哥林多前書 7
婚姻問題1 論及你哋信中所提嘅事。我諗,一個男人能夠唔結婚係好。
2 不過,既然有咁多淫亂嘅事發生,每個男人應該有自己嘅妻;每個女人亦應該有自己嘅丈夫。
3 丈夫要對妻盡夫妻間嘅責任;妻亦要對丈夫盡夫妻間嘅責任。
4 妻對自己嘅身體冇主權,主權喺丈夫;同樣,丈夫對自己嘅身體亦冇主權,主權係喺妻處。
5 夫妻唔好忽略對方嘅需求,除非為專心禱告,彼此同意暫時分房;但以後仍要恢復正常嘅關係,免至你哋因情不自禁而受撒但嘅誘惑。
6 我噉樣講唔係命令你哋,而係准許你哋。
7 事實上,我願眾人都好似我一樣唔結婚。但係,每個人由上帝領受咗唔同嘅恩賜,有人係呢樣,有人係嗰樣。
8 我向冇結婚嘅人同寡婦講:能好似我一樣過獨身生活亦都唔錯。
9 若你哋不能抑制慾念,就結婚好。與其慾火焚燒,不如有嫁有娶。
10 對於已經結婚嘅人,我亦有所吩咐;其實唔係我嘅意思,係主嘅命令:妻唔好離開丈夫,
11 若離開,就唔好再嫁;否則,佢必要再同丈夫好返。丈夫亦唔好離棄做妻嘅。
12 對其他嘅人我自己亦有話要講(唔係主講嘅):若一位兄弟有唔信主嘅妻,而妻願意繼續同佢一齊生活,佢就唔可以離棄做妻嘅。
13 若有個女信徒已經同非信徒結婚,而丈夫願意繼續同佢喺一齊生活,佢亦唔可以離棄丈夫。
14 因為嗰個冇信主嘅丈夫係因信主嘅妻而成為聖潔;同樣,嗰個冇信主嘅妻亦係因信主嘅丈夫而成為聖潔。若唔係噉樣,佢哋嘅仔女就唔算聖潔;事實上,佢哋係聖潔嘅。
15 但係,若冇信主嘅一方要離開信主嘅伴侶,就由佢去喇。喺此情形下,嗰個信主嘅,無論係丈夫或係妻,都不必拘束。上帝呼召你哋,要你哋和睦相處。
16 信主嘅妻呀,你點能肯定救唔到自己嘅丈夫呢?信主嘅丈夫呀,你點能肯定救唔到自己嘅妻呢?
保持蒙召時嘅身分17 每個人嘅生活應該按照主嘅恩賜,並且符合上帝呼召佢嘅目的。呢啲係我敎導各敎會嘅原則。
18 嗰個受割禮後接受呼召嘅人不必除去割禮嘅印記;嗰個接受呼召時未受割禮嘅人亦唔使受割禮。
19 因為受唔受割禮都算唔得乜嘢;重要嘅係服從上帝嘅命令。
20 每個人應該保持蒙召時嘅身分。
21 若你蒙召時係奴隸嘅身分,不須憂慮;但有獲得自由嘅機會,你就爭取自由更好。
22 奴隸蒙主呼召就係主所釋放嘅人;自由嘅人蒙召就成為基督嘅奴隸。
23 你哋係上帝用重價買嚟嘅,所以唔好做人嘅奴隸。
24 兄弟呀,你哋每個人,喺上帝面前,都要保持蒙召時嘅身分。
獨身同寡居嘅問題25 關於獨身嘅問題,我冇從主得到乜嘢指示。但係我蒙上帝憐憫,成為可信嘅人。我就用噉樣嘅身分向各位提供我嘅意見。
26 想到目前處境嘅艱難,我認為人最好能安於現狀。
27 若你已經有妻,唔好想擺脫;若你重未結婚,亦無需追求家室。
28 你若要結婚,唔算犯罪;未婚嘅女子結婚,亦冇乜嘢唔對。但係,我寧願你哋唔需要好似佢哋噉樣,喺日常生活裏遭受種種嘅拖累。
29 兄弟呀,我想話你哋知:時候冇多喇,所以有妻嘅,要好似冇妻噉樣;
30 哭泣嘅,好似唔哭泣嘅噉;歡笑嘅,好似唔歡笑嘅噉;購置嘅,好似未曾擁有乜嘢嘅噉;
31 享受世上財富嘅,好似未能盡情享受嘅噉。因為現有嘅世界快要過去。
32 我希望你哋無所掛慮。冇結婚嘅人係專心以主嘅事為念,因為佢想討主嘅喜悅。
33 結咗婚嘅人關心嘅係世上嘅事;因為佢要取悅自己嘅妻,
34 難免分心。冇丈夫同守獨身嘅女人所關心嘅係主嘅工作,因為佢願意奉獻自己嘅身體同心靈。結咗婚嘅女人關心嘅係世上嘅事,因為佢要取悅自己嘅丈夫。
35 我噉樣講係想幫助你哋,唔係限制你哋。我想你哋做得合適,而且為主嘅工作完全奉獻自己,全無保留。
36 至於已經訂婚但決定唔結婚嘅人,若男嘅覺得對女噉做係唔適當,自己又有旺盛嘅性慾,覺得應該結婚,佢哋就結婚好啦;噉樣做唔算有罪。
37 但係,一個人若有堅定嘅意志唔結婚,並且能自制,噉樣,唔同未婚妻結婚亦係好嘅。
38 噉樣,嗰個同未婚妻結婚嘅固然好,唔結婚更好。
39 一個已婚嘅女人喺丈夫生存時係受約束;丈夫若死咗,佢就有自由同佢所喜歡嘅男人結婚,但係對象應該係信徒。
40 照我個人嘅竟見;我以為有上帝嘅靈指引我,佢若唔再嫁就更有福氣。