哥林多前書 5
敎會中淫亂嘅事1 我的確聽聞你哋中有淫亂嘅事;此淫亂異邦敎徒亦不能容忍嘅。我聽聞有人同佢嘅繼母同居!
2 你哋重有乜嘢好誇口呢?你哋應該覺得痛心,將做此事嘅人從你哋中開除。
3 至於我,雖然我嘅身體離開你哋好遠,但我嘅心同你哋喺一齊。
4 我已經奉主耶穌嘅名判定嗰個犯呢種淫亂罪行嘅人,好似我喺你哋嗰處一樣。你哋聚會時,我嘅心同你哋喺一齊。藉我哋主耶穌嘅權威,
5 將此人交俾撒但,等撒但毁滅佢嘅身體,使佢嘅靈,喺主再嚟嘅日子,能得救。
6 你哋自誇係唔啱嘅!你哋知道有句話噉講:「一啲多酵可以使全團麵發起嚟。」
7 要將罪嘅舊酵除淨,你哋至能完全乾淨。噉樣,你哋就好似冇酵嘅新麵;其實,你哋本應係冇酵嘅。我哋逾越節嘅筵席已經預備好,逾越節嘅羔羊基督已經做犧牲獻上。
8 所以,我哋守此節,唔好用舊酵,含有罪同邪惡嘅餅,但要用冇酵,含有純潔同真理嘅餅。
9 從前俾你哋嘅信,我曾話過你哋唔好同淫亂嘅人來往。
10 我並唔係指異邦人中嗰啲淫亂,貪心,盜竊,或拜偶像嘅人;除非離開呢個世界,要同噉樣嘅人隔絕係做唔到嘅。
11 我嘅意思係:唔好同嗰啲自稱為信徒,但淫亂,貪心,拜偶像,辱罵他人,醉酒,或盜竊嘅人來往;同噉樣嘅人同食飯亦唔可以。
12 我嘅責任唔喺審判敎外嘅人,上帝自然會審判佢哋。
13 你哋唔係應該審判敎內嘅人咩?好似聖經話:「要從你哋中將嗰啲邪惡嘅人開除!」