哥林多前書 3
上帝嘅僕人1 兄弟呀,我一向對你哋講嘅,冇將你哋當做係屬聖靈嘅,而係將你哋當做屬世嘅,係基督信仰上嘅嬰孩。
2 我淨係能用奶餵你哋,冇用飯,因為你哋仍不能食飯。就係現今,你哋亦不能食飯,
3 因為你哋仍然照人嘅標準生活。你哋有嫉妒,有紛爭;呢啲唔係證明你哋係屬世,依照人嘅標準生活嘅咩?
4 你哋有人話:「我係保羅嘅人」;亦有人話:「我係亞波羅嘅人。」噉樣,你哋同屬世嘅人有乜嘢唔同呢?
5 到底亞波羅算乜嘢?保羅算乜嘢?我哋不過係上帝嘅僕人,引導你哋歸信上帝。我哋每個人都照主所分派嘅工作去做:
6 我栽種,亞波羅灌溉,但係使佢生長嘅係上帝。
7 栽種嘅同灌溉嘅都唔算得乜嘢;一切在於使佢生長嘅上帝。
8 栽種嘅同灌溉嘅冇乜分別,上帝將照每個人嘅工作酬報佢。
9 我哋係上帝嘅同工;你哋係上帝嘅園地。你哋亦係上帝嘅建築物。
10 我用上帝俾我嘅恩賜,好似一個智慧嘅建築師立好根基,人哋喺上面建造。但每人都要謹慎點樣喺根基上建造。
11 因為上帝已經立耶穌基督做惟一嘅根基,冇人能立其他嘅根基。
12 在此根基上,有人用金銀,或寶石建造;亦有人用木料、草、禾稈建造。
13 到審判日,每人嘅工程好壞都會顯露出嚟;因為大火將顯露並試驗每人嘅工程,使真嘅品質出現。
14 著佢所建造嘅工程經得起火嘅考驗,佢就得奬賞。
15 佢嘅工程被火燒毁,佢就虧損,但佢自己得救,不過好似由火裏走出嚟一樣。
16 豈唔知,你哋係上帝嘅殿,上帝嘅靈住喺你哋裏。
17 若有人毁壞上帝嘅殿,上帝必毁滅佢;因為上帝嘅殿係神聖嘅,你哋自己就係上帝嘅殿。
18 人唔好自欺。若你哋中有人按照世人嘅標準自以為有智慧,佢就應該承認自己係愚拙,致能成為真有智慧嘅。
19 因為此世界認為有智慧嘅,喺上帝眼中係愚拙嘅。好似聖經話:「上帝使智慧嘅人中咗自己嘅詭計。」
20 另一處經文話:「主知道智慧者嘅思想不過係一種妄想。」
21 所以,無論邊個都唔應當誇耀人所能做到嘅事。其實,一切都係你哋嘅:
22 保羅、亞波羅、彼得、呢個世界、生或死、現今或將來,樣樣都係你哋嘅;
23 但你哋係屬基督嘅,而基督係屬上帝嘅。