅話。你哋唔係從上帝處嚟嘅,所以你哋唔聽。」
耶穌同亞伯拉罕48 猶太人問耶穌:「我哋話你係撒馬利亞人,又係被鬼迷嘅,呢啲話唔通講錯咩?」
49 耶穌話:「我並冇被鬼迷;我尊敬我嘅父,但你哋侮辱我。
50 我唔求自己嘅榮耀,但係有一位為我尋求,而且主持公道。
51 我實在話你哋知,遵守我教訓嘅人必永遠唔死。」
52 猶太人對佢話:「現今我哋確實知道你係被鬼迷嘅!亞伯拉罕死咗,眾先知都死咗,獨係你話:『遵守我教訓嘅人必永遠唔死。』
53 你噉話你比我哋祖宗亞伯拉罕重偉大咩?亞伯拉罕死咗,先知都死咗,你將自己當做乜嘢人呢?」
54 耶穌答話:「若我榮耀自己,我嘅榮耀就亳無價值。嗰位榮耀我嘅係我嘅父即係你哋講係你哋上帝嗰一位。」
55 你哋從來唔認識佢,但我認識佢。若我話我唔認識佢,我就同你哋一樣係講大話。但係我認識佢,而且遵守佢嘅教訓。
56 你哋嘅祖宗亞伯拉罕曾經歡歡喜喜盼望我嚟嘅日子;一睇見,就非常快樂。
57 猶太人對佢話:「你未到五十歲,你見過亞伯拉罕咩?」
58 耶穌答話:「我實在話你哋知,亞伯拉罕出世以前,我就存在。」
59 於是,佢哋執起石想掟佢;但係耶穌躲避,從聖殿出去。