Library · yue

使徒行傳 25

保羅上訴於羅馬皇帝

1 非斯都到任後三日,從該撒利亞上耶路撒冷。

2 祭司長同猶太人嘅領袖向佢控告保羅。佢哋請求非斯都,

3 要求佢送保羅到耶路撒冷,因為佢哋陰謀喺路上埋伏殺佢。

4 非斯都答佢哋話:「保羅現今被拘禁喺該撒利亞,我冇幾耐要返去嗰處。

5 你哋嘅領袖可以同我一齊去,若嗰個人有乜嘢不法行為,就喺嗰處控告佢。」

6 非斯都喺佢哋嗰處又住咗十日八日,然後返去該撒利亞。第二日佢就開庭,命令將保羅帶嚟。

7 保羅到咗,嗰啲從耶路撒冷嚟嘅猶太人周圍企住,用好多嚴重嘅罪名控告佢,但係都不能提出證據。

8 保羅為自己辯護,話:「我冇做過任何事違反猶太人嘅律法,褻瀆聖殿,或冒犯羅馬皇帝。」

9 但係非斯都為討好猶太人,就問保羅:「你願意上耶路撒冷,喺嗰處接受我對呢件案嘅審判咩?」

10 保羅話:「我企喺皇帝嘅法庭上;呢處就係我應該受審嘅地方。你自己亦知,我並冇得罪過猶太人。

11 若我犯法,有乜該死嘅罪行,我絕唔會逃避懲罰。佢哋若對我嘅控告唔係事實,邊個都不能將我交俾佢哋。我要向皇帝上訴」

12 非斯都同佢嘅參謀商量之後,就話:「既然你向皇帝上訴,你就到皇帝個處去。」

非斯都向亞基帕王敘述保羅嘅事

13 過幾日,亞基帕王同百尼基到該撒利亞嚟迎接非斯都。

14 喺嗰處住咗幾日之後,非斯都將保羅嘅事話俾亞基帕王知,話:「呢處有一個人,係腓力斯留下嘅囚犯。

15 前次我上耶路撒冷時,猶太祭司長同長老控告佢,要求我定佢嘅罪。

16 我對佢哋話,按照羅馬人嘅規矩,被告未同原告對質,仍未有機會為自己辯護之前係不能判罪嘅。

17 等佢哋都到呢處之後,我冇耽誤時間,第二日就開庭,命令將嗰個人提出應訊。

18 原告企起控告佢,但所控告嘅並唔係我想像中嘅嗰種罪。

19 佢哋同佢爭論嘅係有關宗教上嘅問題,及一個名叫耶穌嘅;呢個人已經死咗,但保羅話佢仍然生。

20 對呢件案我簡直唔知應該點辦。我問保羅願唔願意上耶路撒冷,喺嗰處受審。

21 但係保羅請求將佢留下,由皇上審判。因此我命令將佢留喺監獄,等候解佢到皇上嗰處。」

22 亞基帕對非斯都話:「我自己亦想聽吓呢個人講論。」非斯都話:「明日你可以聽。」

23 第二日,亞基帕同百尼基大排儀仗,浩蕩進入大廳;同佢一齊嚟嘅有各指揮官同城裏嘅顯貴。非斯都一聲令下,保羅就被帶入。

24 非斯都話:「亞基帕同在座各位!請睇呢個人;就係所有喺呢處同耶路撒冷嘅猶太人向我控告,要求處死嘅。

25 但我查唔出佢犯咗乜嘢該判死刑嘅罪;而且佢既然要求向皇帝上訴,我決定將佢解去。

26 關於此人,我並冇具體資料可以奏明皇上,因此我帶佢到各位面前,尤其係亞基帕王面前,查明案情之後有所陳奏。

27 因為我以為解送囚犯,若唔指明佢嘅罪案,係唔合理嘅。」