使徒行傳 24
猶太人控告保羅1 過咗五日,大祭司亞拿尼亞同幾個長老,連同一個名叫帖土羅嘅律師嚟到該撒利亞。佢哋喺總督腓力斯面前控告保羅。
2 保羅被傳出庭;帖土羅控告佢話:「腓力斯大人!由於你賢明嘅治理,我哋能享受長期嘅太平,國中嘅陋政獲得改革。
3 對於你嘅德政,我哋隨時隨地滿心感謝不盡。
4 我唔敢過份煩擾你,只求你垂聽我哋簡短嘅控訴:
5 我哋睇清楚,此人係危險人物。佢喺全世界猶太人中製造亂事,又係拿撒勒黨嘅一個頭目,
6 連聖殿都褻瀆,我哋就將佢捉住。
7 想唔到指揮官呂西亞橫加干預,從我哋手中將佢搶走。
8 並命令各原告都到你呢處。你審問此人就會明白我哋所控告嘅一切事由。」
9 在場嘅猶太人亦同聲控告,認為所指出嘅都係事實。
保羅為自己辯護10 嗰時,總督向保羅示意,要佢講。保羅就話:「我知你喺本國執掌法政多年,因此,我樂意喺你面前為自己辯護。
11 你唔難查明,從我去耶路撒冷禮拜到現今只不過十二日。
12 佢哋並冇睇見我喺聖殿裏同任何人辯論,亦冇睇見我喺會堂或城裏其他地方煽動羣眾。
13 佢哋不能后你提出控告我嘅證據。
14 但係,有一件事我承認:我係根據佢哋所認為異端嘅道,嚟敬拜我哋祖先嘅上帝。我亦相信喺摩西嘅律法同先知書上所記載嘅一切。
15 我對上帝存着同佢哋相同嘅盼望,係盼望所有嘅人,無論善惡,都要復生。
16 因此,我成日勉勵自己,喺上帝同人面前,常保持清白嘅良心。
17 我離開耶路撒冷已經有好幾年。我呢次上去係帶住賙濟同胞嘅款項及同時要獻嘅祭物。
18 佢哋喺聖殿裏發現我時,我已經行咗潔淨禮,正在獻祭;我並冇聚眾,亦冇作亂。
19 不過有幾個由亞西亞省嚟嘅猶太人喺嗰處,呢啲人若有控告我嘅事,應該到你面前控訴。
20 若唔係,就等呢啲現場嘅人指出,當我喺議會申訴時有乜嘢犯罪嘅行為。
21 我企喺佢哋面前只高聲講過一句話;就係:『今日我受你哋審判,無非係為相信死人復生嘅道理。』」
22 腓力斯對呢啲道理原有相當嘅認識,於是停止聲訟,對佢哋話:「且等指揮官呂西亞嚟到,我就為你哋判決。」
23 佢命令嗰個軍官看守保羅,寬待佢,准許親友供應佢日常嘅需要。
保羅喺腓力斯同土西拉面前24 過幾日,腓力斯同佢嘅太太─猶太女子土西拉─一齊嚟。佢叫保羅嚟,聽佢講論對基督耶穌嘅信仰。
25 保羅又談論關於良善、節制、將來審判等教訓;腓力斯覺得好驚,對保羅話:「你現今去,等我有空再叫你嚟。」
26 佢又盼望保羅送錢俾佢,所以成日叫佢嚟,同佢談論。
27 過兩年,波求非斯都替代腓力斯,出任總督。腓力斯為要討好猶太人,仍將保羅留喺監獄裏。