哥林多前書 9
使徒嘅權同責任1 我唔係自由嘅人咩?我唔係使徒咩?我冇見過我哋嘅主耶穌咩?你哋唔係我為主工作所結嘅果實咩?
2 儘管人哋唔將我當做使徒,你哋總會將我當做使徒!因為你哋成為主嘅信徒嘅事實正係我做使徒嘅證據。
3 人哋批評我時,我就噉樣辯護:
4 唔通我冇權靠傳福音食飯咩?
5 唔通我唔能夠好似其他使徒,好似主嘅兄弟,同彼得一樣,帶住信主嘅妻一齊旅行咩?
6 唔通淨係巴拿巴同我一定要為自己嘅衣食工作致可以咩?
7 有邊個當兵而自備糧餉呢?有邊個栽種葡萄而唔食自己園裏出產嘅葡萄呢?有邊個牧養羊羣而唔飲自己羊羣嘅奶呢?
8 我所講嘅唔需要只限於日常嘅例;律法唔係亦有噉樣講咩?
9 摩西嘅律法規定:「牛喺場上踹穀時,唔好笠住佢嘅嘴」。上帝關心嘅唔通係牛咩?
10 佢講此話唔係為我哋講嘅咩?當然呢啲係為我哋寫嘅!因為耕種嘅同收割嘅出去工作,都望分到佢哋所應得嘅穀物。
11 我哋喺你哋中撒屬靈嘅種。就係從你哋得到物質上嘅供給,呢啲算過份咩?
12 若人哋有權噉樣待你哋,我哋豈唔係更有噉樣嘅權咩?但係,我哋從來冇利用過呢種權,反而忍受一切,免至基督嘅福音受阻礙。
13 你哋當然知道,喺聖殿裏供職嘅人從聖殿得到食物;喺祭壇邊侍候嘅人亦分到壇上嘅祭物。
14 同樣,主亦噉樣吩咐:所有傳福音嘅人都應該倚靠傳福音嚟維持生活。
15 但係,我冇利用過呢啲權;我現今寫呢啲亦唔係為爭取呢種權。我寧死亦唔願使我所誇耀嘅落空!
16 我冇理由為傳福音而誇口。我不過係奉命去傳。我唔傳福音就有禍咯!
17 若我傳福音係出於自願,我就可以獲得賞賜;但係,上帝既然將此任務交俾我,我就認為呢啲係一種責任。
18 噉樣,我所得嘅賞賜係乜嘢呢?就係我傳福音時使人不花錢來得到福音,免至用盡我傳福音應得嘅權利。
19 我係自由嘅人,唔受任何人嘅奴役;但係我願甘心做眾人嘅僕人,為要爭取更多嘅人。
20 同猶太人一齊工作,我就好似猶太人,為要爭取猶太人。雖然我唔係處喺摩西律法嘅控制,但我好似生活喺律法下嘅人,為要爭取律法下嘅人。
21 同樣,同律法外嘅人喺一齊時,我就好似律法外嘅人,唔受猶太律法拘束,為要爭取律法外嘅人。但係,唔係話我唔服從上帝嘅律法;其實我係受基督律法約束。
22 喺信心軟弱嘅人中,我就做軟弱嘅人,為要爭取佢哋。所以,喺乜嘢樣嘅人中,我就做乜嘢樣嘅人;無論用乜嘢方法,我總要救一啲人。
23 我為福音嘅緣故做此事,目的喺同人分享福音嘅好處。
24 你哋知道,喺運動場上賽跑嘅人好多,但係得獎嘅只有一個。所以,你哋要抱住奪標嘅心嚟跑。
25 每個運動員接受嚴格嘅訓練,為要爭取會朽壞嘅冠冕;但係我哋所求嘅係唔會朽壞嘅冠冕。
26 所以,我只向住目標直跑;我又好似鬥拳嘅人每一拳都唔落空。
27 我嚴格對付自己嘅身體,為要完全控制佢,免至我傳福音過別人,自己反而被棄絕。