哥林多前書 14
再論聖靈嘅恩賜1 你哋要追求愛。要渴慕屬靈嘅恩賜,尤其係宣講上帝信息嘅恩賜。
2 講方言嘅唔係對人講,係對上帝講,因為冇人聽得懂佢嘅話。佢係透過聖靈嘅能力講述奧祕嘅真理。
3 但係,做先知宣講上帝信息嘅係對人講,係要造就,鼓勵,同安慰佢哋。
4 講方言嘅只造就自己,宣講上帝信息嘅係造就全敎會。
5 我希望你哋都會講方言,但係我更希望你哋都有宣講上帝信息嘅恩賜。因為,除非有人能將方言譯出,使全敎會得到造就,宣講上帝信息嘅就比講方言嘅更重要。
6 兄弟呀,我到你哋處,若只講方言,唔帶俾你哋由上帝嚟嘅啟示、知識、預言,或敎導,噉樣對你哋有乜嘢益呢?
7 甚至冇生命嘅樂器,或笛或豎琴,若發出嘅聲音冇高低嘅分別,點能使人知道所吹所彈嘅係乜嘢曲調呢?
8 若吹號嘅吹出唔準確嘅音,邊個能準備打仗呢?
9 同樣,你哋講嘅若唔係清楚嘅話,邊個能明白其中嘅信息呢?你哋就係向空氣講!
10 世界上有好多唔同嘅語言,但係冇一種語言唔表達意思。
11 若我唔明白嗰種語言,使用嗰種語言嘅人對我嚟講係外國人,我喺佢眼中,亦係外國人。
12 既然你哋熱切希望有屬靈嘅恩賜,你哋應該多追求能造就敎會嘅恩賜。
13 所以,講方言嘅應該祈求特別嘅恩賜,嚟翻譯方言嘅信息。
14 若我用方言禱告,係我嘅靈禱告,但我嘅理智唔發生作用。
15 噉就點呢?我要用靈禱告,亦要用理智禱告;我要用靈歌唱,亦要用理智歌唱。
16 若唔係,當你只用靈向上帝祝謝時,喺聚會中唔識方言嘅人唔明白你講嘅係乜嘢,點能同你同心話「阿們」呢?
17 噉樣,即使你向上帝感謝嘅禱告係好,他人亦不能得到造就。
18 多謝上帝,我講方言比你哋中任何一人都多。
19 但係,喺敎會聚會中,我寧願講五句使人明白、能敎導人嘅話,重好過講千萬句方言。
20 弟兄呀,你哋喺思想上唔好似孩子;喺壞事上要似嬰孩。你哋喺思想上要成熟好似大人。
21 聖經講過:「主話:我要用異邦人嘅口唇向呢啲人講佢哋唔識嘅異邦人語言。但係,佢哋仍然唔聽從我。」
22 噉樣睇嚟,講方言嘅恩賜唔係為信徒,係俾唔信嘅人做憑據。但係,傳講上帝信息嘅恩賜唔係為唔信嘅人,係俾信徒做憑據。
23 所以,若全敎會聚會時,眾人都講方言,有唔信嘅或唔明白嘅人入嚟,豈唔會話你哋係癲嘅咩?
24 若眾人傳講上帝嘅信息,有唔信嘅或唔明白嘅人入嚟,佢會從聽見嘅話省梧到自己嘅罪,感覺到良心唔安樂,
25 隱密嘅意念顯露出嚟,就必俯伏敬拜上帝,承認話:「上帝實係在你哋中咯。」
敎會當守規矩26 弟兄呀,我嘅意思係乜嘢呢?你哋聚會崇拜時,有人獻詩歌,有人敎導,有人得到從上帝嚟嘅啟示,有人講方言,又有人翻譯方言。要知道,所做嘅一切都應當對敎會有造就。
27 若有人要講方言,最多俾兩三個輪流講,而且需要他人將所講嘅意思翻譯出嚟。
28 若冇翻譯嘅人,講方言嘅就應當唔出聲,只對自己同上帝講。
29 至於宣講上帝信息,可以由兩三個人發言,其餘嘅人小心分辨佢哋所講嘅。
30 在座嘅,若另外有人從上帝得啟示,講緊嘅人就應該停止。
31 你哋每人都可以輪流宣講上帝嘅信息,等眾人學習,得到鼓勵。
32 宣講上帝信息嘅人應該約束自己嘅恩賜;
33 因為上帝唔係要混亂,係要我哋和諧,同各敎會嘅聖徒一樣。
34 婦女喺聚會中要安靜。佢哋不可發言;好似猶太人嘅律法所規定嘅,佢哋要安於本份。
35 若佢哋想知道乜嘢,可以喺家中問丈夫。婦女喺聚會中講話係唔體面嘅事。
36 上帝嘅道豈係由你哋嚟咩?豈係單單傳俾你哋咩?
37 若有人自以為係傳講上帝信息嘅,或以為佢有屬靈嘅恩賜,佢應該知道我寫俾你哋嘅係出於主嘅命令。
38 若佢忽視呢啲,你哋可以唔理佢。
39 所以,我嘅兄弟呀,你哋應該追求宣講上帝信息嘅恩賜,但亦唔好禁止講方言。
40 凡事都要依次序,規規矩矩去做。