Library · yue

使徒行傳 3

彼得同約翰醫好跛腳嘅人

1 一日,下午三點禱告嘅時間,彼得同約翰上聖殿。

2 喺名叫美門處,有個生嚟跛腳嘅人,日日俾人抬嚟放喺門口,向入聖殿嘅人求乞。

3 佢見彼得同約翰要入聖殿,就求佢哋施捨。

4 佢哋定眼睇佢;彼得話:「睇吓我!」

5 佢就留神睇佢哋,希望得到啲嘢。

6 彼得對佢話:「金銀我都冇,但我所有嘅就俾你:我奉拿撒勒人耶穌基督嘅名命令你,起身行!」

7 於是彼得拉住佢嘅右手,扶佢起身。嗰個人嘅腳同腳眼骨即刻有氣力,

8 就跳起,企直,開始走。佢同佢哋一齊入聖殿,邊走邊跳,頌讚上帝。

9 眾人睇見佢一面行,一面頌讚上帝;

10 佢哋認出佢係坐喺聖殿美門口求乞嘅,就對所發生嘅事大感驚異。

彼得喺聖殿傳揚信息

11 喺所羅門廊下,嗰個人拉住彼得同約翰;在場嘅人好驚訝,都走去睇佢哋。

12 彼得見好多人,就對佢哋話:「以色列同胞!何必為此事驚奇呢?為乜定眼睇住我哋?你哋以為我哋係憑自己嘅能力或係虔誠使呢個人行咩?

13 亞伯拉罕、以撒、雅各嘅上帝,已經榮耀佢嘅僕人耶穌;你哋將耶穌交俾官府,彼拉多決定釋放佢,你哋反喺彼拉多面前背棄佢。

14 佢係聖潔公義嘅,但你哋棄絕佢,反求彼拉多將一個殺人犯釋放俾你哋。

15 噉樣,你哋殺咗生命之主;但係上帝使佢從死者中復生。我哋就係此事嘅見證人。

16 耶穌嘅名所發出嘅能力使呢個跛腳嘅有氣力。你哋所睇見所知道發生喺此人身上嘅事都係由於信佢嘅名。因為佢信耶穌致使佢完全好返;你哋眾人亦睇見。

17 「兄弟呀,我知道你哋同你哋嘅長官噉樣對待耶穌係出於無知。

18 上帝早已藉先知預言基督必須受苦;此預言果然實現。

19 所以,你哋要悔改,轉向上帝,佢就赦免你哋嘅罪。

20 噉樣,主會賜你哋靈力更新嘅日子;同時,佢會打發耶穌,即係佢已經為你哋選定嘅基督嚟。

21 基督必須留喺天上,直到萬物更新時;呢啲係上帝喺古時藉佢嘅聖先知所宣怖嘅。

22 摩西講過:『主─你哋嘅上帝要從你哋嘅兄弟中為你哋興起一位好似我嘅先知。佢向你哋講嘅話,你哋要聽從。

23 唔聽從呢位先知嘅人,必要從上帝嘅子民中除滅。』

24 所有傳信息嘅先知,包括撒母耳同佢嘅子孫,都宣佈呢啲日子所要發生嘅事。

25 你哋係先知嘅子孫;亦承接上帝同你哋祖先所立嘅約。上帝對亞伯拉罕講過:『我要藉你嘅後代賜福俾地上萬民。』

26 所以,上帝興起佢嘅僕人,先打發佢到你哋處,嚟賜福俾你哋,使你哋回頭,離開邪惡嘅道路。」