Library · yue

哥林多前書 6

信徒間嘅爭論

1 你哋中,若有爭論嘅事,點可以告到唔信主嘅法官面前,而唔等聖徒為你哋解決呢?

2 唔通你哋唔知道聖徒要審判世界咩?你哋既然要審判世界,唔通冇能力解決嗰啲小事咩?

3 你哋唔知我哋要審判天使咩?何況世上嘅事呢?

4 噉樣,若有呢一類嘅糾紛,你哋要等嗰啲不足為敎會所重視嘅人嚟處理咩?

5 幾咁可恥呀!唔通喺你哋中竟然冇一個智慧人能替一班兄弟解決糾紛咩?

6 你哋中竟然有兄弟控告兄弟嘅事,而且告到去唔信主嘅人面前!

7 你哋彼此告狀,證明你哋係完全失敗嘅。點解唔寧願受啲冤枉?點解唔甘心受虧?

8 你哋竟彼此冤枉,互相虧負,連對自己嘅一班兄弟亦係噉樣。

9 唔通你哋唔知道邪惡嘅人不能做上帝國嘅子民咩?唔好呃自己呀!凡係淫亂,拜偶像,姦淫,做變童,親男色,

10 偷嘢,貪心,醉酒,詆毁人,或勒索人嘅,都不能做上帝國嘅子民。

11 你哋中,有啲人以前係噉樣。但係,透過主耶穌基督嘅名同我哋上帝嘅靈,你哋已經被洗淨,已經成聖,已經稱義咯。

用你嘅身體榮耀上帝

12 或者有人話:「乜嘢事我都可以做。」冇錯;但唔係每件事都對你有益處。我可以話:「乜嘢事我都可以做」;但我唔要做任何一件事嘅奴隸。

13 有人話:「食物係為肚,肚係為食物。」冇錯;但上帝會將呢兩樣都毁壞。我哋嘅身體唔係為行淫,而係為主,而主供應我哋身體嘅需要。

14 上帝使主從死裏復生;佢亦同樣要憑自己嘅大能使我哋復生。

15 豈唔知,你哋嘅身體係基督嘅肢體。我可以將基督嘅肢體當做娼妓嘅肢體咩?絕對不可!

16 你哋必知道,邊個同娼妓苟合,就係同佢成為一體。因為聖經話:「兩人要成為一體。」

17 但係,邊個同主聯合,就喺靈性上同主合而為一。

18 所以,你哋要避免淫亂。人無論犯乜嘢罪都唔影響自己嘅身體;惟有犯淫亂嘅人係害自己嘅身體。

19 你哋唔知道你哋嘅身體係聖靈嘅殿咩?聖靈住喺你哋裏面,係上帝所賜嘅。你哋唔屬於自己,而係屬於上帝,

20 因為佢用重價買咗你哋。所以,你哋要用身體嚟榮耀上帝。