Library · yue

哥林多前書 10

警戒拜偶像嘅事

1 兄弟呀,我要你哋記得,我哋嘅祖宗同摩西喺曠野所經歷嘅事。佢哋都喺雲彩嘅保護下平安過紅海。

2 喺雲中,喺海裏,佢哋都受洗歸於摩西。

3 佢哋都食一樣嘅靈糧,

4 飲一樣嘅靈泉。此泉係從佢哋同行嘅屬靈磐石湧流出嚟嘅;此磐石就係基督。

5 但係,佢哋中,大多數人係上帝所唔喜歡,所以喺曠野死咗。

6 此事都係我哋嘅鑑戒,要警告我哋唔好似佢哋噉樣貪婪邪惡,

7 唔好似佢哋中一啲人去拜偶像。如聖經所寫:「呢啲人民坐低飲食,又企起跳舞。」

8 我哋唔好似佢哋中一啲人噉樣荒淫無恥:佢哋因犯淫亂嘅罪,一日內,有兩萬三千人倒斃。

9 我哋唔好似佢哋中一啲人噉樣試探基督:佢哋因試探佢而被蛇咬死。

10 我哋唔好似佢哋一啲人口出怨言:而被執行毁滅嘅天使所殺。

11 佢哋所遭遇嘅事都成為眾人嘅鑑戒,亦記載起,做我哋嘅警戒,因為我哋正係處喺末世嘅時代。

12 所以,邊個自以為企得穩,就當小心,免至跌倒。

13 你哋所遭遇嘅試探無非係人所能受嘅。上帝係信實嘅;佢絕唔俾你哋遭遇無力抵抗嘅試探。當試探時,佢會俾你哋力量,使你哋擔當得起,為你哋開一條出路。

14 親愛嘅朋友,你哋要遠避拜偶像嘅事。

15 我係向你哋明白事理嘅人講;你哋自己可以判斷我所講嘅啱唔啱。

16 我哋飲祝謝嘅杯,唔係分享基督嘅血咩?我哋食擘開嘅餅,唔係分享基督嘅身體咩?

17 因為我哋只有一個餅,亦分享同一個餅;所以,我哋人數雖然多,仍然係一體。

18 請睇吓以色列人,嗰啲食過祭物嘅,豈唔係同祭壇有關係?

19 我噉樣講係乜嘢意思呢?係以為偶像同祭物本身咁重要咩?

20 唔係!我係話,嗰啲獻喺異敎祭壇上嘅祭物係獻俾鬼,唔係獻俾上帝嘅。我唔願意你哋同鬼相交。

21 你哋不能飲主嘅杯又飲鬼嘅杯,不能參加主嘅筵席又參加鬼嘅筵席。

22 我哋豈可惹主嘅憤恨咩?我哋比佢強咩?

23 有人話:「我哋有自由做任何事。」噉樣講係啱。但係,唔係每件事都有益。「我哋有自由做任何事。」但係,並非每件事都會幫助人。

24 每人都唔應該為自己嘅利益着想,應該關心他人嘅利益。

25 巿場所賣嘅,你哋都可以食,唔使為良心嘅緣故查問乜嘢。

26 因為聖經話:「地同其中嘅萬物都屬於主。」

27 若有唔信主嘅人請你哋食飯,你哋亦願意去,就只管食檯上所擺嘅食物,唔需為良心嘅緣故猶豫。

28 但係,若有人話你哋知,嗰啲食物係祭過偶像嘅,你哋就為咗嗰個話你哋知嘅人,亦係為咗良心嘅緣故,唔好食此物-

29 我唔係指你哋自己嘅良心,係指嗰個人嘅良心。或有人話:「點解我嘅自由要受他人嘅良心拘束呢?

30 若我存感恩嘅心領受食物,他人點能批評我食祝謝咗嘅食物呢?」

31 所以,你哋無論做乜嘢,或食或飲,都要為榮耀上帝而做。

32 你哋無論對猶太人、異邦人,或係對上帝嘅敎會,都唔好使人跌倒。

33 你哋要照我所做嘅去做;我係要使眾人歡喜,從來冇為自己嘅好處着想,而係關心眾人嘅好處,令佢哋得救。