使徒行傳 11
彼得向耶路撒冷教會報告1 使徒同猶太境內嘅一班兄弟聽見異邦人亦接受上帝嘅道。
2 就當彼得到耶路撒冷時,主張異邦人必須受割禮嘅人批評佢話:
3 「你喺未受割禮嘅異邦人家中作客,甚至同佢哋一齊食飯!」
4 彼得就將整個事情嘅經過一一向佢哋解釋。
5 佢話:「喺約帕城祈禱時,我睇見異象。有一件器皿從天降落,好似一塊大布,四角綁住,停喺我身邊;
6 我定眼睇,裏面有飛禽走獸,又有爬蟲。
7 跟住,我聽見有聲對我話:『彼得,起身,劏嚟食喇!』
8 我話:『主呀,唔好!任何凡俗唔乾淨嘅嘢,我都冇食過。』
9 從天嚟嘅聲又話:『上帝認為潔淨嘅,你唔好當做污穢。』
10 噉樣一連三次。被收回上天咯。
11 正在此時,受打發由該撒利亞嚟搵我嘅三個人嚟到我居住嘅屋門口。
12 聖靈指示我同佢哋一齊去,唔使猶疑。從約帕嚟嘅六位兄弟亦同我一齊去。我哋都去哥尼流嘅家。
13 哥尼流話俾我哋知,佢點樣睇見一位天使企喺佢嘅屋中,對佢話:『你打發人去約帕,請個名叫彼得嘅西門嚟。
14 佢有話對你講,使你同你嘅全家都得救。』
15 我一開口講,聖靈降臨喺佢哋身上,好似當初降臨喺我哋身上一樣。
16 我就記起主曾經講過:『約翰用水施洗,但你哋要受聖靈嘅洗禮。』
17 好顯然,上帝將此恩賜亦賜俾呢啲異邦人,好似在我哋信主耶穌基督時,賜俾我哋嘅一樣。我係邊個,能阻擋上帝嘅工作呢?」
18 佢哋聽見呢啲話,就唔再批評,都讚美上帝話:「上帝將因悔改而得生命嘅機會亦賜俾異邦人!」
安提阿嘅教會19 嗰時,信徒因司提反被殺所引起嘅迫害分散到各地;去到腓尼基、居比路,同安提阿;只將信息傳俾猶太人。
20 但其中有啲居比路同古利奈嘅信徒到安提阿;亦向希利尼人傳講有關主耶穌嘅福音。
21 主嘅能力與佢哋同在;有好多人信而歸向主。
22 此消息傳到耶路撒冷嘅教會,佢哋就打發巴拿巴去安提阿。
23 佢到達時,見上帝賜福俾嗰處嘅人,就好高興;佢勸勉佢哋,立定心志,恆久信靠主。
24 巴拿巴係個好人,被聖靈充滿,有堅強嘅信心。於是有好多人信主。
25 後來,巴拿巴去大數搵掃羅,
26 搵到,就帶佢去安提阿。足有一年嘅時間,兩人同教會相聚,教導好多人。門徒稱為「基督徒」係從安提阿開始。
27 嗰時,有幾個先知從耶路撒冷落去安提阿。
28 其中有一位名叫亞迦布;佢得到聖靈嘅指示,企起身預言天下將有嚴重嘅饑荒(呢件事到革老丟在位年間果然發生。)
29 於是門徒決定每人照自己嘅能力,捐錢救濟住喺猶太嘅兄弟。
30 佢哋就噉樣做,託巴拿巴同掃羅將捐款送到眾長老嗰處。