哥林多前書 12
聖靈嘅恩賜1 兄弟呀,關於聖靈嘅恩賜,我希望你哋都明白。
2 以前你哋信異敎時,往往被引入歧途,受冇生命嘅偶像轄制。
3 我話你哋知,凡係被上帝嘅靈感動嘅人必唔話「耶穌係應受咒詛嘅」。同樣,除非被聖靈引導,亦冇人能承認「耶穌係主」。
4 有多種恩賜,但係同一位聖靈所賜;
5 有多種事奉,但係同一位主所賜;
6 有多種工作,但係同一位上帝所賜。
7 為使眾人得益,聖靈喺我哋每個人身上所彰顯嘅亦各有不同。
8 聖靈將智慧嘅信息賜俾一人,同一位聖靈將知識嘅信息賜俾另一人。
9 同一位聖靈將信心賜俾一人,將治病嘅能力賜俾另一人。
10 聖靈賜俾呢個人行神蹟嘅能力,俾嗰個人傳講上帝信息嘅恩賜,又俾唔同嘅人有辨別諸靈,講方言,同譯方言嘅能力。
11 但係,呢啲一切都係由同一位、惟一嘅聖靈嚟嘅;佢按照自己嘅旨意,將唔同嘅恩賜俾每個人。
身體有好多肢體12 基督如人身,有好多肢體;雖然身有好多肢體,到底仍係一個身。
13 同樣,我哋無論係猶太人或異邦人,做奴隸嘅或自由嘅,都從同一位聖靈受洗,成為一身,共享一位聖靈。
14 身唔係只有一肢體,係由好多肢體構成嘅。
15 若腳話:「我唔係手,所以唔屬於身」,佢不能因此就唔係身體嘅一部份。
16 若耳話:「我唔係眼,所以唔屬於身」,佢亦唔能夠因為噉就唔係身嘅一部份。
17 若全身係眼,點能聽呢?若全身係耳,點能聞呢?
18 但係,上帝照自己嘅旨意將唔同嘅肢體安置人嘅身上。
19 若肢體都係一樣嘅,又點能算係身呢?
20 其實,肢體有好多,但身只係一個。
21 所以,眼不能對手話:「我唔需要你!」頭亦不能對腳話:「我唔需要你!」
22 相反,身上似乎比較軟弱嘅肢體,更係我哋不能缺少嘅。
23 喺我哋嘅身上,睇嚟唔太重要嘅部份,反而係我哋特別愛護嘅;唔太好睇嘅部份就係我哋特別關注嘅,
24 比較美觀嘅部份唔需要特別加以裝飾。上帝噉樣安置我哋身嘅各部份,將更大嘅光榮分俾比較唔美觀嘅肢體,
25 使整體不至於分裂,每個唔同嘅肢體能互相關懷。
26 一肢體受苦,所有嘅肢體就一齊受苦;一肢體得榮耀,所有嘅肢體就一齊快樂。
27 你哋就係基督嘅身,而每個人都係肢體。
28 喺敎會裏,上帝使人各得其所;佢所安排嘅:第一係使徒,第二係先知,第三係敎師;其次係行神蹟嘅,再次係有治病能力嘅;此外重有能幫助人嘅,能管理事務嘅,能講方言嘅。
29 佢哋並唔都係使徒、先知、或敎師;亦唔都係有行神蹟,
30 治病,講方言,或譯方言嘅能力。
31 你哋要追求嗰啲更重要嘅恩賜。我現今指示你哋最好嘅道路。