使徒行傳 5
亞拿尼亞同撒非喇1 另外有一人,叫亞拿尼亞,同佢嘅妻撒非喇賣咗一啲田產。
2 佢留起一部份錢,將剩低嘅交俾使徒;此事佢嘅妻亦同意。
3 彼得對佢話:「亞拿尼亞,點解俾撒但控制你嘅心,使你欺騙聖靈,將賣田產所得嚟嘅錢留起一部份呢?
4 田產未賣,係你嘅,賣出以後,錢亦係你嘅;你點解存心噉樣做呢?你唔係欺騙人,係欺騙上帝!」
5 亞拿尼亞一聽見呢啲話,就倒下死去;聽見呢件事嘅人都好害怕。
6 有啲年輕人入嚟,將佢嘅屍體包好,抬出去埋葬。
7 大約過咗三個鐘頭,佢嘅妻入嚟,仍唔知道已發生嘅事。
8 彼得對佢話:「話俾我知,你哋賣田產嘅錢只係呢啲咩?」佢回答:「冇錯,只係呢啲。」
9 彼得就話:「你哋點解存心試探主嘅靈呢?埋葬你丈夫嘅人就喺門口,佢哋亦要將你抬出去!」
10 佢立即仆喺彼得腳前,死去。嗰啲年輕人入嚟,睇見佢已經死,就將佢抬出去,葬喺佢丈夫旁邊。
11 全教會同其他聽見呢件事嘅人都好驚慌。
神蹟奇事12 使徒喺民間行好多神蹟奇事;所有信徒都同心合意喺所羅門廊聚集。
13 雖然一般民眾尊重佢哋,但係信徒以外嘅人都唔敢接近佢哋。
14 當時信主嘅人遂漸增加,男女都有。
15 由於使徒行咗好多神蹟,有人將病人抬到街上,放喺床上、擔架上,希望彼得走過時,佢嘅影投喺佢哋一啲人身上。
16 重有好多人帶住病人同被污靈所迷嘅人從耶路撒冷附近嘅市鎮嚟;呢啲病人都得到醫治。
使徒受迫害17 大祭司同佢嘅黨羽,即係當地嘅撒吐該人,對使徒非常嫉妒,因此決定採取行動。
18 佢哋落手捉使徒,將佢哋囚禁喺拘留所。
19 當夜,主嘅天使打開監門,將使徒領出嚟,對佢哋話:
20 「你哋去,企喺聖殿內,向人民宣講有關此新生命嘅道理。」
21 使徒聽從呢啲話,喺天快亮時入聖殿,開始教導人。大祭司同佢嘅黨羽召集議會裏所有嘅猶太長老舉行全體會議,然後下令到監獄將使徒提出嚟。
22 但係警衛到達時,發現使徒唔喺監獄裏,就返議會報告話:
23 「我哋到監獄,睇見監門堅固鎖住,獄警都守喺門外;但我哋開監門,發現裏面一個人都冇!」
24 聖殿警衛官同祭司長聽見呢啲報告,非常驚異,唔知道使徒遇到乜嘢事。
25 嗰時,有一人入嚟報告話:「你哋拘禁喺監獄嘅人正企喺聖殿裏教導民眾!」
26 於是警衛官帶領手下去將使徒帶嚟。佢哋冇使用暴力,因為怕人民用石掟佢哋。
27 佢哋將使徒帶嚟後,叫佢哋企喺議會前。大祭司開始審問佢哋。
28 話:「我哋嚴禁過你哋,不得藉此人嘅名教導,你哋反將你哋嘅道理傳遍耶路撒冷,想將殺此人嘅血債歸喺我哋身上!」
29 彼得同其他門徒答話:「我哋必須服從上帝,唔服從人。
30 你哋釘死喺十字架上嘅耶穌,我哋祖先嘅上帝已經使佢復生。
31 上帝高舉佢,使佢喺自己嘅右邊做領袖,做救主,俾以色列人有悔改嘅機會,等佢哋嘅罪得到赦免。
32 我哋係此事嘅見證人;上帝對服從佢嘅人所賜嘅聖靈亦同我哋一齊作證。」
33 議會嘅議員聽見呢啲話,非常惱怒,決定要殺使徒。
34 但係,佢哋中有一個法利賽人,名叫迦瑪列,係一向受人尊敬嘅律法教師;佢喺議會中企起,吩咐人將使徒帶出去,
35 然後向議員發言話:「以色列同胞,你哋處理呢啲人必須謹慎!
36 前時,丟大起嚟,自誇為大,約有四百人附從佢。佢終被殺,附從嘅人四散,歸於無有。
37 以後又有加利利嘅猶太喺戶口調查時起來,引誘好多人跟從佢;佢亦被殺,附從佢嘅人亦四散。
38 對於現今呢件事,我話你哋知,唔好同佢哋作對,由得佢哋!若佢哋所計劃、所做嘅係出於人,一定失敗;
39 若係出於上帝,你哋就不能擊敗佢哋。你哋所做嘅,恐怕係攻擊上帝!」議會接納迦瑪列嘅意見,
40 於是叫使徒入嚟,鞭打佢哋,又命令佢哋唔可以再藉耶穌嘅名講道,然後釋放佢哋。
41 使徒離開議會,為配得為耶穌嘅名受凌辱,心裏非常愉快。
42 佢哋仍然日日喺聖殿同家中不停教導人,宣傳耶穌係基督。