Library · yue

哥林多後書 8

基督徒嘅捐助

1 兄弟呀,我哋希望你哋知道上帝點樣恩待馬其頓嘅各敎會。

2 佢哋從所經歷嘅患難中受到嚴重嘅考驗;但係佢哋充滿快樂,雖然處喺極貧困中仍然慷慨捐助。

3 我可以證明,佢哋嘅捐助係竭盡所能嘅,甚至超過佢哋嘅力量。

4 佢哋自動向我哋懇求,俾佢哋喺接濟猶太聖徒嘅善事上有份。

5 實係遠超過我哋所期待嘅。首先,佢哋將自己奉獻卑上帝,然後又照上帝嘅旨意奉獻俾我哋。

6 因此,我哋鼓勵提多繼續協助你哋,完成佢所開始嘅善事。

7 無論係信心、口才、知識、幫助人哋嘅熱誠、同對我哋嘅愛心,你哋都係格外豐富,我希望你哋喺此善事上亦格外慷慨。

8 我唔係要吩咐你哋,只係想你哋知道他人點樣熱心幫助人,用呢啲嚟考驗你哋嘅愛心。

9 你哋已經知道我哋嘅主耶穌基督嘅恩典:佢本來係富足嘅,但為你哋嘅緣故使自己成為貧窮,等你哋由於佢嘅貧窮而成為富足。

10 對此事,我認為:你哋最好現在完成去年開始嘅募捐。你哋唔單係最先有此行動,亦係最先響應此運動嘅。

11 噉樣就當堅持落去,完成此工作!你哋應該用當初計劃時嘅熱心去完成此工作,而且要照你哋現今所有嘅去進行。

12 若你哋真心損助,上帝必悅納;佢要你哋獻上你哋所有嘅,唔係所冇嘅。

13 我唔係想加重你哋嘅負擔嚟減輕人哋嘅負擔。

14 既然你哋現今富足,就應該幫助嗰啲貧窮嘅。到佢哋富足而你哋有需要時,佢哋亦會幫助你哋。等雙方面都有機會互相幫助。

15 好似聖經話:「多收嘅,亦無餘;少收嘅,亦無缺。」

提多同佢嘅同工

16 感謝上帝,佢使提多同我哋同樣熱心協助你哋!

17 佢不只係因為我哋嘅鼓勵,亦係出於自願,熱切盼望去你哋處。

18 我哋另外派一位兄弟同佢一齊去;呢位兄弟喺傳福音嘅工作上為各地敎會所尊重。

19 唔單只噉樣,喺我哋為主嘅榮耀進行嘅呢件善事上,佢被各敎會選派,做我哋嘅旅伴,亦表示我哋眾人都樂意援助。

20 我哋經管呢一筆慷慨嘅捐款,始終十分謹慎,免致引起人哋嘅毁謗;

21 因為我哋定意做善事,唔單喺主面前噉樣,喺人面前亦係噉樣。

22 我哋又打發另一位兄弟同佢哋同行。此兄弟經過我哋多次嘅考驗,我哋知道佢喺好多事上熱心幫助他人。現今佢深深信任你哋,就更渴望去幫助你哋。

23 至於提多,佢係我嘅同伴,喺協助你哋嘅工作上與我同工。另外同佢一齊去嘅兩位兄弟係各敎會嘅代表,基督嘅光榮。

24 所以,你哋要喺各敎會前證明對佢哋嘅愛心,並且使各敎會知道,我哋對你哋嘅誇奬係冇錯嘅。