哥林多前書 4
基督嘅使徒1 你哋當以我哋為基督嘅僕人,受命做上帝之奧祕嘅管家。
2 主人對管家所求嘅就係忠心。
3 我被你哋,或任何人論斷,都認為係一件小事;我自己亦唔論斷自己。
4 我覺得自己良心清白,但不能因此證明我冇罪。惟有主審斷我。
5 所以,喺時機未到時,你哋唔好論斷任何人。要等到主再嚟時至有最後嘅審判;嗰時,佢要暴露藏喺黑暗裏嘅祕密,揭發人心裏嘅動機;嗰時,每人會從上帝得到應得嘅稱讚。
6 兄弟呀,為你哋嘅緣故,我將此事情應用喺亞波羅同我身上,做一個例子,使你哋學到「循規蹈矩」呢句話嘅意思。你哋無論邊個都唔好自高,睇重呢個,輕視嗰個。
7 邊個使你勝過他人呢?唔通你所有嘅唔係上帝所賜嘅咩?噉樣,為乜自誇,好似你所有嘅並唔係上帝恩賜嘅呢?
上帝嘅恩賜8 你哋已經乜嘢都有喇!已經發達喇!做王喇,唔使我哋咯。我願意你哋真係做王,使我哋亦同你哋一齊做王。
9 因為,據我所睇,上帝顯然將我哋做使徒嘅列喺最末後,好似判咗死刑嘅囚犯,喺天地間成為一台戲,等天使同世人嚟睇。
10 為基督嘅緣故,我哋成為愚笨嘅人,而你哋喺基督裏係好聰明;我哋軟弱,你哋堅強;我哋被輕視,你哋受尊重。
11 直到現今,我哋仍係飢渴交迫,衣不蔽體,成日挨打,到處流浪,
12 並且雙手辛勞工作嚟養活自己。被人咒罵,我哋就講祝福嘅話;受人逼迫,我哋就忍耐;
13 被侮辱,我哋就用好話回答。直到現今,我哋被睇做世上嘅垃圾、人間嘅渣滓。
14 我寫呢啲,唔係要使你哋覺得慚愧,係要敎導你哋,將你哋當做自己親愛嘅仔女一樣。
15 即使你哋在基督有上萬嘅導師,但做你哋父親嘅唔係多。因為我在基督耶穌裏用福音來生你哋。
16 所以,我勸你哋要學我嘅榜樣。
17 為此,我打發提摩太去你哋處;喺主裏佢係我親愛而又忠心嘅仔。佢會提醒你哋,我喺基督耶穌裏嘅新生活所遵行嘅道路,即係我喺各地敎會所敎導嘅。
18 你哋中,有人以為我唔會去你哋處,就自高自大起嚟。
19 其實,若主准許,我唔使幾耐就會嚟睇你哋。嗰時,我唔單要聽嗰啲傲慢嘅人講啲乜嘢,亦要睇吓佢哋究竟能做啲乜嘢。
20 因為上帝嘅國唔在於言詞,係在於權能。
21 你哋願意選擇邊一樣呢?要我帶住鞭去,抑或要我帶住慈愛溫柔嘅心去呢?