哥林多前書 8
論祭偶像嘅食物1 關於祭過偶像食物嘅問題,我哋以為「我哋都有呢方面嘅知識。」其實,呢一類嘅知識只會使人自高自大,惟有愛心致能造就人。
2 若有人自以為知道乜嘢,實際上佢重係唔知道佢所當知嘅。
3 但係,嗰啲愛上帝嘅人係上帝所認識嘅。
4 論及關於食祭偶像食物嘅問題,我哋知道,偶像並唔代表一種真實嘅存在;我哋亦知道,上帝只有一位。
5 雖然天上人間亦有所謂「神」嘅,(有好多嘅「神」同好多嘅「主」,)
6 但係對我哋嚟講,只有一位上帝,就係天父,萬物嘅創造者;我哋係為佢而活。並且,只有一位主,係耶穌基督;萬物都透過佢而造,而我哋亦透過佢生存。
7 但係,唔係每個人都有此知識。有啲人特別習慣拜偶像嘅事,所以直到今日,每逢食此食物,總覺得係偶像嘅食物。佢哋嘅良心本嚟就軟弱,更因為食咗呢種食物就覺得受污染。
8 其實,食物並不能改善我哋同上帝嘅關係;唔食並冇乜嘢損失,食亦冇乜嘢收益。
9 但係,要小心,唔好因你哋運用個人嘅自由而使信心軟弱嘅人犯罪。
10 若有人喺此事上良心軟弱,睇見你呢啲「知識豐富」嘅人喺偶像嘅廟裏飲食,豈唔係等於鼓勵佢去食嗰啲祭偶像嘅食物咩?
11 噉樣,此軟弱嘅兄弟,亦係基督為佢死嘅人,將因你嘅「知識」而滅亡!
12 你哋噉樣做,得罪兄弟,傷害佢哋軟弱嘅良心,就係得罪基督。
13 所以,若食物會使兄弟犯罪,我就永遠唔再食肉,免至使我嘅兄弟犯罪。