Library · yue

使徒行傳 17

喺帖撒羅尼迦

1 保羅同西拉繼續佢哋嘅旅程,經過暗妃波里、亞波羅尼亞,嚟到帖撒羅尼迦,嗰處有猶太人嘅會堂。

2 保羅照習慣入會堂,連續三個安息日,根據聖經同佢哋辯論,

3 講解並證明基督必須受害,然後從死者中復生。佢話:「我對你哋傳揚嘅呢位耶穌,就係基督。」

4 其中有啲人相信,成為保羅同西拉嘅同道;有好多敬拜上帝嘅希臘人同婦女嘅領袖亦相信。

5 但係,當地嘅猶太人心裏嫉妒,召集市井無賴,糾合成羣,喺城裏引起暴動。佢哋闖入耶孫嘅家,要搵保羅同西拉,將佢哋拉去交俾暴民;

6 但係搵唔倒,竟將耶孫同其他幾個兄弟拉去見地方官,控訴話:「呢班擾亂天下嘅人,嚟到本城,

7 耶孫竟收留佢哋!佢哋破壞皇上嘅諭令,話另有個王,名叫耶穌。」

8 呢啲話引起羣眾同地方官一場騷動。

9 地方官命令耶孫同其他嘅人繳款具保,然後釋放佢哋。

喺庇哩亞

10 到晚上,兄弟即刻送保羅同西拉去庇哩亞。佢哋一到,就入猶太人嘅會堂。

11 呢處嘅人比帖撒羅尼迦人開明。佢哋熱心去聽信息,每日查考聖經,要知保羅所講嘅係唔係真實。

12 佢哋中有好多人相信;有好多希臘上流社會嘅婦女同希臘男子亦相信。

13 但係,帖撒羅尼迦嘅猶太人一聽聞保羅亦喺庇哩亞傳上帝嘅道,就到嗰處去搗亂,煽動羣眾。

14 兄弟即刻送保羅去沿海地方;但西拉同提摩太留喺庇哩亞。

15 護送保羅嘅人一直將佢送到雅典,然後返到庇哩亞,帶嚟保羅所交代嘅話,要西拉同提摩太儘快趕到佢嗰處,同佢會合。

喺雅典

16 保羅喺雅典等候西拉同提摩太時,睇見滿城係偶像,心裏非常難過。

17 佢喺會堂裏同猶太人及敬拜上帝嘅異邦人辯論,又每日喺廣場上同偶然遇到嘅人辯論。

18 有啲以彼古羅派同斯多亞派嘅哲學家亦嚟同佢爭論。有啲話:「呢個走江湖嘅究竟亂講乜嘢?」亦有啲話:「佢好似係傳講外國嘅鬼神。」佢哋噉樣講係因為保羅傳講耶穌同佢復生嘅福音。

19 佢哋帶保羅到亞略巴古嘅議會上,話:「我哋可以知道你所講論嘅新學說嗎?

20 有啲事我哋聽嚟覺得非常奇異,好想知道究竟係乜嘢意思。」

21 (原來雅典人同所有旅居喺嗰處嘅外國人都喜歡將全部時間談新聞、聽消息。)

22 保羅企喺亞略巴古議會上,話:「雅典嘅居民!我知你哋喺各方面都表現出濃厚嘅宗教熱情。

23 我喺城裏到處去,睇吓你哋崇拜嘅場所,竟發現有一座祭壇,上面刻住『獻俾未認識嘅神』。我現今要話俾你哋知嘅就係呢位你哋唔認識、而敬拜嘅神。

24 呢位創造天、地,同其中萬物嘅上帝乃係天地嘅主。佢唔住喺人建造嘅殿宇,

25 亦唔需要人嘅任何供奉;因為佢自己將生命、氣息,同萬物賜俾人類。

26 佢從一人造出萬族,使佢哋散居喺整個地面,而且為佢哋預先定下年限同疆界。

27 佢噉樣做係要佢哋尋求上帝,或者喺摸索中搵到佢。其實,上帝離我哋各人唔遠。

28 有人話:『我哋嘅生活、行動、生存都喺佢手裏。』又好似你哋中某詩人話:『我哋亦係佢嘅仔女。』

29 既然我哋係佢嘅仔女,我哋就唔應該幻想上帝嘅本性係可以用人嘅技巧,用金銀或石雕製嘅偶像相比。

30 當人類處喺蒙昧無知時,上帝唔加深究,但現今佢命令全人類離棄邪惡嘅道路。

31 因為佢已經定下日子,藉佢所揀選嘅一個人,用公義嚟審判全世界;由於使呢個人從死者中復生,佢已經為全人類作咗信嘅憑據。」

32 佢哋一聽見保羅講起從死者中復生嘅事,有人就譏笑佢;另外有啲人話:「我哋希望再聽你講呢件事。」

33 於是保羅離開議會。

34 有啲人成為佢嘅同道,做咗信徒;其中有亞略巴古嘅議員丟尼修,又有一個名叫大馬哩嘅婦人,同另外一啲人。