使徒行傳 12
教會受更多嘅迫害1 嗰時,希律王落手迫害教會中幾個人。
2 將約翰嘅大佬雅各殺咗。
3 佢見猶太人喜歡佢噉樣做,又去拘捕彼得。(此事發生喺除酵節期間。)
4 佢搵到彼得後,將佢關喺監獄,交俾四班警衛看守,每班四個人。希律計劃喺逾越節後將佢提出,當眾審問。
5 彼得喺監獄裏受到嚴密嘅監視;教會就為佢懇切向上帝禱告。
彼得獲救出獄6 希律要將彼得提出公審嘅前一夜,彼得喺兩名警衛中間,有兩條鐵鍊鎖住佢,門外又有警衛看守。
7 忽然,有主嘅一位天使企喺嗰處;有一道光射入監獄。天使拍一拍彼得嘅肩膀,將佢叫醒,話:「快啲起身!」嗰條鐵鍊立刻從彼得手上脫落。
8 天使對佢話:「绑起腰帶,將鞋着好。」佢就照噉樣做。天使又話:「着返外衣,跟住我嚟。」
9 彼得跟住佢走出監獄,但唔知道天使做嘅係真有其事,以為係見異象。
10 佢哋通過第一重同第二重嘅警衛崗位,最後嚟到通往城嘅一道鐵門,門自動開咗。佢哋出嚟,行過一條街;突然,天使就離開彼得。
11 嗰時,彼得致明白,就話:「現今我知道係真嘅;主打發佢嘅天使,救我脫離希律嘅手同猶太人要加俾我嘅一切災害。」
12 佢睇清楚,就去個稱為馬可嘅約翰佢母親馬利亞家;有好多人聚集喺嗰處禱告。
13 彼得敲門,有一個叫羅大嘅婢女應聲出嚟。
14 佢認出係彼得嘅聲音,大喜過望,顧唔得開門就走入去話俾眾人知,話彼得企喺門外。
15 佢哋話:「你發癲咩!」婢女堅持真係有此事。佢哋就話:「噉一定係佢嘅天使。」
16 彼得不歇敲門。佢哋開門,睇見果然係佢,都好驚奇。
17 佢做手勢,叫佢哋安靜落嚟,向佢哋解釋主點樣帶佢出監獄。彼得又吩咐佢哋將消息話俾雅各同眾兄弟知,然後離開,去別處地方。
18 到天光,警衛亂成一團,唔知彼得出咗乜嘢事。
19 希律下令搜查,但係唔見彼得嘅蹤跡;佢就審訊警衛,將佢哋拉去殺。此後,希律離開猶太,去該撒利亞,喺嗰處住吓。
希律嘅死20 希律向推羅同西頓嘅人民大發脾氣,因此,佢哋推派代表團去見希律。佢哋先得到宮廷總管伯拉斯都嘅同情,然後去向希律求和,因為佢哋需要從王嘅地土獲得糧食嘅供應。
21 喺特定嘅日子,希望穿着王服,坐喺王位,向人民訓話。
22 佢哋呼叫話:「呢啲唔係凡人嘅聲音,係神明嘅聲音!」
23 主嘅天使即時擊打希律,因為佢冇將榮耀歸上帝。佢被蟲咬氣就斷。
24 上帝嘅道繼續擴展,日見興旺。
25 巴拿巴同掃羅完成任務以後,離開耶路撒冷返去;佢哋帶埋稱為馬可嘅約翰同去。