Library · yue

哥林多後書 11

保羅同假使徒

1 我希望你哋容忍我,就算我有一點蠢,相信你哋都會容忍!

2 我愛你哋到咗嫉妒嘅程度,好似上帝對你哋一樣。因為你哋好似貞潔嘅童女,我將你哋許配俾一個丈夫,就係基督。

3 我怕你哋嘅心被腐化,放棄對基督純潔專一嘅愛,好似夏娃被蛇嘅詭詐誘惑一樣。

4 設使有人嚟傳另一個耶穌,唔係我哋所傳嘅,你哋竟然都容忍;有另外嘅靈同另一種福音,同我哋所傳俾你哋嘅唔同,你哋亦樂意接受!

5 我相信我冇邊一樣比唔上你哋嗰啲「超等使徒!」

6 我或者不善詞令,但係喺知識上並唔比人哋差;呢一點,我喺各樣事上隨時都向你哋表明過。

7 我傳上帝嘅福音俾你哋,未曾向你哋索取乜嘢;我貶低自己,使你哋高升。唔通呢啲係我嘅過錯咩?

8 當我喺你哋當中工作時,有其他敎會供給我;我似乎係剝削其他敎會嚟服務你哋。

9 我同你哋喺一齊時,無論有乜嘢需要,從來冇求你哋幫助。我需要嘅一切都係由馬其頓嚟嘅兄弟供給。過去係噉樣,將來亦係噉樣。我絕唔會成為你哋嘅負擔!

10 我指住喺我心中基督嘅誠實講,我所誇口嘅喺亞該亞全境冇人能阻止。

11 點解我噉樣講呢?唔通我唔愛你哋咩?上帝知道,我係愛你哋!

12 我要繼續現今嘅工作,為要使嗰啲所謂「使徒」嘅人再不能誇口,以為佢哋所做嘅都同我哋所做嘅一樣。

13 呢班人唔係真使徒;佢哋係假使徒,行為詭詐,偽裝做基督嘅使徒。

14 其實呢啲亦唔出奇,連撒但亦將自己裝成光明嘅天使!

15 所以,若撒但嘅爪牙化裝做仁義嘅僕人,亦冇乜嘢希奇。佢哋嘅結局必同佢哋嘅行為相符。

保羅遭受嘅苦難

16 我再講:邊個都唔應該將我當做蠢材。假如你哋要將我當做蠢材,就將我當做蠢材喇,等我誇口一吓。

17 我現今所講嘅話並唔係主要我講嘅;我噉樣誇口只不過好似一個蠢材喺處亂誇。

18 既然有咁多人拎屬世嘅事嚟誇口,我亦不妨誇口一吓。

19 你哋咁聰明,居然樂意容忍蠢材!

20 無論邊個奴役你哋,佔你哋嘅便宜,陷害你哋,輕視你哋,抑或打你哋一巴,你哋都能容忍。

21 等我講句慚愧嘅話,噉樣嘅事,我哋冇勇氣去做。但係,假如有人敢喺乜嘢事上大膽誇口,(等我講句唔用頭腦嘅話,)我亦會有同樣嘅膽量。

22 佢哋係希伯來人咩?我亦係。佢哋係以色列人咩?我亦係。佢哋係亞伯拉罕嘅子孫咩?我亦係。

23 佢哋係基督嘅僕人咩?(講句狂妄話,)我更係!我嘅工作更辛苦,坐監嘅次數更多,常受鞭打,多冒生命嘅危險。

24 我被猶太人鞭打過五次,每次照例打三十九吓;

25 被羅馬人用棍打過三次,被人用石掟過一次,三次遭遇海難,一次喺水裏掙扎過二十四小時。

26 喺屢次旅行中,我經歷過洪水嘅危險,盜賊嘅危險,嚟自猶太人同異邦人嘅危險,又有都巿裏嘅危險、荒野嘅危險、海洋上嘅危險,同假兄弟所造成嘅危險。

27 我又有工作上嘅勞碌困苦,經常通宵唔瞓,忍受飢渴,缺乏食物,冇庇護嘅地方,有衫着。

28 呢啲都唔講,我重要為各敎會嘅事掛慮,好似重擔一樣日日壓喺我嘅身上。

29 有邊個軟弱,我唔軟弱?有邊個失足犯罪,我唔滿心焦慮呢?

30 若我必要誇口,我寧願誇耀嗰啲顯示我自己軟弱嘅事。

31 我哋主耶穌嘅父上帝係永遠當受讚美嘅;佢知道我唔講大話。

32 當我喺大馬色時,亞哩達王手下嘅總督派警衛把守各城門,要逮捕我。

33 但係有人用籮從城牆嘅窗口將我吊落去,使我脫離佢嘅手。