Library · yue

哥林多前書 13

論愛

1 我若能講人間各種話,甚至天使嘅話,但冇愛,我嘅話就好似吵鬧嘅鑼同響亮嘅鈸一樣。

2 我若有傳道嘅才能,亦能洞悉各種知識,各種奧祕,甚至有堅強嘅信心能移山倒海,但冇愛,就唔算得係乜嘢。

3 我若將所有嘅財產都捐俾人,甚至犠性自己身體被焚燒,但冇愛,我所做嘅仍然冇益。

4 愛係堅忍嘅,仁慈嘅;有愛就唔嫉妒,唔自誇,唔驕傲,

5 唔做鹵莽嘅事,唔自私,唔輕易動怒,唔記住人哋嘅過錯,

6 唔喜歡不義,只喜愛真理。

7 愛能包容一切,對一切有信心,對一切有盼望,能忍受一切。

8 愛係永恆嘅。傳道嘅才能係暫時嘅;講方言嘅恩賜總有一日會終止;知識亦會成為過去。

9 因為我哋嘅知識同傳道嘅恩賜都係有限嘅。

10 嗰啲完全嘅一到,有限嘅就會消失。

11 我做童子時,講話似童子,情感似童子,想法亦似童子。現今我已長大成人,將童子氣嘅事丟棄。

12 我哋現今睇見嘅係間接由鏡嚟睇,模糊唔清楚,將來就面對面睇得清清楚楚。我現今對上帝嘅認識唔完全,將來就完全,好似上帝完全認識我一樣。

13 但係,信心、盼望,同愛呢三樣係永存嘅,而其中最重要嘅係愛。