Library · yue

使徒行傳 4

彼得同約翰喺議會受審

1 彼得同約翰向羣眾講話時,有啲祭司、聖殿嘅警衛官,同撒吐該人忽然嚟。

2 因為呢兩位使徒教導人有關復生嘅事,宣講耶穌從死者中復生,呢啲人非常惱怒,

3 所以拘捕佢哋,將佢哋囚禁喺監獄裏到第二日,因為嗰時巳經夜。

4 但係聽見信息嘅人有好多信,單係男人,數目將近五千。

5 第二日,猶太人嘅領袖、長老,同經學教師喺耶路撒冷聚會。

6 大祭司亞那同該亞法、約翰、亞力山大,同大祭司嘅親屬都在嗰處。

7 佢哋叫使徒企喺佢哋面前,問:「你哋靠乜嘢能力,奉邊個嘅名做呢件事呢?」

8 彼得被聖靈充滿,答話:「民間領袖同長老,

9 若我哋今日被查問係關於呢個跛腳嘅人點樣被醫好嘅善事,

10 你哋眾人同一切以色列人都應該知道:呢個人,企喺你哋面前,完全康復;係由於拿撒勒人耶穌嘅名所發出嘅能力。佢被你哋釘喺十字架上,而上帝已經使佢從死者中復生。

11 關於呢位耶穌,聖經話過:『你哋匠人丟棄嘅石已成為最重要嘅基石。』

12 拯救只由佢而嚟;因為喺天下人間,上帝並冇賜任何其他嘅名,使我哋藉佢得救。」

13 議員睇見彼得同約翰咁勇敢,又知道佢哋係冇受過乜嘢教育嘅平常人,就好希奇。嗰時,佢哋知道呢兩人跟隨過耶穌。

14 佢哋冇話好講,因為佢哋睇見嗰個被醫好嘅人同彼得約翰企喺一齊。

15 於是吩咐佢哋兩人從議會出去,然後商議,

16 話:「我哋該點樣對付佢哋呢?住喺耶路撒冷嘅人都知道佢哋行呢個奇異嘅神蹟,我哋亦冇辦法否認。

17 但為避免呢件事喺民間越傳越廣,我哋要警告佢哋,叫佢哋唔好再奉耶穌嘅名對任何人講論。」

18 於是,叫兩人嚟,警告佢哋無論點樣都唔可以再奉耶穌嘅名發表言論或教導人。

19 彼得同約翰答佢哋話:「喺上帝面前,聽從你哋對,或係聽從上帝對呢?你哋自己判斷喇!

20 我哋所睇見所聽到嘅,不能唔講出嚟。」

21 於是議會再嚴厲警告一番,然後釋放佢哋,因為搵唔出理由嚟處罰佢哋。羣眾都為所發生嘅事頌讚上帝。

22 被醫好嘅人已經四十多歲。

信徒同心禱告

23 彼得同約翰一被釋放,即刻返到信徒處,將祭司長同長老講嘅話都向眾人報告。

24 佢哋聽見,就同心高聲禱告上帝話:「創造天、地、海,同其中萬物嘅主宰呀!

25 你曾藉聖靈,用你嘅僕人─我哋先祖大衛嘅口話:『異邦因何憤怒?萬民因何妄謀?

26 地上嘅君王一齊起來;統治者亦聚集,要攻擊主同佢嘅受膏者(即基督)。』

27 希律同本丟彼拉多果然喺本城同異邦人及以色列人勾結,來攻擊你所膏立嘅聖僕耶穌。

28 成就你權力同旨意早預定要實現嘅一切事。

29 主呀,現今佢哋恐嚇我哋,求你鑒察,並使我哋,你嘅僕人,能勇敢傳講你嘅信息。

30 求你伸手醫治疾病,又使我哋能藉你聖僕耶穌嘅名行神蹟奇事。」

31 佢哋禱告完,聚會嘅地方震動。佢哋都被聖靈充滿,開始勇敢傳講上帝嘅信息。

財物公用

32 所有信徒都同心合意,冇一個話佢嘅財物係屬自己嘅;各物都大眾公用。

33 使徒有能力見證主耶穌復生;上帝大大降福俾佢哋每個人。

34 佢哋中,冇人缺乏。擁有田產房屋嘅,都賣咗,

35 將賣產業嘅錢交俾使徒,照各人嘅需要分俾各人。

36 有個出生喺居比路嘅利未人,名叫約瑟,使徒叫佢巴拿巴(巴拿巴嘅意思係鼓勵者);

37 佢賣咗自己嘅一塊田,將錢拎嚟,交俾使徒。