哥林多後書 7
1 親愛嘅朋友呀,既然我哋得此應許,我哋應該潔淨自己,除去一切使身體心靈污染嘅事物,喺敬畏上帝嘅生活中完成聖潔。
保羅嘅喜樂2 請你哋以寬大嘅胸襟接納我哋。我哋冇做過對唔住人嘅事;冇破壞邊個亦冇佔過邊個嘅便宜。
3 我噉講,唔係責備你哋。我已經講過,你哋常時在我心中;我哋願意與你哋同生共死。
4 我絕對信任你哋,十分誇耀你哋!喺一切患難中,我深受安慰,充滿快樂。
5 到馬其頓以後,我哋身體不得安寧。到處遭遇困難,遇到衝突紛爭,亦有內心嘅恐懼。
6 但係,嗰位鼓勵灰心喪志嘅人嘅上帝藉提多嚟鼓勵我哋。
7 佢唔單只嚟到,亦向我哋報告佢點樣從你哋得到鼓勵,及你哋點樣渴望見我,點樣憂傷,並且懇切為我辯護。呢一切都使我更加歡喜。
8 關於以前我俾你哋嗰封信,雖然使你哋心裏難過,我亦唔後悔。我可能因知道嗰封信喺你哋中引起一時嘅憂愁而有點後悔。
9 但係,現今我好高興,唔係因為我使你哋憂愁,係因為你哋憂愁生出悔改。上帝善用你哋嘅憂愁,為噉可以話我哋所做嘅並冇傷害你哋。
10 上帝所善用嘅憂愁改變人心,使人得救;呢啲係唔需要後悔嘅!但係屬世嘅憂愁會使人死亡。
11 你哋睇,上帝善用你哋嘅憂愁,使你哋急忙為自己辯護,而且顯出義憤,警愓,熱望,及忠心,隨時懲罰不義嘅行為!喺各方面你哋都證明自己係清白嘅。
12 我雖然寫咗嗰封信,但並唔係為犯過錯嘅人寫嘅,亦唔係為受虧負嘅人寫嘅。乃係想喺上帝面前表明你哋顧念我哋嘅熱心。
13 我哋因此得到鼓勵。唔單只噉樣,提多嘅喜樂更增加我哋嘅喜樂;因為你哋都幫助佢,使佢快樂。
14 我曾喺佢面前誇奬你哋,你哋並冇使我慚愧。我哋一向對你哋講真話;同樣,我哋對提多誇奬你哋嘅話亦證明係真嘅。
15 當提多想起你哋點樣順服,用恐懼戰兢嘅心接待佢,佢對你哋嘅愛心就更增加。
16 現今我甚高興,因為我可以完全信任你哋!