Library · yue

哥林多前書 11

1 你哋要效法我,好似我效法基督一樣。

崇拜時蒙頭嘅規矩

2 我稱讚你哋;因為你哋凡事記念我,並且遵守我傳俾你哋嘅敎訓。

3 但係,我希望你哋明白,基督係每個人嘅頭;丈夫係妻嘅頭;上帝係基督嘅頭。

4 男人喺公共場所禱告或宣講上帝信息時,若蒙住頭就係羞辱基督。

5 女人喺公共場所禱告或宣講上帝信息時,若唔蒙頭就係羞辱自己嘅丈夫。噉樣嘅女人同剃咗頭髮嘅女人冇分別。

6 女人若唔蒙頭,就要剪頭髮;既然認為剃頭或剪頭髮係可恥嘅事,佢就應該蒙頭。

7 男人唔需要蒙頭,因為佢反映上帝嘅形像同榮耀。但女人係反映男人嘅榮耀;

8 因為男人唔係從女人造嘅,女人係從男人造嘅;

9 男人唔係為女人而造,女人係為男人而造嘅。

10 為天使嘅緣故,女人頭上應該有頭巾,嚟表示佢順服丈夫。

11 但係:在主裏,男女互相倚賴,彼此需要。

12 因為女人係從男人造嘅,男人係從女人生嘅,而萬物都係從上帝嚟嘅。

13 你哋自己判斷!女人喺公共場所禱告唔蒙頭係合宜嘅咩?

14 你哋嘅本性唔係指示你哋,男人留長頭髮係佢嘅羞辱,

15 女人留長頭髮至係佢嘅榮耀咩?因為長頭髮可以做女人嘅頭帕。

16 若有人想辯駁,我只能話,我哋同上帝嘅眾敎會喺崇拜事上冇其他嘅規矩。

主嘅聖餐

17 我現今吩咐嘅話唔係稱讚你哋,因為你哋嘅聚會實係有損無益嘅。

18 第一,有人話我知,你哋喺聚會時結黨分派。我相信呢啲話有一部份係真嘅。

19 (你哋中有分裂係無可避免嘅;使人可以睇出邊個係有正確主張嘅。)

20 你哋聚集時,唔係嚟守主嘅晚餐。

21 因為你哋各人爭住食自己帶嚟嘅嘢,以致有啲捱餓,有啲飲飽食醉。

22 唔通你哋冇家可以飲食咩?抑或你哋故意藐視上帝嘅敎會,並且使窮人難堪呢?我對你哋應該點樣講呢?稱讚你哋咩?我不能稱讚你哋!

23 我所傳俾你哋嘅係我從主所領受嘅:主耶穌被出賣嗰夜,拎起餅,

24 祝謝上帝擘開話:「呢啲係我嘅身體,為你哋犧牲嘅;你哋應該噉樣做,嚟記念我。」

25 食後,佢照樣拎起杯,話:「此杯係用我嘅血立嘅新約。你哋每次飲時,應該噉樣做,嚟記念我。」

26 所以,你哋每逢食此餅飲此杯時,係表明主嘅死,直到佢再嚟嘅日。

27 所以,無論邊個,若唔用合宜嘅心食主嘅餅,飲主嘅杯,就係冒犯主嘅身體同血。

28 人必要先省察自己,然後食此餅,飲此杯。

29 若食此餅飲此杯時,唔辨認主嘅身體,就在飲食定自己嘅罪呀。

30 因此,在你哋中有好多軟弱嘅、患病嘅,死咗嘅亦唔少。

31 若我哋先自審,就不致受審。

32 我哋受審,係主管敎我哋,使我哋不至於同世人同被定罪。

33 兄弟呀,你哋聚集來食時,應該彼此等候。

34 若有飢餓嘅,可以喺家先食,免至聚會時受上帝審判。其他嘅事,等我嚟至解決喇。