Library · yue

使徒行傳 19

保羅喺以弗所

1 亞波羅喺哥林多時,保羅旅行經過內陸地區,嚟到以弗所。喺嗰處,遇見幾個門徒,

2 就問佢哋話:「你哋信嘅時候,有冇領受聖靈?」佢哋答話:「我哋從來冇聽過聖靈呢件事。」

3 保羅又問:「噉樣,你哋受嘅係乜嘢洗禮呢?」佢哋答話:「係約翰嘅洗禮。」

4 保羅話:「約翰嘅洗禮係為悔改嘅人做嘅;佢話俾以色列人知,要信喺佢以後嚟嘅嗰一位,就係耶穌。」

5 佢哋聽見呢啲話,就奉主耶穌嘅名受洗禮。

6 保羅為佢哋按手,聖靈降臨喺佢哋身上;佢哋就講方言,又講預言,

7 一共約有十二個人。

8 一連三個月,保羅照常去會堂,大膽傳道,辯論上帝國嘅事,勸人歸信。

9 佢哋中有啲人頑固唔肯信,喺會眾面前毀謗此道。於是保羅帶埋信徒離開佢哋,日日喺推喇奴講堂舉行討論。

10 此工作繼續兩年,因此所有住喺亞西亞省嘅人,無論猶太人或異邦人,都聽見主嘅道。

士基瓦嘅仔

11 上帝藉保羅行咗一啲非常嘅神蹟;

12 甚至有人將佢用過嘅手巾或圍裙拎去放喺病人身上,亦會使疾病消除,使邪靈從人身出嚟。

13 有啲到處招搖、驅邪趕鬼嘅猶太人亦想假借主耶穌嘅名嚟做呢種事。佢哋對邪靈話:「我奉保羅所傳耶穌嘅名,命令你哋出嚟。」

14 做呢種事嘅猶太祭司長士基瓦嘅七個仔。

15 但係,邪靈答佢哋:「我認識耶穌,亦知道保羅係邊個;但你哋係邊個呢?」

16 邪靈所迷嘅人就猛烈襲擊佢哋,制伏佢哋。佢哋都受傷,衣服撕碎,狼狽逃出嗰間屋。

17 所有住喺以弗所嘅猶太人同異邦人聽見呢件事,都好驚;主耶穌嘅名從此更受尊崇。

18 有好多信徒開始將佢哋以往所做過嘅事公開坦白承認出嚟。

19 好多行邪術嘅人帶佢哋嘅書嚟,堆埋一齊,當眾焚燒。佢哋計算呢啲書嘅價值,總共約五萬銀。

20 由於呢啲不尋常嘅事,主嘅道普遍傳開,大大興旺。

以弗所嘅暴動

21 此事過後,保羅決定取道馬其頓同亞該亞,去耶路撒冷。佢話:「到嗰處以後,我亦必須訪問羅馬。」

22 於是佢打發佢兩個助手─提摩太同以拉都─去馬其頓,自己暫時留喺亞西亞省。

23 嗰時,為主嘅道,以弗所發生一件嚴重嘅亂事。

24 有個名叫底米丟嘅銀匠,一向以製造銀質嘅亞底米女神廟模型為業;呢個行業使好多匠人獲得厚利。

25 底米丟召集呢啲工人同所有嘅同業,對佢哋話:「各位,你哋知我哋嘅繁榮係靠呢一個行業。

26 現今你哋已經聽見,亦睇到呢個保羅搞啲乜嘢。佢話:『人手所造嘅唔係神。』呢啲話已經使以弗所同幾乎全亞西亞省嘅大多數人相信。

27 睇嚟我哋呢一行業有蒙受惡名嘅危險。不但噉,連大女神亞底米嘅廟亦會被輕視,一向喺亞西亞省同普天下受崇拜嘅女神嘅尊榮亦要遭受破壞!」

28 羣眾一聽見呢啲話就狂怒起嚟,大叫話:「大哉!以弗所嘅女神亞底米!」

29 於是騷動蔓延全城。暴民捉住與保羅同行嘅兩個馬其頓人─該猶同亞里達古─一齊衝入戲院。

30 保羅想走到羣眾前,但係信徒唔俾佢入去。

31 重有亞西亞省嘅幾位領袖,係保羅嘅朋友,亦派人去勸阻保羅,叫佢唔好冒險去戲院。

32 嗰時,整個會場非常混亂,有啲叫呢樣,有啲叫嗰樣,多數嘅人唔知道佢哋聚喺嗰處係為乜事。

33 猶太人將亞力山大推前,有啲人以為呢件事應該由佢負責。於是亞力山大做手勢,要發言向羣眾分訴。

34 但係,當眾人認出佢係猶太人,就一齊呼叫話:「大哉!以弗所嘅女神亞底米!」噉樣一直呼叫兩個鐘頭。

35 最後,城裏嘅書記官將羣眾安撫落嚟。佢話:「以弗所人呀,邊個唔知以弗所城係守護大亞底米女神廟同嗰塊從天上降落嚟嘅聖石呢?

36 既然冇人能否認此事,你哋就應該安靜落嚟,唔好有鹵莽嘅行動。

37 你哋將呢啲人帶到呢處嚟,但佢哋並冇盜取廟中嘅嘢,亦冇褻瀆我哋嘅女神。

38 底米丟同佢嘅同業若要控告乜嘢人,自有規定開庭嘅日子同聽訴訟嘅官長,佢哋可以彼此對告。

39 若有其他嘅事,亦可以喺合法嘅議會中解決。

40 今日嘅暴動,我哋難免被追究責任。呢一切嘅紛擾係唔對嘅,我哋自己亦講唔出乜嘢理由嚟。」

41 講完呢啲話,佢就將羣眾解散。